Փաստ ինֆո

ՀՀ ներթափանցած ադրբեջանական խմբերը դեռ չեն հայտնաբերվել, չեն տեղորոշվել։ Համենայն դեպս ԱԱԾ-ն դրանց հատնաբերման մասին չի հայտարարում ու ոչ էլ հերքում է Ալեն Սիմոնյանի՝ հանրության շրջանում խուճապ առաջացրած հայտարարությունը։

Հիշեցնենք, որ սեպտեմբերի 16-ին ԱԺ նախագահ Ալեն Սիմոնյանը «Հանրային» ՀԸ եթերում հայտարարել էր ՀՀ ներթափանցած ադրբեջանական խմբերի որոնման մասին՝ նշելով. «Կան ներթափանցած 1-2 խումբ այս պահի դրությամբ, որոնց որոնողական աշխատանքներ են տարվում ։ Դրանք դուրս կմղվեն կամ այդ հարցը ռազմական առումով կլուծվի, եւ ենթադրում եմ, որ շատ արագ»։

Ալեն Սիմոնյանի հայտարարության հետքերով «Փաստինֆո»-ն գրավոր հարցում է ուղարկել ՀՀ ԱԱԾ՝ պարզելու, թե արդյոք տեղորոշվել է ՀՀ ներթափանցած ադրբեջանական խմբերի գտնվելու վայրը, եթե այո, ապա որ տարածքում են նրանք գտնվում, արդյո՞ք տեղի բնակիչների հետ համապատասխան աշխատանքներ իրականացվել են՝ իրազեկելու տարածքում գտնվող ադրբեջանցիների, նրանց տարբերելու, իսկ տեսնելու դեպքում՝ պատկան մարմիններին դիմելու և այլ գործողությունների վերաբերյալ, արդյո՞ք ՀՀ ներթափանցած ադրբեջանցիներն արդեն հայտնաբերվել են։

ԱԱԾ-ն, սակայն, խուսափողական պատասխան է տվել՝ նշելով, թե «ՀՀ ԱԱԾ տնօրենին հասցեագրված 03.10.2022 թ.-ի տեղեկություն ստանալու մասին Ձեր գրավոր հարցման մեջ նշված հարցադրումների կապակցությամբ տեղեկացնում ենք, որ սույն թվականի սեպտեմբերի 17-ին ՀՀ ԱԺ նախագահի խոսնակի կողմից այդ մասին տրվել են ամողջական պարզաբանումներ»։ Նշված է ԱԱԾ-ի գրության մեջ՝ կից ուղարկելով հղումը։

Մինչդեռ, մեր կողմից բարձրացված հարցերին որևէ անդրադարձ ԱԱԾ-ի կողմից վկայակոչված պարզաբանման մեջ չկա։

Նշենք, որ ԱԺ նախագահի մամուլի խոսնակը «News.am»-ի հետ զրույցում նշել էր, թե Ալեն Սիմոնյանն ընդամենը Գլխավոր շտաբի պետի արված հայտարարության մասին ավելի բաց է խոսել։

«Ալեն Սիմոնյանն ասել է բաց աղբյուրներում առկա տեղեկությունը, սակայն վերաձևակերպել, լրացրել ու ավելի համակարգված է ներկայացրել»,– հայտարարել էր Ծովինար Խաչատրյանը։

Ու հիմա ԱԱԾ-ն խուսափում է ասել՝ Ալեն Սիմոնյանի կողմից «ավելի համակարգված» ներկայացված տվյալներով ներթափանցված ադրբեջանցի խմբերը դեռ Հայաստանում են, թե ոչ։ Ի վերջո՝ ԱԱԾ-ի պարտականություններից է ազգային անվտանգության հարցերին առնչվող խնդիրների չեզոքացումը, նույնիսկ հարկ չի համարում պարզաբանելու, թե ադրբեջանական խմբերի հանդիպող ՀՀ քաղաքացիները ինչ գործողություններ պետք է իրականացնեն, ում դիմեն, կամ, գոնե տարածքում բնակվող բնակիչների հետ աշխատանք արվել է, թե՝ ոչ։ Իսկ եթե դրանք եղել են ոչ արժանահավան տեղեկություններ ու Ալեն Սիմոնյանն ընդամենն իր սահմանափակ ընկալունակության սահմաններում վերաձեւակերպել ու ավելի համակարգված ներկայացրել է հանրության շրջանում անհիմն խուճապ տարածող տեղեկություններ, ապա ԱԱԾ-ն ուղղակի պարտավոր է դա բացահայտ ամրագրելու՝ խուճապային տրամադրությունները մեղմելու համար, բայց ոչ՝ ՀՀ ԱԱԾ-ն համարձակություն չունի հերքելու ԱԱԾ-ին ու ոչ էլ քննություն նախաձեռնելու՝ պարզելու համար ԱԺ նախագահի կողմից խուճապը տարածվել էր դիտավորյալ, թե սահմանափակ հասկացողության հետեւանքով։

ԱԱԾ-ի պատասխան ուղղակի վկայում է, որ գործող ԱԱԾ-ին չի մտահոգում Հայաստանի անվտանգությունն ու որ պետական մակարդակով հանրությունը տեղեկատվական տեռորի է ենթարկվում՝ թշնամու համար գործելու դյուրին դաշտ ստեղծելով։

Աղբյուր` Փաստինֆո