Փաստ ինֆո

ՀՅԴ ԳՄ անդամ, ԱԺ նախկին պատգամավոր Սուրեն Մանուկյանի կալանավորման ժամկետը երկարացվել է երկու ամսով։ Երևանի ընդհանուր իրավասության դատարանը՝ դատավոր Ռազմիկ Մարիկյանի նախագահությամբ, բավարարել է Սուրեն Մանուկյանի նկատմամբ ընտրված խափանման միջոց կալանավորումը ևս երկու ամսով երկարացնելու մասին քննիչի միջնորդությունը։ Այս մասին «Փաստինֆո»-ի հետ զրույցում հայտնեց պաշտպան Սերգեյ Ոսկանյանը՝ հավելելով, որ դատարանի որոշման դեմ բողոք կներկայացվի։

Ինչպես արդեն տեղեկացրել ենք՝ Սուրեն Մանուկյանը ձերբակալվել, ապա կալանավորվել է «Ազատ դեմոկրատներ» կուսակցության նախագահ Խաչատուր Քոքոբելյանի հոր առևանգման գործով։ Ընդ որում, ինչպես հետագայում պարզվել է, Սուրեն Մանուկյանը ձերբակալման օրը հրավիրվել էր ՀՀ քննչական կոմիտե մեկ այլ գործով որպես տուժող քննչական գործողության մասնակցելու համար, սակայն ճանապարհին, այսօրվա իրավապահ մարմիններին բնորոշ բեմականացմամբ, բռնության գործադրմամբ ձերբակալվել էր՝ անձի առևանգման կասկածանքով։ Սուրեն Մանուկյանին մեղադրանք է առաջադրվել՝ ՀՀ քրեական օրենսգրքի 191 հոդվածի 2-րդ մասի 5-րդ կետով՝ խմբի կազմում անձի առևանգման հատկանիշներով։

Փաստաբան Սերգեյ Ոսկանյանը «Փաստինֆո»-ի հետ զրույցում հայտնեց, որ Սուրեն Մանուկյանի մեղադրանքը փոփոխվել է։ Այժմ Սուրեն Մանուկյանին մեղսագրվում է ոչ միայն խմբի կազմում անձի առևանգումը, այլև՝ առանձնապես խոշոր չափերի շորթումը։ Պաշտպանը նշեց, որ Մանուկյանը մեղքը, բնականաբար, չի ընդունում։ Սուրեն Մանուկյանը ցուցմունք տվել է միայն դատարանում՝ կալանքի միջնորդությունների քննարկման ժամանակ, գրավոր ցուցմունք չի տվել, տուժող Խաչատուր Քոքոբելյանի հոր հետ առերես հարցաքննություն տեղի չի ունեցել։

Հեղինակ՝ Իզաբել Սահակյան

Աղբյուր` Փաստինֆո