Փաստ ինֆո

Երևանի ընդհանուր իրավասության դատարանի դատավոր Դավիթ Արղամանյանն արդեն չորս ամիս է՝ չի քննում Նիկոլ Փաշինյանի դեմ քրեական գործ հարուցելու պահանջով «Ցորի» զորամասի՝ Արցախյան երրորդ՝ 44-օրյա պատերազմում զոհված զինծառայողների իրավահաջորդների բողոքը։ Այս մասին «Փաստինֆո»-ի հետ զրույցում հայտնեց զինծառայողների իրավահաջորդների ներկայացուցիչ Լիպարիտ Սիմոնյանը։

Հիշեցնենք, որ Ցորի զորամասի՝ 44-օրյա պատերազմում զոհված և անհետ կորած զինծառայողների ծնողներն ապրիլի 18-ին հանցագործության մասին հաղորդում են ներկայացրել ՀՀ գլխավոր դատախազություն առ այն, որ Նիկոլ Փաշինյանն է սպանել իրենց որդիներին։ Ծնողները հիմք են ընդունել Նիկոլ Փաշինյանի Ազգային ժողովում հնչեցրած հայտարարությունը՝ «Կարող էինք կանխել պատերազմը, որի արդյունքում կունենայինք նույն վիճակը՝ իհարկե, առանց զոհերի» հայտարարությունը։

ՀՀ գլխավոր դատախազությունը ներկայացված հանցագործության մասին հաղորդումն ուղարկել է Հակակոռուպցիոն կոմիտե՝ Մովսես Հակոբյանի հայտարարությունների հիման վրա հարուցված քրեական գործի շրջանակներում քննության առարկա դարձնելու համար, ինչի հետ համաձայն չեն տուժողները։

Նրանք պահանջում են հաղորդումն առանձին քննության առարկա դարձնել և անհապաղ հարուցել քրեական գործ և, ըստ այդ, դատարան բողոք են ներկայացրել՝ դատախազության անգործության դեմ։

Նրանք դատական կարգով պահանջում են քրեական գործ հարուցել Նիկոլ Փաշինյանի դեմ։

Թեև դատարան բողոքը ներկայացվել է մայիսին, սակայն առ այս պահը այն չի քննվել, տեղի է ունեցել մեկ նիստ, որը հետաձգվել է։

Տուժողների իրավահաջորդների ներկայացուցիչ Լիպարիտ Սիմոնյանը «Փաստինֆո»-ի հետ զրույցում հայտնեց, որ այս ամիսների ընթացքում դատական նիստ չի նշանակվել, փաստաբանը փորձել է կապ հաստատել դատարանի աշխատակազմի հետ, միշտ ասում են՝ դատավորն արձակուրդում է։

«Շատ զարմանալի է՝ 3-4 ամիս մշտապես արձակուրդում է մարդը»,- նշեց Սիմոնյանը՝ հավելելով, որ միտում է տեսնում՝ գործի քննության ձգձգման։

Փաստաբանը դա պայմանավորում է այն հանգամանքով, որ Դավիթ Արղամանյանը նախկինում եղել է «ՔՊ» կուսակցության իրավաբան, երևի այդ պատճառով չի ցանկանում քննել գործը, այդ հիմքով պատրաստվում են ինքնաբացարկի միջնորդություն ներկայացնել, որը պետք է քննվի դատական նիստում։

Հեղինակ՝ Իզաբել Սահակյան

Աղբյուր` Փաստինֆո