Փաստ ինֆո

Իրականում շատ ծանր տեսարան էր, երբ դեռ տասը օր էլ չի անցել, որ թուրք-ադրբեջանական խուժանը գնդակահարել է մեր տղաներին, հիմա մեր երկրի բարձրաստիճան պաշտոնյաները նրանց հետ մի սեղանի շուրջ բան են քննարկում: Մենք ունենք մի իրավիճակ, երբ իշխանության ոչ ադեկվատ քայլերը բերում են իրավիճակների, որոնք անմիջապես սպառնում են Հայաստանի և Արցախի բնակչության ֆիզիկական գոյությանը: «Փաստինֆո»-ի հետ զրույցում ասել է ԱԺ նախկին պատգամավոր, ԲՀԿ քաղխորհրդի անդամ Արման Աբովյանը՝ անդրադառնալով երեկ Պրահայում կայացած Փաշինյան-Ալիև-Էրդողան հանիպումներին:

ՀՀ վարչապետի և Ադրբեջանի նախագահի հետ՝ Ֆրանսիայի Էմանուել Մակրոնիու Եվրոպական խորհրդի նախագահ Շառլ Միշելի հետ հանդիպումից հետո ՀՀ կառավարությունը հայտարարություն տարածեց, որ Հայաստանն ու Ադրբեջանը հաստատել են իրենց հանձնառությունը ՄԱԿ-ի կանոնադրությանը և 1991թ. Ալմա-Աթայի Հռչակագրին, որոնց միջոցով երկու կողմերն էլ ճանաչում են միմյանց տարածքային ամբողջականությունն ու ինքնիշխանությունը: Սա հիմք կհանդիսանա սահմանազատման հարցերով հանձնաժողովների աշխատանքների համար: Նաև հայտարարվեց, որ Հայաստանն իր համաձայնությունն է հայտնել՝ խրախուսելու ԵՄ քաղաքացիական առաքելությունը Ադրբեջանի հետ սահմանի երկայնքով:

Արման Աբովյանը նախ արձանագրում է, որ հայտարարության մեջ ոչ մի խոսք չկա գերիների և արցախցիների մասին, ինչը ցույց է տալիս, որ Ադրբեջանը իր առջև դրված նվազագույն խնդիրը կատարել է՝ կորզելով կիսաիրավական մի հենք, որով Հայաստանը, փաստացի, հրաժարվում է Արցախից և թողնում է արցախահայությանը թուրք-ադրբեջանական տանդեմի քմահաճույքներին.

«Մեր իշխանությունները կարծում են, որ, հանձնելով Արցախի հարցը Ադրբեջանի իրավական տիրույթ, իրենք փոխարենը կստանան անվտանգություն Հայաստանի համար, բայց սա սուտ է , իրենք արդեն ստացել են պատերազմ, որքան շարժվեն թուրք-ադրբեջանական ոհմակի կանոններով, այնքան վտանգները մեծանալու են Արցախի և Հայաստանի համար: «Խաղաղություն» բղավելով՝ մենք պատերազմը բերեցինք Ջերմուկ և Վարդենիս, իսկ վաղն էլ արդեն հնարավոր է բերեն Երևան և Գյումրի»,-ասաց Աբովյանը :
Ինչ վերաբերում է Ադրբեջանի հետ սահմանի երկայնքով ԵՄ քաղաքացիական առաքելություն իրականացնոլու որոշմանը, Արման Աբովյանի դիտարկմամբ, սա ենթադրում է, որ ԵՄ-ն պետք է դիտորդական առաքելություն տեղակայի հայ-ադրբեջանական և արձանագրի՝ ո՞ր հատվածներում են ադրբեջանցիները ներխուժել ՀՀ սուվերեն տարածք և ո՞ր հատվածում են կրակել.

«Դիտորդական առաքելությունը պետք է գա ու ֆիքսի, որ մենք չենք կրակում Ադրբեջանի վրա, իրենք են կրակում, բայց սա հիմարություն է: Եթե ինչ որ մեկը հույսեր ունի, որ Եվրոպան, ԱՄՆ-ն կամ աշխարհաքաղաքական այլ կենտրոնները կգան ու մեր փոխարեն կպաշտպանեն մեզ, կդատապարտեն Ադրբեջանի ագրեսիան, չարաչար սխալվում են, ընդամենը մի քանի օր առաջ՝ հայ գերիների գնդակահարության տեսանյութը ստանալուց հետո, Եվրոպան Ադրբեջանի հետ գազային մատակարարումների պայմանագրր կնքեց»,-ասաց Աբովյանը:

Ըստ զրուցակցի՝ սա աշխարհաքաղաքական կենտրոնների շահերի բախման ներքո նաև պետք է դիտարկել՝ Արևմուտքն անում է ամեն ինչ, որպեսզի մաքսիմալ նվազեցնի Ռուսաստանի ազդեցությունը մեր տարածաշրջանում և փոխարենը իր ազդեցությունը մեծացնի:
Իսկ թե ինչպե՞ս կվերաբեվեն այս որոշմանը մեր տարածաշրջանային դերակատարները՝ ՌԴ-ն և Իրանը՝ Արման Աբովյանն արձագանքեց՝ շատ վատ.

«Ստացվում է՝իրենց տարածաշրջանից դուրս են մղում՝ Հայաստանի ձեռքերով: ՀՀ իշխանությունները ստեղծել են մի իրավիճակ, երբ աշխարհաքաղաքական կենտրոնների շահերի բախման կենտրոնում է հայտնվել ՀՀ-ն և, փոխարենը բոլոր կողմերի համար համագործակցության հարթակ, մենք որոշեցինք, որ պետք էմտնենք աշխարհաքաղաքական մեծերի կռվի մեջ »,-ասաց Արման Աբովյանը:

Աղբյուր` Փաստինֆո