Փաստ ինֆո

Սեպտեմբերի 13-ին ՀՀ ինքնիշխան տարածքի նկատմամբ ադրբեջանական ագրեսիայի ընթացքում ադրբեջանցիների կողմից հափշտակություններ կատարելու դեպքերին քրեաիրավական գնահատական չի տրվել։

Հիշեցնենք, որ սեպտեմբերի 12-ի լույս 13-ի գիշերը՝ ժամը 00:05-ից, Ադրբեջանի ԶՈՒ ստորաբաժանումները Գեղարքունիքի, Սյունիքի եւ Վայոց Ձորի մարզերի ուղղությամբ հրետանային միջոցներից, խոշոր տրամաչափի հրաձգային զինատեսակներից սկսել են ինտենսիվ կրակ վարել հայկական դիրքերի ուղղությամբ՝ կիրառելով նաև ԱԹՍ-ներ, ականանետային-հրթիռահրետանային միջոցներ։

Գորիսի փոխքաղաքապետ Իրինա Յոլյանը դեռևս սեպտեմբերի 20-ին «Փաստինֆո»-ի հետ զրույցում պատմել էր, որ թշնամիները Գորիսի տարբեր բնակավայրերից նաև քաղաքացիներին պատկանող ձիեր ու մեքենաներ են հափշտակել, Իշխանասարից՝ 6060 մանր եղջերավոր անասուն և հովիվների 8 տնակ.

«Մեր հովիվները հիմնականում Իշխանասարի հատվածում են ոչխարներին արածացնում, երբ պատերազմական իրավիճակ է սկսվել, թշնամին ոչխարները տարել է, հովիվները տնակներում էին գիշերում, հիմա չկան դրանք»,-հայտնել էր Յոլյանը:

Դեպքից օրեր անց՝ սեպտեմբերի 26-ին «Փաստինֆո»-ն գրավոր հարցմամբ դիմել էր ՀՀ գլխավոր դատախազությանը՝ արձանագրելով, որ կան տեղեկություններ, որ ՀՀ ինքնիշխան տարածքի նկատմամբ իրականացված ռազմական ագրեսիայի ժամանակ ադրբեջանական զինուժի կողմից արձանագրվել են նաև հափշտակության դեպքեր, ուստի խնդրել էինք հայտնել, թե քանի նման դեպքի առթիվ է նախաձեռնվել քրեական վարույթ, մինչդեռ, ինչպես պարզվեց՝ որևէ վարույթ էլ չէր նախաձեռնվել։

ՀՀ գլխավոր դատախազությունից «Փաստինֆո»-ի գրավոր հարցմանն ի պատասխան հայտնել էին, որ ադրբեջանական զինուժի կողմից ռազմական ագրեսիայի ժամանակ հափշտակության դեպքեր կատարելու վերաբերյալ տվյալներ չեն ստացվել։

Հատկանշական է, որ խնդրի մասին բարձրաձայնել է նաև ԱԺ «ՔՊ»-ական պատգամավոր Արմեն Խաչատրյանը՝ հայտնելով, որ միայն Գորիսի Խնձորեսկ գյուղում մի քանի տասնյակ մեր հայրենակիցներ կորցրել են իրենց խոշոր և մանր անասունները, որոնք հափշտակվել են ադրբեջանցիների կողմից, իսկ մի շարք ընտանիքների համար անասնապահությունն ընտանիքի միակ եկամտի աղբյուրն է։ Արմեն Խաչատրյանը կառավարության հետ հարցուպատասխանի ընթացքւոմ հետաքրքրվել էր՝ ինչպիսի՞ միջոցառումներ են իրականացվում այդ գույքային վնասները փոխհատուցելու ուղղությամբ, ինչին պատասխանելով ՀՀ փոխվարչապետ Համբարձում Մաթևոսյանը նշել էր, որ միանշանակ կաջակցեն, եթե պարզվի, որ քաղաքացիները տուժել են ագրեսիայի հետևանքով։

Իսկ թե ինչպե՞ս պետք է պարզվի՝ ադրբեջանական ագրեսիայի հետևանքով են տուժել բնակիչները, թե ոչ, պետք է փոխհատուցում տրվի, թե ոչ՝ այն պայմաններում, երբ նունիսկ քրեական վարույթ չի նախաձեռնվել՝ հայտնի չէ։

Աղբյուր` Փաստինֆո