Փաստ ինֆո

«Այն, որ Հայաստանի դե ֆակտո վարչապետը բառացիորեն կրկնում է ադրբեջանական թեզերը, որոնք իրականության հետ ոչ մի կապ չունեն, շատ վատ հետեւանքներ կարող է ունենալ Հայաստանի համար։ Հայր Ալիեւը մեկ անգամ հայտարարել է, որ ինքը հատուկ է ամեն ինչ այնպես արել, որ Արցախում ազգաբնակչության բալանսը փոխվի եւ ադրբեջանցիները ավելի շատ լինեն, իսկ հայերը՝ քիչ ու մենք մոտ 20 տարի է՝ այդ հայտարարությունն օգտագործում ենք, եւ ճիշտ ենք անում, հիմա պատկերացրեք, թե որքան քարոզչական ու քաղաքական նյութ են ստանում Ադրբեջանի եւ Թուրքիայի ղեկավարները Նիկոլ Փաշինյանի ելույթներից»,- «Փաստինֆո»-ի հետ զրույցում այս մասին ասաց տարածաշրջանային հարցերով փորձագետ, «Հայկական նախագծի» անդամ Կարեն Իգիթյանը՝ անդրադառնալով Նիկոլ Փաշինյանի՝ խորհրդարանում արած հայտարարութուններին, որոնք ամբողջությամբ համեմված էին ադրբեջանականան թեզերով եւ հակասում էին ԼՂ հիմնախնդրի բանակցային ամբողջ պատմությանը եւ Հայաստանի Հանրապետության դիրքորոշումներին։

Իգիթյանը հիշեցրեց եւս մի օրինակ, որը հայկական կողմը օգտագործել է եւ որը իրականում արտահայտել է այն բանակցային իրականությունը, որը Փաշինյանը կեղծում է։

«Նույն կերպ մենք օգտագործում ենք Իլհամ Ալիեւի հայտարարությունը, որ փակ դռների հետեւում իրեն ստիպում են ճանաչել Արցախի անկախությունը, որը նա երկու անգամ է հայտարարել, եւ դա հաստատում է այն իրականությունը, որը եղել է բանակցությունների ժամանակ։ Փաշինյանի նման ելույթներից հետո վաղը նրանք հայտարարելու են , թե դուք երբեք Արցախի անկախությանը չէիք կարող հասնել եւ դա ասում է ձեր վարչապետը, ասելու են՝ դուք ճանաչել եք Արցախը Ադրբեջանի կազմում դեռ 1998-99թթ-ին կամ մեկ այլ տարեթվի, որոնց մասին Փաշինյանը հայտարարում է, եւ նրանք կրկին հղում են անելու Հայաստանի վարչապետին, որին Հայաստանի ժողովուրդն է ընտրել»։
Սա, մասնագետի խոսքով, շատ մեծ քարոզչական զենք է Ադրբեջանի համար։

Իգիթյանը հասկանալի է համարում այն, որ Փաշինյանը շարունակում է իրականությունը կեղծել եւ ամեն ինչ բարդել այսպես ասած, նախկինների վրա։ «Նա պարտրաստվում է ստորագրել նոր կապիտուլյացիոն փաստաթուղթ, որով հանձնելու է Արցախը եւ զիջումներ է անելու նաեւ Հայաստանի կողմից՝ միջանցքի կամ այլ տեսքով, ուստի փորձում է այդ ամենի պատասխանատվությունը դնել նախկին իշխանությունների վրա։ Հայաստանը, իրականում , մշտապես ճանաչել է Ադրբեջանի տարածքային ամբողջականությունը, բայց եւ մշտապես նշել է, որ Արցախի հարցը որեւէ կապ չունի տարածքային ամբողջականության հետ, որ այն ազգերի ինքնորոշման խնդիր է, տարածքային հարց չէ»,-շեշտեց Կարեն Իգիթյանը։

Անդրադառնալով Ադրբեջանի եւ Թուրքիայի ղեկավարների հետ Պրահայում նախատեսված Փաշինյանի հանդիպումներին, մասնագետն ասաց՝ Փաշինյանը ներկայացրեց այն բանակցային դիրքը, որը ինքն ունենալու է ոչ միայն Պրահայում, այլեւ այլ հարթակներում։ «Դա ամբողջությամբ կապիտուլյացիոն, Հայաստանի եւ հայության շահերի դեմ դիրքորոշում է»։

Կարեն Իգիթյանը շեշտում է՝ Փաշինյանի հայտարարութունները մնալու են պատմության մեջ, դրանք պետք է շտկել այնպես , որ դրանց մասին հիշվի զուտ որպես պատմական փաստ։

«Տեսեք, հիմա շատ քչերն են հիշում Սեւրի պայմանագիրը, հիշում են որպես պատմական փաստ եւ առաջ անցնում, որովհետեւ Թուրքիան հաղթահարել է Սեւրի պայմանագրի հետեւանքները, բացի այս պայմանագիրը, եղել են բազմաթիվ ելույթներ, զեկույցներ, հայտարարություններ այն մասին, թե ինչ պետք է անի Թուրքիան, բայց քեմալականները, այդ ամենի դեմ պայքարելով, կարողացան շրջել այդ էջը։ Հայաստանը, ազգային իշխանություն ձեւավորելու դեպքում, կարող է այդ էջը թերթել։ Դժվար է լինելու, որովհետեւ Փաշինյանը Ադրբեջանի հետագա քայլերի համար շատ մեծ հիմքեր է ստեղծել, բայց դա հնարավոր է»,-եզրափակեց փորձագետը։

Աղբյուր` Փաստինֆո