Փաստ ինֆո

Շատ ողջունելի էր Արցախի և Հայաստանի նախկին նախագահների՝ հանդիպելու պատրաստակամությունը: Սա վկայում է, որ, իսկապես, այնքան վտանգավոր վիճակ է, որ բոլորն էլ պատասխանատվությամբ էին մոտենում հարցին: Մեծ խնդիր առաջացավ Լևոն Տեր-Պետրոսյանի հարցազրույցից և վերջերս արած հայտարարությունից հետո, որ իշխանություն և ընդդիմություն երկխոսության հարթակը դադարել է գոյություն ունենալ: Այս մասին լրագրողների հետ զրույցում ասել է «Հայաստան» խմբակցության պատգամավոր Գեղամ Մանուկյանը:

Ընդդիմադիր պատգամավորը հայտարարեց, որ ակնկալելի է, որ հանդիպումների այդ ձևաչափը կշարունակվի՝ թեկուզ առանց Տեր-Պետրոսյանի, քանի որ վերջինիս հայտարարությունից հստակ չէր՝ եթե լինի հանդիպում, կմասնացի՞, թե՝ ոչ.

«Ի սկզբանե իշխանության շուրջ կոնսոլիդացիայի պահանջով հայտարարություն չի եղել, այլ իրավիճակից ելքեր գտնելու շուրջ, իսկ երբ Տեր-Պետրոսյանը առաջարկում էր՝ կոնսոլիդացվել իշխանության շուրջ, մենք հստակ ասում էինք՝ չենք կարող գնալ կոնսոլիդացվել ու Փաշինյանի կապիտուլացիոն քաղաքականությանը աջակից դառնալ: Տեր-Պետրոսյանը ամիսներ առաջ ասում էր՝ Փաշինյանը պաթոլոգիկ ստախոս է, ստախոսի հետ ի՞նչ կարելի է քննարկել, ստախոսը կարո՞ղ է ամբողջ ճշմարտությունն ասել: Այս իշխանության շուրջ կոնսոլիդացիան ուղղակի Նիկոլին փրկելու ծրագիր էր, որն առաջարկում էր Տեր-Պետրոսյանը, ինչն էլ տապալվեց»,-ասաց Մանուկյանը:

Աղբյուր` Փաստինֆո