Փաստ ինֆո

Արցախը երբեք չի խուսափել Ադրբեջանի հետ բանակցություններից, հակառակը, մենք միշտ ասել ենք, որ պետք է նստել բանակցությունների, բայց պետք է վերականգնվի բանակցային լիարժեք ձեւաչափը։

«Փաստինֆո»-ի հետ զրույցում այս մասին ասաց Արցախի Հանրապետության ԱԳ նախարար Դավիթ Բաբայանը՝ անդրադառնալով Ստեփանակերտ- Բաքու հնարավոր բանակցություններին, ինչի մասին նախ ՀՀ վարչապետ Նիկոլ Փաշինյանն էր խոսել՝ հայտարարելով, թե Հայաստանը պատրաստ է Ադրբեջանի տարածքային ամբողջականությունն ընդունել, եւ Արցախ-Ադրբեջան գործընթացը կարող է առանձնացվել։

Դավիթ Բաբայանը հղում արեց 1994թ Բուդապեշտում կայացած ԵԱՀԿ հիմնադիր գագաթնաժողովին, դրան հաջորդած մի շարք փաստաթղթերի, որոնցում Արցախի կարգավիճակը, որպես հակամարտության կողմի, ֆիքսված է։ «Ըստ այդմ էլ, երբ ասում ենք պետք է վերականգնել լիարժեք ձեւաչափը , մենք դա նկատի ունենք»,-շեշտեց Դավիթ Բաբայանը՝ հավելելով, որ Արցախը 1996-1997 թվականներին է բանակցային գործընթացի հանդիպումներից դուրս մնացել, բայց սրա հետ մեկտեղ, ԵԱՀԿ ՄԽ համանախագահող երկրները, ամեն անգամ տարածաշրջան այցելելիս եղել են Արցախում եւ Ստեփանակերտին տեղեկացրել գործընթացի մասին։

«80-ից ավելի այց է տեղի ունեցել»,-նկատեց Բաբայանը՝ շարունակելով․«Ադրբեջանի հետ բանակցություն կարող է լինել միայն միջազգայնորեն ընդունված ձեւաչափի ներքո, հակառակ դեպքում Ադրբեջանը դա կարող է ներկայացնել որպես քննարկում, ասենք, Ադրբեջանի անջատողականների հետ, ինչը մեզ համար անընդունելի է»։

Հիշեցնենք, Փաշինյանը հայտարարել էր․ «Մենք կարծում ենք նաև, որ, այո՛, Հայստանը և Ադրբեջանը կարող են փոխադարձաբար ճաաչել և պիտի ճանաչեն միմյանց տարածքային ամբողջականությունը , իսկ Ղարաբաղյան հարցի քննարկման հիմնական շահառուն պետք է լինի ԼՂ ժողովուրդը՝ իր ընտրված ներկայացուցիչների միջոցով։ Մեր կարծիքը ի սկզբանե՝ 2018-ից եղել է այն, որ ԼՂ -ն պետք է լինի Ղարաբաղի հարցով հիմնական բանակցողը և շահառուն, և մենք շարունակում ենք այդպես մտածել»։

Այս հայտարարությանը հաջորդել էր Հայաստանի, Ադրբեջանի ԱԳ նախարարների հանդիպումը Ժնեւում՝ ԱՄՆ պետքարտուղար Բլինքենի միջնորդությամբ, ապա հեռախոսազրույցը, որտեղ ի թիվս այլ հարցերի, նշվում էր, թե կողմերը քննարկել են Ստեփանակերտ-Բաքու քննարկումների մեխանիզմները։ Իսկ սրան էլ հաջորդել էր Իլհամ Ալիեւի հայտարարությունն այն մասին , թե չի պատրաստվում որևէ մեկի հետ քննարկել Արցախի հարցը, որովհետև, ըստ Ալիևի, Արցախի բնակիչները Ադրբեջանի քաղաքացիներ են: Խաղաղության պայմանագրի բանակցություններին անդրադառնալով՝ Ալիևը հույս է հայտնել, որ համաձայնագրի նախապատրաստումը երկար չի տևի:

Անդրադառնալով Նիկոլ Փաշինյանի իշխանության որդեգրած քաղաքականությանը, Արցախի ԱԳ նախարար ասաց՝ չի ուզում միջամտել Հայաստանի ներքին քաղաքականությանը, բայց եւ շեշտեց՝ Արցախը սրբություն է ամբողջ հայության համար եւ հիմա արցախակենտրոնություն պետք է լինի․«Արցախի ապագայից կախված է ամբողջ հայության ճակատագիրը,առանց Արցախի չկա Հայաստան, առանց Հայաստանի, չկա Սփյուռք , դրա համար մեր ջանքերը պետք է ուղղենք մեկ ուղղությամբ։ Ադրբեջանի կազմում չի լինելու Արցախ, մեզ պարզապես կոտորելու են»։

Ճշտող հարցին, արդյո՞ք հիմա չի ստացվել այնպես, որ ՀՀ գործող իշխանությունը ինքնակամ ձեռքերը լվացել է Արցախից, Բաբայանն ասաց․ «Չեմ պատկերացնում, որ կարող է ինչ-որ ողջամիտ նորմալ հայ, հատկապես ղեկավարություն, հրաժարվի Արցախից, որովհետեւ դա կլինի հրաժարում մեր ինքնությունից։ Դրանից հետո հայ ժողովուրդը իրեն բարոյական իրավունք չի կարող վերապահել որեւէ բանի՝ մասին խոսել, հայ դատի, Ցեղասպանության, պատմական Հայաստանի, մեր ինքնության։ Մենք այդ հարցին պետք է սկզբունքային մոտենանք»։

Աղբյուր` Փաստինֆո