Փաստ ինֆո

Սեպտեմբերի 23-ին 44 կողմ, 0 դեմ,2 ձեռնպահ ձայներով Երևանի փոխքաղաքապետ ընտրված Տիգրան Ավինյանն ըստ քաղաքապետարանի տարածած տեղեկատվության, արդեն ծանոթանում և անմիջապես էլ իր համակարգման ոլորտներում գործնական հանձնարարականներ է տալիս։ Իսկ իր համակարգման ներքո են գտնվում երեք կարևոր բնագծեր՝ շինարարության և բարեկարգման, բնապահպանության և մշակույթի։

Եվ քանի որ քաղպայմանագրի քաղաքապետի թեկնածուն է Ավինյանը, արդեն իսկ փոխքաղաքապետի պաշտոնը ստանձնելով անմիջապես լծվել է իր համակարգման ոլորտներում առկա խնդիրների լուծմանը։

Բնականաբար, շինբարեկարգման ոլորտը Երևանում կարևորներից և անմխիթար վիճակում գտնվողներից է։ Չորրորդ կարգի վթարայնությամբ բազմաթիվ շենքեր կան, որոնց բնակիչների կյանքը մազից է կախված։ Եվ բոլորովին պատահական չէ, որ Ավինյանն իբրև փոխքաղաքապետ իր առաջին շրջայցը սկսում է Աջափնյակ համայնքից, ուր սովետական 60-ականներին կառուցված «խրուշչովկաներին» վերապահված կես դարն անցել է, սակայն դեռ նման շենքեր կան և այդ շենքերում բնակիչներ են ապրում։

Ավինյանը վարչական շրջաններ աշխատանքային այցերի մեկնարկը տալիս է հենց վթարային շենքերից, «առաջնահերթը բնակիչների անվտանգությունն է»՝ տրամաբանությամբ։ Որն, ի դեպ, ապագա քաղաքապետի համար կարող է նաև կարգախոսի արժեք ունենալ։ Իսկ եթե սրան գումարվում է այն, որ մարդը նոր է նշանակվել և արդեն գործի մեջ մտած է, ձեռնունայն չի այցելում շենք առ շենք, այլ՝ ամբողջական փաթեթով, ներդրման պատրաստ՝ կոնկրետ կառուցապատողների հետ, որոնք շենքերի վիճակին ծանոթանում են տեղում լինելով, բնակիչների հետ զրուցելով, այն էլ՝ փոխքաղաքապետի ներկայացմամբ, թե՝ համայնք-մասնավոր համագործակցությամբ առկա առաջնահերթ խնդիրներին լուծում կտրվի, ապա հասկանալի կդառնա, որ Տիգրան Ավինյանն իր համակարգման ներքո գտնվող կենսական այս ոլորտի միջոցով արդեն իսկ սկսել է քարոզարշավը։

Եթե ձեզ մոտ էլ կա այնպիսի տպավորություն, որ վարչական շրջաններ աշխատանքային այցերի մեկնարկը ինչ-որ առումով նաև ավագանու ընտրությունների նախընտրական այցեր է հիշեցնում, հանգիստ եղեք, իշխանությունները կասեն, թե ձեր մտածածը չէ, փոխքաղաքապետն ուղղակի իր գործն է անում։ Մանավանդ, մի ամբողջ տարի կա մինչ ընտրությունները։ Բայց, այստեղ կա մեծ բայց՝ նա արդեն հայտարարել է, որ ինքն է լինելու ՔՊ-ի՝ Երեւանի քաղաքապետի թեկնածուն։ Ընդ որում՝ այդ մասին նա հայտարարել է ոչ ավել, ոչ պակաս Սուրմալուի փլատակների վրա։

Ավինյանի այս առաջին շրջայցից էլ պարզորոշ է, որ մեկ տարի անց քպ-ի կողմից առաջադրված քաղաքապետը մյուս կուսակցությունների թեկնածուների հետ հավասար պայմաններում չի լինելու, քանի որ նա այսօրվանից է սկսել երևանցիների կոմունալ-կենցաղային, բնակարանային, հնարավոր է նաև՝ բնապահպանական և մշակութային /բիզնեսի և մշակույթի ավելի լավ համադրություն, քան՝ Հայաստանի պետական հետաքրքրությունների ֆոնդի կողմից 48 տոկոս մասնակցությամբ համաֆինանսավորվող՝ «Hard Rock Cafe»-ն է, որի բացումը Երևանում 2022-ին երկրորդ կիսամյակում է նախատեսվում՝ Պուշկինի փողոցում, հազիվ թե լինի/ պայմանների բարելավումն ու բարեկարգումը։

Ամեն դեպքում, կոնկրետ հարց՝ ներկա քաղաքապետն ինչու՞ չէր շինբարեկարգման, վթարայինների վերականգնման կամ ներդրումային նոր ծրագրերի միջոցով՝ այս բնագավառի առկա խնդիրների լուծմամբ զբաղվում։ Ի վերջո, ահագին ժամանակ է՝ ստանձնել է այդ պաշտոնը, սակայն, շոշափելի ոչինչ չի արվել, քաղաքն էլ այնքան հակահիգիենիկ վիճակում է, որ մնացած ոլորտներից բնավ սպասելիք չկար․․․

Իսկ միգուցե իշխանությունը միտումնավոր քաղաքը հասցրել է նման վիճակի, որ ապագա թեկնածուն, դիրքն օգտագործելով, մասամբ կարգավորի ու փորձի այդպես միավորներ հավաքել։ Հո պատահական չէր, որ Ավինյանը փոխվարչապետությունից բիզնես ոլորտ գնաց, հետո՝ Երևանի քաղաքապետարան...

Աղբյուր` Փաստինֆո