Փաստ ինֆո

«Նիկոլ Փաշինյանը տեղեկատվության գիտակցված արտահոսք է կազմակերպում։ Սա այն է, երբ հիմնվելով այսպես կոչված հավաստի աղբյուրների վրա, տալիս ես այն տեղեկությունը, որը ինքդ ես նպատակահարմար գտնում, ինչը միշտ չէ, որ հարյուր տոկոսանոց ճշմարտացի կարող է լինել։ Տվյալ դեպքում, հավանականությունը մեծ է, որ ինֆորմացիան կարող է համապատասխանել իրականությանը»,- «Փաստինֆո»-ի հետ զրույցում նման կարծիք հայտնեց քաղտեղխնոլոգ Արմեն Բադալյանը՝ նշելով, որ նման արտահոսքերի պատճառները տարբեր կարող են լինել՝ սկսած հասարակական կարծիքի ստուգումից մինչեւ տարբեր ուժային կենտրոններին՝ մյուսի ծրագրերի տեղեկացում։

«Նպատակներից մեկը կարող է լինել, օրինակ, հասարակական կարծիքի ստուգումը, թե հասարակությունը որքան բուռն կարձագանքի, օրինակ, ռուսական ծրագրին, արեւմտյանին ինչպես կարձագանքի։ Բայց սրա հետ մեկտեղ, պետք է նշել, որ հասարակական կարծիքն իշխանության համար որեւէ նշանակություն չունի, նրա համար նշանակություն ունի հասարակության փիար կարծիքը, այսինքն, հասարակությունը, օրինակ, կարող է քննարկումներում գրել , որ այս կամ այն ծրագիրը շատ վատն է, իսկ Փաշինյանը, օրինակ, կարող է փորձել դա վաճառել տվյալ ծրագրի հեղինակին, թե հասարակությունը դրան դեմ է, բայց միեւնույն ժամանակ, անհրաժեշտության դեպքում, հենց դա էլ իրականություն դարձնի։ Այսինքն, Փաշինյանին հարկավոր է հասարակության փիար դիրքորոշումը՝ ֆեյսբուքային, վիրտուալ դիրքորոշումը, որովհետեւ, անկախ կողմ եւ դեմ լինելուց, նա այն իրականություն կդարձնի, մինչդեռ այսպես, կարող է լավ առեւտրի առարկա դարձնել »,-ասում է Բադալյանը։

Հիշեցնենք, որ Նիկոլ Փաշինյանի ընտանեկան թերթի՝ «Հայկական Ժամանակ»-ի կայքը հերթական արտահոսքն է արել՝ հղում անելով «հավաստի աղբյուրին»։ «ՌԴ-ի գործողությունների իմաստը հետևյալն է՝ ցույց տալ Հայաստանի անվտանգային խոցելիությունը, որպեսզի վերջինս րոպե առաջ դիմի «Ռուսաստան-Բելառուս» միութենական պետության մաս դառնալու համար։ Այս տրամաբանությունը զարգացնելու քայլերը Ադրբեջանի ագրեսիվությունն է, ՀՀ-ում տեղակայված ռուսական զորքի իներտությունը, Ռուսաստանի քաղաքական իներտությունը և Հայաստանին զենքի մատակարարման պարտավորությունները չկատարելը»,-գրել է պարբերականը , նաեւ նշելով, որ Ռուսաստանին պետք է ԼՂ հարցի չլուծում, այսինքն, որ ԼՂ հարցը լինի չլուծված, որպես ազդեցության լծակ թե Հայաստանի, թե Ադրբեջանի վրա։ ՌԴ նախագահի մամուլի խոսնակ Դմիտրի Պեսկովը «անհեթեթություն» է որակում հրապարակումը, իսկ ՀՀ ԱԺ նախագահ Ալեն Սիմոյանն էլ ասել է, որ Ռուսաստանի Դաշնությունը չի ստիպում Հայաստանին Միութենական պետության մի մասը դառնալ․ «Նման խոսակցություն չկա և չի էլ կարող լինել, քանի որ Հայաստանի անկախությունն ու ինքնիշխանությունը քննարկման ենթակա չեն»։

Անդրադառնալով հարցին, թե արդյոք նման արտահոսքն ու նմանաբովանդակ տեղեկության հրապարակումը նաեւ ՌԴ-ի կողմից Հայաաստանին մատակարարվող սպառազինության վերաբերյալ իրարամերժ հայտարարությունները իշխանական ընտանիքին պատկանող թերթի միջոցով, հերթական հարվածը չէ հայ-ռուսական հարաբերություններին՝ Բադալյանն արձագանքեց՝ Փաշինյանի գործողությունները նմանեցնելով հայտնի խորհրդային մուլտֆիլմի հերոսին, որն ասում էր․ «Не будем называть кто, хотя это был слонёнок»։ Ապա քաղտեխնոլոգը ընդգծեց՝ Հայաստանի ամբողջ քաղաքական մթնոլորտն ու համակարգն է այսօր խաթարված եւ այդ մի դրվագը, ըստ Բադալյանի, շատ բան չէր փոխելու։

«Այստեղ մի խնդիր պետք է հասկանալ՝ արդյո՞ այդ ամենը նա իր ցանկությամբ է կատարում, թե արտաքին քաղաքական կենտրոնների համաձայնությամբ, որովհետեւ մոտենում է խաղաղության պայմանագրի ստորագրման ժամանակաշրջանը եւ չի բացառվում, որ քաղաքական խաղացողները իրենց համաձայնությունը տվել են, բայց եւ չի բացառվում , որ այդ համաձայնությունը չկա եւ նա ՌԴ-ի խաղաքարտերը բացում է Արեւմուտքի առաջ, իսկ Արեւմուտքինը՝ ՌԴ-ի»,-բացատրեց Բադալյանը՝ հավելելով, որ գործող իշխանությունը աշխատում է օրվա ժամկետով՝ այսօր էլ մնանք իշխանության, վաղը կտեսնենք, սկզբունքով, ուստի երկարաժամկետ սպառնալիքների հնարավորության մասին Փաշինյանը պարզապես չի մտածում, նրան հետաքրքրում է, թե այսօր ինչ կլինի։

«Հնարավոր է նաեւ նա հավելյալ դժգոհություն է փորձում առաջացնել ռուսական կողմից, որովհետեւ նպատակը Արեւմուտքի հետ հարաբերություններն առավել խորացնելն է եւ հաշվի առնելով, որ գործող իշխանությունները ինքնուրույն սուբյեկտ չեն, այլ օբյեկտ են, ինչի մասին վկայում է ԱԽՔ-ի այցը ԱՄՆ ԿՀՎ, հասկանում ես, որ այստեղ կարող է լինել արտաքին կողմի պատվերով խաղ՝ ձեռքի հետ էլ, օրվա իշխանություն պահելու խնդիր»,-հավելեց քաղտեխնոլոգը։

Տեղի ունեցող արտահոսքերը Բադալյանը չի կապում Փաշինյան-Էրդողան սպասվող հանդիպման հետ։ Մասնագետի խոսքով, առաջիկայում հնարավոր է, որ ներկայացվեն նաեւ ԵԱՀԿ ՄԽ մյուս երկրների ծրագրերը։

«Իհարկե, կարելի է երկար քննարկել, թե արդյո՞ք Ռուսաստանը կողմ էր, որ իր ծրագիրրը բացվեր, թե արդյո՞ք Արեւմուտքը կողմ կլինի, որ իր ծրագիրը բացվի, նման բազմաթիվ կետեր կարելի է գտնել, արդյո՞ք Իրանը համաձայն է դրանց հետ , արդյո՞ք չի դիմի ավելի ակտիվ գործողությունների, ինչպես դեսպանն էր նշել, բայց քանի որ գիտենք՝ այս իշխանությունն ինքնուրույն սուբյեկտ չէ եւ, լինելով արտաքին քաղաքական ուժային կենտրոնների թելադրանքով գործողություններ իրականացնող, պետք է արձանագրենք, որ այդ իշխանությունն ինքնին արդեն վտանգ է երկրի անվտանգության համար։ Կարծում եմ՝ սրանից ավելի բարձր վտանգ լինել չի կարող»,-եզրափակեց Արմեն Բադալյանը։

Աղբյուր` Փաստինֆո