Փաստ ինֆո

Ակնհայտ է, որ ՀԺ-ի հոդվածի «հավաստի աղբյուրը» Նիկոլ Փաշինյանն է, հանրությանը ադապտացնում են՝ թե Ադրբեջանն ինչ է ուզում, քանի որ իրենք հույս ունեն, թե սա Ադրբեջանի մաքսիմալիստական դիրքորոշումն է, և իրենք հետագայում կկարողանան ինչ-որ բան մեղմացնել, ամբողջությամբ չտալ այն, ինչ ուզում է Ադրբեջանը, և մարդկանց կասեն՝ մենք հերոսաբար դիմադրեցինք ու պայքարեցինք, որ ամեն ինչ չտանք, սա է հոդվածի ողջ նպատակը: «Փաստինֆո»-ի հետ զրույցում ասել է քաղտեխնոլոգ Վիգեն Հակոբյանը՝ անդրադառնալով Փաշինյանի ընտանեկան՝ «Հայկական ժամանակ» թերթի հրապարակած հոդվածին, որով, հղում անելով «հավաստի աղբյուրին», հրապարակվել էր Հայաստանին ուղղված 5 պահանջները։ Դրանք են՝ ԼՂ պաշտպանության բանակի լուծարում, ԼՂ ճանաչում Ադրբեջանի կազմում՝ առանց որեւէ` նույնիսկ ինքնավար կարգավիճակի, այսինքն՝ 0 կարգավիճակով: Միջանցք Հայաստանի տարածքով: Սահմանագծման եւ սահմանազատման գործընթաց 1919, 1920 թվականի քարտեզներով (առայժմ հայտնի չէ, թե կոնկրետ ո՞ր քարտեզների մասին է խոսքը):Անհետ կորած ադրբեջանցիների ճակատագրի պարզաբանում, հնարավոր է հետագայում Հայաստանին պատերազմական հանցագործությունների մեջ մեղադրելու միտումով:

Վիգեն Հակոբյանի խոսքով՝ սա PR տեխնոլոգիա է, որը կոչվում է «վակցինացիա», այսինքն՝ հասրակությանը, փոքր դոզաներով, ինչ-որ գործընթացի են նախապատրաստում.

«Իրենք վաղուց հասարակությանը ադապտացրելեն, որ մենք թույլ ենք, բարեկամ չունենք, ոչինչ չունենք, ոչ մեկը մեզ չի վաճառում, միայնակ ենք այս արևի տակ, որ բանակ չունենք, համոզում ենք մարդկանց, որ իմաստ չունի խոսել դիմադրության մասին, չենք կարող պայքարել: Հիմա էլ ցույց են տալիս Ադրբեջանի ցանկությունների մաքսիմալիստական փաթեթը, որպեսզի հետո, եթե հաջողվի առևտուր անելով մի բան փոխել, Փաշինյանի ողջ քարոզչամեքենան ասի՝ տեսաք, էս մարդն ամեն ինչ արեց, որ քիչ զիջենք, այն էլ այս պայմաններում, որ ոչ զենք ունենք, ոչ բանակ »,-ասաց քաղտեխնոլոգը:

Փորձագետի դիտարկմամբ՝ ՀԺ-ի հոդվածում, ըստ էության, որևէ նորություն չկար, քանի որ Նիկոլ Փաշինյանը Ադրբեջանի պահանջների մասին ԱԺ ամբիոնից, Կառավարության նիստերին և իր հարցազրույցներում բաց տեքստով բազմիցս ասել է.

«Ինքն ասում էր՝ փաստաթուղթ է ստորագրելու, եթե Ադրբեջանը ճանաչի 29.800ք/կմ տարածքը, երբ սրա մասին ասում է, նշանակում է, որ Արցախը տալու է: Հիմա սլիվ է արել ու իր «վիզիտկան» էլ վրան դրել է, որ իմանան՝ ով է հեղինակը: Կարող էր չէ՞ օրինակ «Perfect TV »-ով կամ «Ալեն նյուզ» -ով սա տարածել, բայց հատուկ դրել է մի ռեսուրսի մեջ, որ բոլորը հասկանան՝ իր հրապարակածն է։ Այսինքն՝ այս մարդն ուզել է, որ բոլորն իմանան՝ 100% հավաստի տեղեկություն է:

Իր ընտրազանգվածը, կարող է չի էլ հասկանում, ինչ է սա՝ կարող է ասի, թա իր կայքը չի, նախկինները կայքը ջարդել մտել են, բայց մի փոքր բանականություն ունեցող մարդը հասկանում է, որ, ըստ էության, Փաշինյանի արածը մի քայլանոց կոմբինացիա էր ընդամենը, նույնիսկ շախմատ էլ չէր, այլ՝ կարճ նարդի»,-ասաց Վիգեն Հակոբյանը:

Աղբյուր` Փաստինֆո