Փաստ ինֆո

Եթե Հայաստանը միջազգային հարթակներում չի խոսում արցախահայության ինքնորշման իրավունքից ու Արցախի անկախությունից, այս պարագայում, նորմալ է, որ ԱՄՆ-ն, Ռուսաստանը կամ այլ երկրներ չեն ճանաչելու Արցախի անկախությունը: «Փաստինֆո»-ի հետ զրույցում նման տեսակետ է հայտնել քաղաքագետ Լևոն Մնացականյանը՝ անդրադառնալով Նիկոլ Փաշինյանի՝ երեկ Հ1-ին տված հարցազրույցում հնչեցրած հայտարարությանն առ այն, որ որևէ երկիր պատրաստ չէ ճանաչել Արցախ անկախությունը:

Լևոն Մնացականյանը շեշտում է՝ այս դեպքում միջազգային հանրության արձագանքը ավելի քան նորմալ է, քանի որ եթե այնտեղ ապրում են հայեր, իսկ ՀՀ-ն չի ճանաչում Արցախի անկախությունը, ապա խոսել մեկ այլ երկրի մասին, որ կճանաչի, ավելորդ է.

«Հստակ է, որ եթե դու տեր չես քո ունեցածին, մյուսները չեն վերցնելու ուրիշից քո ունեցածը ու հետ տան քեզ, այսինքն՝ եթե ՀՀ-ն այլ դիրքորշում որդեգրած լիներ Արցախի անկախության հետ կապված, միգուցե, որոշ երկրներ ևս աջակցեին Արցախի ինքնորոշման ու ապրելու իրավունքը»,-ասաց Մնացականյանը:

Նրա արձանագրմամբ՝ այս պահին ամեն ինչ կախված է հայկական կողմի դիրքորոշումից.
«Եթե այսպիսի լուծում պետք է լիներ, ապա հենց պատերազմի ընթացում միանշանակ պետք էր ճանաչել Արցախի անկախությունը»,-հավելեց նա:

Քաղաքագետի կարծիքով՝ հնարավոր է՝ ինչ-որ ժամանակ հետո, երբ Ռուսաստանը փորձի որոշակի բաներ «քաղել» Ադրբեջանից, Արցախի հարցը կրկին դառնա օրակարգային, քանի որ պետք է լինելու ՌԴ-ին.

«Փաստացի Հայաստանը հրաժարվել է այդ հարցից, հետեւապես մնացած երկրների կողմից ճանաչումը իրատեսական չեմ համարում»,-ասաց զրուցակիցը:

Նիկոլ Փաշինյանը իր այդ հարցազրույցի ժամանակ նաև մեկ այլ կարևոր հայտարարություն էր արել՝ նշելով, որ Հայաստանի և Ադրբեջանի սահմանային ճանապարհների իրավական ընթացակարգերի շուրջ պետք է համաձայնություն տեղի ունենա, որի դեպքում սահմանին լինի մաքսային և անձնագրային հսկողություն, սակայն ադրբեջանական կողմը չի ցանկանում, որ իրենց քաղաքացին առնչվի Հայաստանի մաքսավորի և սահմանապահի հետ: Փաշինյանը, որպես խնդրի լուծում, տեսնում է, որ սահմանին, օրինակ, ռուս սահմանապահ կանգնի:

Մեր հարցին՝ արդյո՞ք սա իրատեսական է և խնդրի լուծում կարո՞ղ է լինել, քաղաքագետն ասաց՝ «Փաշինյանի կառավարման ժամանակահատվածում ոչինչ անիրատեսական չէ, ուստի նման սցենար հնաարվոր է, բայց դեռ վաղ է խոսել սրա մասին: Հարց է առաջանում՝ եթե ադրբեջանցիները չեն ցանկանում առերեսվել, մեր քաղաքացիները ինչու՞ պետք է առնչվեն ադրբեջանցի սահմանապահների հետ, սա նույնպես կարևոր է»,-ասաց Լևոն Մնացականյանը:
Ըստ նրա՝ այս առաջարկով երկու խնդիր է լուծում Փաշինյանը՝ Ռուսաստանին է հաճոյանում, տարածաշրջանում վերջինիս դիրքերն է ամրապնդում, նաև սահմանապահների հետ կապված հարցն է լուծում:

Փաշինյանը չէր բացառել, որ երկրների սահմանը հատելիս անձնագրերում կնիք չդրվի, այլ այս գործընթացն իրականացվի էլեկտրոնային կերպով արվի:

Լևոն Մնացականյանի խոսքով՝ այս ճանապարհները դիտարկվելու են որպես ազատ տնտեսական գոտիներն իրար կապող հանգույցներ, ուստի հնարավոր է, որ սահման հատելու իրավական գործընթացը էլեկտրոնային կերպով իրականացվի:

Աղբյուր` Փաստինֆո