Փաստ ինֆո

Նիկոլ Փաշինյանը բացում է խաղաքարտերը։ Մենք այսօր առնչվում ենք փաստի հետ, որ նա ձեռքերը լվանում է Արցախի խնդրից։ «Փաստինֆո»-ի հետ զրույցում այս մասին ասաց Արցախի Հանրապետության ԱԺ «Արդարություն» խմբակցության ղեկավար Դավիթ Գալստյանը՝ անդրադառնալով ՀՀ վարչապետ Նիկոլ Փաշինյանի՝ Հանրային ՀԸ-ին տված հարցազրույցում արած հայտարարությանը, թե ԼՂ խնդրի շահառուն ԼՂ ժողովուրդն է՝ իր ընտրված ներկայացուցիչների միջոցով, իսկ Հայաստանն ու Ադրբեջանը կարող են փոխադարձաբար ճանաչել միմյանց սահմանները։

«Երբ Նիկոլ Փաշինյանը խոսում էր Արցախի կարգավիճակի նշաձողն իջեցնելու մասին եւ մենք բարձրաձայնեցինք, որ նա իրավունք չունի այդ նշաձողն իջեցնելու, Հայաստանից տարբեր պատգամավորներ ելույթներ ունեցան, թե ճիշտ չենք հասկացել, նշաձողը չեն իջեցնում , այլ խոսում են այն մասին, թե, իբր, դա միջազգային հանրության պահանջն է: Փաշինյանի նախավերջին ելույթից հետո մենք մեր մտահոգությունները հայտնեցինք ու Արցախից պատվիրակություն եկավ Հայաստան, տարբեր պաշտոնյաներ, սկսած Ալեն Սիմոնյանից, ամենաբարձր մակարդակով վստահեցնում էին, որ իրենք իրենց ձեռքերը չեն լվանում Արցախից, այլ ընդհակառակը, պատրաստ են կանգնել Արցախի կողմից ընդունվող ցանկացած որոշման կողքին եւ կյանքի կոչել այն, սակայն տեսնում ենք, որ Փաշինյանը, գնալով ավելի շատ է բացում խաղաքարտերը ու փաստում, որ, այո՛, ինքը այսօր չի ցանկանում կամ հենց այդ նպատակով է իշխանություն ստանձնել, որ ձեռքերը լվանա Արցախից։ Մենք այսօր այդ փաստին ենք առնչվում»,- ասաց Արցախի Հանրապետության ԱԺ «Արդարություն» խմբակցության ղեկավարը։

Հիշեցնենք, որ ՀՀ վարչապետ Նիկոլ Փաշինյանն սեպտեմբերի 30-ին հայտարարել է, որ Հայաստանը պատրաստ է Ադրբեջանի հետ խաղաղության պայմանագրի, եթե Ադրբեջանը ճանաչի է մեր տարածքային ամբողջականությունը, որը հիմնված է 1991 թվականի դեկտեմբերի 18-ին ԱՊՀ ստեղծելու համաձայնագրի վրա։ Ըստ Փաշինյանի հայաստանը պատրաստ է այդ հիմքի վրա գնալ տարածքային ամբողջականության փոխադարձ ճանաչման։

«Մենք կարծում ենք, որ Հայաստանը և Ադրբեջանը կարող են փոխադարձաբար ճանաչել միմյանց տարածքային ամբողջականությունը, իսկ Ղարաբաղի քննարկման հիմնական շահառուն պետք է լինի Լեռնային Ղարաբաղի ժողովուրդը՝ իր ընտրված ներկայացուցիչների միջոցով»,-ասել է Փաշինյանը։

Դավիթ Գլաստյանը շեշտեց՝ Արցախն ինքնորոշվել էր, իսկ ՀՀ-ն Արցախի անվտանգության երաշխավորն էր, մինչդեռ Փաշինյանի ստորագրությամբ խաթարվել է այդ անվտանգային համակարգը։ «Փաշինյանի ստորագրությամբ հանձնվել է Արցախի 75 տոկոսը։ Դավաճանության է հավասար այն, որ նա նոյեմբերի 9-ի փաստաթղթից հետո հայտարարում է, որ Արցախն ինքնուրույն պետք է բանակցություններ վարի, այն դեպքում, երբ հենց նա է կործանել Արցախը, փլուզել է մինչեւ 2018-20թթ եղած մեր անվտանգային համակարգը»,-շեշտեց Դավիթ Գալստյանը։

Հարցին, արդյո՞ք այս քայլով Փաշինյանը Արցախի խնդրի պատասխանատվությունը չի փորձում թողնել Ռուսաստանի վրա, որի խախաղաղպահներն այսօր ապահովում են Արցախի անվտանգությունը եւ արդյո՞ք չի ստացվում, որ նա Արցախը ճանաչում է Ադրբեջանի մաս, Դավիթ Գալստյանն արձագանքեց․

«Առաջին անգամը չէ, որ նա է մեղավորներ է փնտրում եւ փորձում է պատասխանատվությունը տեղափոխել ուրիշների վրա, դա նրա ոճն է՝ բոլորը մեղավոր են, բացի իրենից, բայց այդ ամենի հեղինակն ու կյանքի կոչողը հենց Նիկոլ Փաշինյանն է, նա իր գործելաոճով Հայաստանում ապրող մեր հայրենակիցների մեջ վախի մթնոլորտ է սերմանում, գիտեք իր թեզերը, թե նախկիններն են մեղավոր կամ արցախցիները իրեն ձայն չեն տվել եւ այլն»։

Արցախի ԱԺ պատգամավորը հարցնում է Փաշինյանին՝ եթե արցախցիները քեզ ձայն չեն տվել եւ դու չէիր կարող խոսել Արցախի անունից, ինչու՞ հանձնեցիր Արցախի 75 տոկոսն ու 4 հազարից ավելի զոհ ավելացրեցիր Եռաբլուրում։ «Այս ամենի մեղավորը Նիկոլ Փաշինյանն է, նա փորձում է վախի մթնոլորտ սերմանել ժողովրդի մեջ եւ ներկայացնել իրավիճակն այնպես, թե ով էլ լիներ կաներ այն ամենը, ինչ ինքը անում է։ Դրանով նա փորձում է երկարաձգել իր իշխանությունը»։

Անդրադառնալով Փաշինյանի հայտարարությանը, թե ԼՂ խնդրի հետ կապված չկա մի նախադասություն, որի մասին Արցախի նախագահ Արայիկ Հարությունյանը տեղյակ չլինի, Դավիթ Գալստյանն ասաց․«Ես չեմ կարող Արայիկ Հարությունյանի փոխարեն պատասխանել, նա պետք է ասի՝ տեղյա՞կ է, թե ՝ ոչ, բայց մեր քաղաքական ուժը, ես՝ որպես արցախցի, հայտարարել ենք, որ հայրենիքի հանդեպ հավասարաչափ դավաճան է նա, ով կհանդուրժի Նիկոլ Փաշինյանի այդ դավադիր ծրագիրը »։ Եզրափակելով` Գալստյանը շեշտեց՝ Հայաստանն ու Արցախը միեւնույն անվտագասյին համակարգում են եւ առանց Արցախի չկա Հայաստան ու առանց Հայաստանի չկա Արցախ։ Ինչ վերաբերում է ռուսական գործոնին, այն, պատգամավորի խոսքով, օժանդակող է։

Աղբյուր` Փաստինֆո