Փաստ ինֆո

Արդեն մի քանի օր է, ինչ ԱԱԽ քարտուղարը ԱՄՆ-ում հանդիպումներ է ունենում տարբեր բարձրաստիճան պաշտոնյաների, տարբեր շրաջանակների հետ։ Հայկական կողմը նաեւ տեղեկատվություն տարածեց, որ Արմեն Գրիգորյանը մի շարք հանդիպումներ է ունեցել, որի ժամանակ քննարկվել է նաեւ Արցախի հարցը։

Միաժամանակ ռուսական լրատվամիջոցներով տարածվեց Ադրբեջանի նախագհ Ալիեւի օգնական Հիքմեթ Հաջիեւի հայտարարությունը, թե Սպիտակ տանը տեղի է ունեցել ՀՀ ԱԱԽ քարտուղար Արմեն Գրիգորյանի հետ հանդիպում, որի ընթացքում քննարկվել խաղաղության պայմանագրի, սահմանների դեմարկացիայի եւ դեմիլիտացիայի համաձայնագրի ստորագրումը։

Միջազգայնագետ Գրիգոր Բալասանյանի արձանագրմամբ՝ բավական հետաքրքիր զարգացումներ են սպասվում, հետաքրքիր հարցադրումներ են արվելու նաեւ հայկական կողմին՝ Արմեն Գրիգորյանի պատվիրակության վերադարձից հետո։

«Գիտենք, որ սահմանագծման եւ սահմանազատման հանձնաժողովը Հայաստանում համակարգում է եւ հայկական կողմից այդ հանձնաժողովի նախագահն է փոխվարչապետ Մհեր Գրիգորյանը։ Հետեւաբար Արմեն Գրիգորյանն ունե՞ր արդյոք համապատասխան հանձնառություն ու պարտավորություն՝ քննարկելու այս հարցը ադրբեջանական կողմի հետ։ Եվ առհասարակ ի՞նչ քարտեզով են առաջնորդվում հայ եւ ադրբեջանցի պատվիրակները՝ Սպիտակ տանը այս հարցի քննարկման ժամանակ։ Սրանք կարեւոր հարցեր եւ, որին պետք է մեծ ուշադրություն դարձնել եւ որի պատասխանը պետք է տան գործող իշխանությունները»,- «Փաստինֆո»-ի եթերում նշել է փորձագետը։

Նրա դիտարկմամբ՝ նոյեմբեր 9-ի արձանագրության մեջ հստակ նշվում էր, որ սահմանազատման եւ սահմանագծման նոր հարցերով հանձնաժողովը պետք է կատարի եւ առաջնորդվի բացառապես այն քարտեզներով, որոնք գտնվում է պաշտպանության նախարարության գլխավոր շտաբում։«Այս դեպքում հարց է առաջանում. եթե Սպիտակ տանը այս ուղղությամբ սկսվում է քննարկում ու այդ քննարկմանը չի մասնակցում ռուսական կողմը, այլ մասնակցում են հայկական ու ադրբեջանական կողղմերը՝ Միացյալ Նահանգների ներկայացուցչի հետ համատեղ, ապա նախ՝ ո՞ր քարտեզով է գծվելու այդ սահմանը եւ ո՞ր քարտեզն են հիմք համարելու»,- նշել է նա՝ ավելացնելով, որ հայկական կողմը պետք է օգտվի Ադրբեջանի այս սայթաքումի հնարավորությունից։

«Ինչպես գիտենք, Ադրբեջանի անկախության հռչակման սահմանադրության ակտի երկրորդ հոդվածում նշվում է, որ Ադրբեջանը հանդիսանում է Ադրբեջանի առաջին հանրապետության իրավահաջորդը եւ բոլոր այն պայմանագրերը, որոնք ստորագրվել են Խորհրդային Ադրբեջանի ժամանակ, այսինքն 1922-1991թթ., Ադրբեջանի համար ընդունելի չեն։

Հետեւաբար ինչպե՞ս կարող է Ադրբեջանը, իր կողմից ոչ ընդունելի, Ադրբեջանի երկրորդ հանրապետության տարածքային ամբողջականությունը եւ քարտեզները հիմք վերցնեն նոր սահմանագծման եւ սահմանազատման պայմանագիր ստորագրելու համար եւ ինչպե՞ս է սրան նայում Միացյալ Նահանգները։ Հայկական կողմի համար սա հիանալի հնարավորություն է օգտվել այս հանգամանքից ու նաեւ ԱՄՆ աջակցությամբ հասնել նրան, որ սեղանին պետք է դրվի Ադրբեջանի առաջին հանրապետության քարտեզը, որտեղ չի եղել Արցախը, Նախիջեւանը եւ անգամ Ադրբեջանի ներկայիս Ղազախի շրջանը»,- նշել է Գ.Բալասանյանը։

Միաժամանակ նա աձանագրել է, որ շատ վտանգավոր է նման հարցեր քննարկել տարբեր երկրների մայրաքաղաքներում, որոնք իրենց ձեռքի տակ չունեն քարտեզներ, որոնք իրավասու չեն այս հարցերը քննարկել եւ ավելին՝ քննարկել մի հարց, որի քննարկողը եւ պատասխանատու կողմը Հայաստանի Հանրապետության ԱԱԽ քարտուղարը չէ, որովհետեւ այս հարցերը բացառապես մտնում են Մհեր Գրիգորյանի ղեկավարած հանձնաժողովի գործառույթների մեջ։

Մանրամասները՝ տեսանյութում

Աղբյուր` Փաստինֆո