Փաստ ինֆո

«Ինչպես 2018 -ի պետական հեղաշրջումից առաջ, ընթացքում,այնպես էլ դրանից հետո, Նիկոլ Փաշինյանը ստում է: Եթե երկրի վարչապետը չգիտի, որ այն , ինչ իրենք ցանկացել են, ստացել են անվերապահ, նշանակում է, որ ինքը այս երկրի վարչապետը չէ: Ինքը շատ լավ գիտի, որ նույնիսկ այս երեք շաբաթների ընթացքում շատ լուրջ բաներ են մտել երկիր, որի համար ինքը չի էլ վճարել: Ես անուններ չեմ տա, ինքն ինչպես ասում է՝ դաշնակից երկիր, այնպես էլ ես կասեմ՝ այդ նույն դաշնակից երկիրից՝ առանց վճարի»,-«Փաստինֆո»-ի հետ զրույցում այս մասին ասաց «Ազգային անվտանգություն» կուսակցության նախագահ Գառնիկ Իսագուլյանը , անդրադառնալով Նիկոլ Փաշինյանի հայտարարությանը, թե հարյուր միլիոնավոր դոլարներ վճարված են, բայց դաշնակիցների կողմից զենքի մատակարարման պարտավորությունները չեն կատարվում:

Իսագուլյանի դիտարկմամբ՝ երբ մարդը ցանկանում է լինել հիմնական պատասխանատու, բայց ոչ մեղավոր, միշտ փորձելու է իր արածը ուրիշի գրպանը գցել: «Եթե ինքն այդքան անկեղծ է, ապա թող ասի, երբ այստեղ էր ՀԱՊԿ պատվիրակությունը, գլխավոր քարտուղարը, որտե՞ղ էր ինքը: Այդ ժամանակ, երբ ինքը զբաղված էր իր ռազմավարական գործընկերոջ թիկունքին հարվածելով, այդ ժամանակ ռազմավարական գործընկերները կոնկրետ ինչ-որ բաներ էին առաջարկում, եւ նույնիսկ քարտեզի վրա խնդրում էին ցույց տալ, թե հայկական կողմին հայկական ո՞ր տարածքի համար եւ ինչ է իրենց անհրաժեշտ: Նա երեւի այդ ժամանակ Նյու-Յորքի տարբեր նկուղներում քեֆ էր անում»,-ասաց Իսագուլյանը:

Նրա խոսքով, նման հայտարարություններով հասարակությանը թյուրիմացության մեջ գցելը պետության նկատմամբ դիվերսիոն գործողություններ անող մարդկանց գործունեություն է:

«Գիտեք, Պատրոն Դավիթին, որը, իբր, Հայաստանի Հանրապետությանը 2,5 միլիարդ խաբել է, կալանքից ազատեցին: Պետությունը որքան անճար պետք է լինի, որ հանցագործին բանտից ազատի, որ նա գնա պետության անունից պայմանագրեր կնքելու: Դա պետության անճարությունն է: Մարդուն, որը, իբր, փամփուշտ է բերում Հայաստան, հետո ուրիշ գներով վաճառում թուրքերին, այդ մարդուն նորից ուղարկել Հայաստանի համար զենք գնելու, կաներ միայն հոգեկան հիվանդը: Ես բազմիցս հայտարարել եմ, որ եթե Հայաստանում իշխանութան մակարդակում չկա մեկը, որը մեր ռազմավարական գործընկերոջ հետ զենքի պայմանագիր կարող է կնքել, ապա ես պատրաստ եմ ՝ ցանացած զինատեսակի համար: Թող ինձ թույլ տան, ես եւ՛ Մոսկվա կգնամ այդ կարգի հարցեր կլուծեմ, եւ՛ Թեհրան կգնամ: Ես պաշտոնապես հայտարարում եմ, որ նախորդ իշխանությունները երբեւէ որեւէ երկրից ՀՀ զինամթերք ներկրելու խնդիր չեն ունեցել, մեր ռազմավարական գործընկերը երբեք դրան խանդով չի վերաբերվել»,-ասաց Իսագուլյանը՝ հավելելով, որ գործող իշխանությունը, որը ոչնչից տեղյակ չէ եւ ունակ էլ չէ, պարզապես մեղավորներ է փնտրում:

«Եթե դու Արմեն Գրիգորյանին ուղարկում ես Ռուսաստան զենք բերելու, բնական է, իր ղեկավարին զեկուցում է, որը Հայաստանում չի գտնվում, բնական է նա ասում է՝ կգնաս, կձախողես: Եթե քո ԱԳ ղեկավարը Թուրքիայի գործակալ է, Ռուսաստանը ի՞նչ մեղք ունի, եթե դու քո ժողովրդից բացի, փորձում ես գիժ ձեւանալ նաեւ աշխարհի առջեւ, ոնց ինքդ ես հայտարարել, ՌԴ-ին ի՞նչ մեղավոր է, եթե հենց այս պահին Իրանը արդեն բաց տեքստով Հայաստանին առաջարկություններ է անում, դու հրաժարվում ես, մեր ռազմավարական դաշնակիցը կամ Իրանը ի՞նչ մեղավոր են, եթե քեզ տվել են զինատեսակ, որը ոչ թե 40 կմ, այլ մինչեւ 200 կմ է աշխատում, բայց դու առնում ես 40 կիլոմետրանոցը, Ռուսաստանը ի՞նչ մեղավոր է: Ես առաջարկել եմ՝ այդ մարդուն պետք է ստուգել, պետք է հատուկ բժշկական հանձնաժողով ստեղծվի: Ես պետական մարդ չեմ, բայց ես գիտեմ, որ այդ բաները մատակարարվել են, վարչապետը, պարզվում է՝ չգիտի»,-եզրափակեց Գառնիկ Իսագուլյանը:

Աղբյուր` Փաստինֆո