Փաստ ինֆո

Ադրբեջանի կամ Թուրքիայի հետ կապիտուլյացիոն որևէ պայմանագիր չի երաշխավորելու մեր անվտանգությունը. ճիշտ հակառակը՝ այն ավելի է բացելու նրանց ախորժակը։ Այդ մասին մամուլի ասուլիսին «Փաստինֆո»-ի հարցին ի պատասխան ասաց ՀՀ երկրորդ նախագահ Ռոբերտ Քոչարյանը։

«Ադրբեջանը պահանջում է ընդհանրապես հրաժարվել Արցախից և Հայաստանի տարածքով տրամադրել միջանցք, որը կկապի Ադրբեջանը Նախիջևանի հետ։ Թուրքիան էլ գրեթե նույնն է ուզում, այսինքն՝ նույն պահանջներն են, որոնք ձևակերպվել են Բաքվում, և դրանք հիմնականում ընդունվել են Երևանի կողմից»,-ասաց Քոչարյանը՝ հավելելով, որ ցանկացած կապիտուլյացիոն փաստաթուղթ միայն գրռգելու է նրանց ախորժակը։

Ադրբեջանի պահանջած միջանցքը, ըստ ՀՀ երկրորդ նախագահի, ձեռնտու է նաև Կենտրոնական Ասիայի՝ այդ թվում ՀԱՊԿ անդամ մի շարք երկրների, հետևապես սպասել հակադրություն նրանց կողմից, միամտություն է։

«Աշխարհն այսօր այնպիսինն է, որ հույս կապել ինչ-որ կենտրոնների ու նրանց խոստումների հետ, բավականին դժվար է. սա այն դեպքը չէ, որ պետք է սկսենք լացել և մեղադրել այդ կենտրոններին։ Մաքսիմալ ձևով պետք է մոբիլիզացնել մեր սեփական ուժերը։ Երբ դու քեզանից բան ես ներկայացնում, քո դաշնակիցներն անմիջապես սկսում են քեզ մեկ այլ ձևով վերաբերվել՝ ավելի մեծ հարգանքով և զգում են, թե ինչպես պետք է կատարեն իրենց պարտավորությունները։ Հիմա դու քեզ չես հարգում, ասում ես՝ եկեք ինձ փրկեք. Նման բան չի լինում»,-շեշտեց երկրորդ նախագահը։

Աղբյուր` Փաստինֆո