Փաստ ինֆո

Սյունիքը, այսինքն՝ հայ-իրանական սահմանը, այս պահին Հայաստանի ամենաարժեքավոր հատվածն է, դրա վերահսկողության համար շատ լուրջ պայքար է ընթանում աշխարհի ուժային բևեռների միջև: Կոնկրետ Սյունիքի հարցում Հայաստանի և Իրանի շահերը համընկնում են, ուստի մեծ պոտենցիալ կա հայ-իրանական համագործակցությունը զարգացնելու համար, բայց պետք չէ պատրանքներ ունենալ, որ Իրանը անմիջական ռազմական գործողությունների մասնակից կդառնա՝ Սյունիքի համար, իրենք քաղաքական աջակցություն կցուցաբերեն, գուցե նաև զենք տրամադրեն, բայց մեծ հույսեր կապել պետք չէ, քանի որ այս պահին Իրանը բավականին խոցելի է: «Փաստինֆո»-ի հետ զրույցում նման դիտարկում է արել վերլուծաբան Արմեն Բաղդասարյանը:

Նրա դիտարկմամբ՝ թեև Իրանի հետ համագործակցության մեծ ռեսուրս կա այս պահին, բայց հարցը միայն հայ-իրանական հարթությունում չէ, Հայաստանը պետք է կարողանա ներկայացնել Արևմուտքին և Ռուսաստանին՝ ինչու՞ է ցանկանում խորացնել համագործակցությունը Իրանի հետ.

«Սա պետք է անենք հնարավորինս արագ, քանի որ ժամանակ չունենք, փաստաթղթային հիմնավորումը կարող է տևել ամիսներ, տարիներ, բայց այն անվտանգային սպառնալիքները, որոնք կախված են Հայաստանի գլխին, կարող են կարճ ժամանակում պայթել »-հավելեց Արմեն Բաղդասարյանը:

Ըստ նրա, հայ-իրանական սերտ հարաբերությունները լրջագույն խնդիրներ կարող են ստեղծել Հայաստանի համար, հատկապես՝ Արևմուտքի հետ հարաբերություններում:

Մեր հարցին՝ իսկ ինչո՞ւ Հայաստանի իշխանությունները չեն օգտագործում Իրանի հետ համագործակցության ողջ ռեսուրսը, արդյո՞ք հնարավոր է, որ հենց այդ պատճառով, որ սա դուր չի գա Արևմուտքին, Արմեն Բաղդասարյանն ասաց.

«Սա կարող է լինել պատճառներից մեկը, մյուս պատճառը կարող էլինել այն, որ Ռուսաստանն է դրան դեմ, կամ Իրանն է դրա դիմաց շատ բան պահանջում, կարող են լինել այլ պատճառներ»:

Նիկոլ Փաշինյանը վերջերս հրապարակային հայտարարեց, թե Հայաստանը բավարար գումար ունի, սակայն շատ երկրներ հրաժարվում են զենք վաճառել Հայաստանին:

Հարցին՝ արդյո՞ք սա Փաշինյանի հերթական պոպուլիստական հայտարարությունն էր, թե հիմք կա այս հայտարարության տակ, իսկ եթե իսկապես Հայաստանին զենք չեն վաճառում, ապա որը՞ կարող է լինել սրա պատառը՝ Արմեն Բաղդասարյանն ասաց, որ հակված չէ հավատալ Փաշինյանի այս խոսքերին

«Բայց եթե անգամ ընդունենք, որ ճիշտ է ասում, այս դեպքում պատճառը կարող է լինել մեկը՝ Հայաստանին զենք չեն վաճառում, քանի որ չգիտեն՝ Հայաստանն այդ զենքը ում դեմ է օգտագործելու: Եթե Հայաստանի իշխանությունները արտաքին քաղաքականության մեջ անընդհատ կտրուկ շրջադարձեր են անում և խաղում են բոլոր լարերի վրա միաժամանակ, բնականաբար, որևէ մեկը չի ցանկանա զենք վաճառել, քանի որ չգիտի, թե մյուս օրը ում դեմ կօգտագործվի զենքը:Եթե անգամ հանցավոր կազմակերպություններին հաջողվում է զենք ձեռք բերել, ՄԱԿ-ի կողմից ճանաչված պետության համար սա պետք է որ խնդիր չլինի »,-ասաց փորձագետը:

Դիտարկմանը, որ իշխանությունները հիմնավորում են, թե Հայաստանը ՀԱՊԿ անդամ երկիր է, դրա համար էլ շատ երկրներ զենք չեն վաճառում մեզ, Արմեն Բաղդասարյանն ասաց, որ սա ևս կարող է պատճառ հանդիսանալ.

«Որպես կանոն, Արևմուտքը զենք վաճառում է որևէ երկրին այն դեպքում, երբ իմանա, որ այդ զենքն ուղղակիորեն կամ անուղղակիորեն պետք է ուղղվի Ռուսաստանի դեմ: Նույն տրամաբանությամբ՝ Ռուսաստանն էլ կարող է մեզ զենք չվաճառել, քանի որ չգիտի՝ հաջորդ օրը այդ զենքն ում դեմ կուղղվի, չգիտի՝ արդյո՞ք Արևմուտքի հետ սիրախաղ սկսած Հայաստանի իշխանությունները որևէ մեխանիզմով այդ զենքը չեն կիրառի Ռուսաստանի դեմ »,-եզրափակեց փորձագետը:

Աղբյուր` Փաստինֆո