Փաստ ինֆո

ՄԱԿ-ի գլխավոր ասամբլեայի 77-րդ նստաշրջանում ուշագրավ ելույթ ունեցավ Ադրբեջանի ԱԳ նախարար Բայրամովը, որն առանց հասկանալու կամ միգուցե միտումնավոր մի քանի հարցի պատասխան տվեց, ինչը հուզում էր նաեւ մեր հասարակությանը։ «Փաստինֆո»-ի եթերում հայտարարել է միջազգայնագետ Գրիգոր Բալասանյանը։

Նրա փոխանցմամբ՝ Բայրամովը, մասնավորապես, անդրադարձել է երեք հարցի։ Առաջինը դա վերջին՝ սեպտեմբերյան պատերազմական գործողությունների մասին է` նշելով, որ այդ ընթացքում Ադրբեջանն ունեցել է 80 զոհ, հարյուրավոր վիրավորներ եւ նաեւ ռազմական ենթակառուցվածքների զգալի վնաս։

«Բայրամովի նշած ռազմական ենթակառուցվածքների վնասը, նշանակում է, որ այն կցկտուր տեղեկությունները, որ ստացվում էր առաջնագծից մեր զինվորների հերոսական սխրանքների մասին հաստատվում են՝ նկատի ունենալով նաեւ հայկական հրետանու կողմից խոցված զորամասերն ու դիրքերը»,- ասել է Գ. Բալասանյանը՝ տարակուսանք հայտնելով, որ Հայաստանի ՊՆ-ն այդ մասին ոչինչ չի ասում։ «Չէ՞ որ այս ամենը կարող է նպաստել հայ ժողովրդի ոգու բարձրացմանն ու մեր զինվորների սխրանքների տարածմանը, որոնք արժանի են, որ իրենց սխրանքների մասին Հայաստանի հասարակությունն իմանա»,- նկատել է Գ. Բալասանյանը։

Երկրորդ հարցը, որին անդրադարձել է Բայրամովը, ըստ փորձագետի, դա Զանգեզուրի, այսպես ասած, տրանպորտային միջանցքի մասին է։ Ըստ Բայրամովի՝ Զանգեզուրի միջանցքը միջազգային տրանսպորտային ցանցի բաղկացուցիչ մասն է, եւ Հայաստանը ամեն ինչ պետք է անի այդ միջանցքի բացման թույլտվությունը տալու համար։

«Բայրամովը, անդրադառնալով այս հարցին, կամա թե ակամա, տալիս է նաեւ հարցի պատասխանը,թե աշխարհաքաղաքական ո՞ր կենտրոններին էր ձեռնտու իրավիճակի էսկալացիան՝ սեպտեմբերի 13-14-ին հայ-ադրբեջանական սահմանին։ Այսինքն՝ այն շրջանակաները, որոնք այսօր զրկված են Ուկրաինայի տարածքով տարանցիկ ուղիներից, նոր միջազգային տրանսպորտային ցանցի կառուցման համար տարանցիկ ուղիներ են փնտրում, որոնցից մեկը պետք է լինի նաեւ Հայաստանի եւ Ադրբեջանի վրայով անցնող այդ ճանապարհը։ Բայց այն պետք է լինի ոչ թե հայկական կողմի վերահսկողության տակ, այլ Ադրբեջանի՝ անունը դնելով Զանգեզուրի տրանսպորտային միջանցք»,- նկատել է փորձագետը։

Երրորդ հարցը վերաբերում է պատերազմի դադարեցման հետ կապված ամերիկյան կողմի միջնորդությանը։ «Ինչպես հայտնի է, Նենսի Փելոսին՝ Հայաստան կատարած այցի ժամանակ եւ ամերիկացի մի շարք քաղաքական գործիչներ, տարբեր շրջանակներ միաբերան պնդում էին, որ ռազմական գործողությունները դադարեցվել են Միացյալ Նահանգների գործադրած ջանքերի շնորհիվ։ Սակայն Բայրամովը հերքում է այս տեղեկատվությունը՝ նշելով, որ կրակի դադարեցումը եղել է ուղիղ կապի միջոցով եւ որեւէ արտաքին միջնորդություն կրակի դադարեցման համար իրենք չեն ստացել»,- նշել է Գրիգոր Բալասանյանն ու ավելացրել. «բոլորի համար էլ պարզ է, թե որ երկիրը կամ երկրները այս տարածաշրջանում հնարավորություն ունեն ուղղակի ազդելու ե՛ւ Հայաստանի, ե՛ւ Ադրբեջանի վրա՝ կրակի դադարեցման հետ կապված»։

Մանրամասները՝ տեսանյութում։

Աղբյուր` Փաստինֆո