Փաստ ինֆո

ՀՀ պետական սահմանն ապօրինի հատելու և զենք-զինամթերք ապօրինի կերպով կրելու և փոխադրելու համար դապարատված ազգությամբ քուրդ Աթիլլա Չիչեքին և Հուսեյին Յըլդրըմին ՀՀ-ում պատիժն անազատության ձևով չեն կրել։ Դատարանը նրանց նկատմամբ նշանակված պատիժը պայմանականորեն չէր կիրառել՝ սահմանելով փորձաշրջան։

Հիշեցնենք, որ երեկ ահազանգվել էր, որ Աթիլլա Չիչեքը եւ Հուսեյին Յըլդրըմն՝ երկու քուրդ ազատամարտիկներ, հեղափոխականներ, որ պայքարել են սեփական ժողովրդի ազատագրության համար, պայքարել թուրքական բռնատիրության դեմ, ՀՀ-ի կողմից փոխանցվել են Թուրքիայի Հանրապետությանը։ Խնդրի բարձրաձայնումից հետո ՀՀ ԱԱԾ-ն և ՀՀ արդարադատության նախարարությունը պարզաբանում են ներկայացրել՝ արձանագրելով, որ իրենց կողմից ազգությամբ քուրդ Աթիլա Չիչեքին և Հուսեյին Յըլդրըմին չեն փոխանցել Թուրքիային։

«Արդարադատության նախարարությունն է իրավասու դատապարտյալին փոխանցել իր քաղաքացիության երկիր պատժի մնացած մասը կրելու նպատակով։ Սակայն, Արդարադատության նախարարության կողմից համացանցում տարածված՝ ազգությամբ քուրդ Աթիլա Չիչեքին և Հուսեյին Յըլդրըմին Թուրքիային փոխանցում չի իրականացվել։

Ավելին, Արդարադատության նախարարությունում նշված անձանց հանձնման կամ փոխանցման վերաբերյալ հարց չի քննարկվել»,- նշված է ԱՆ տարածած հաղորդագրությունում։

Նշենք, որ Աթիլա Չիչեքին և Հուսեյին Յըլդրըմին ՀՀ-ում մեղադրվում էին այն բանի համար, որ նրանք չունենալով զենք և ռազմամթերք ձեռք բերելու, պահելու, փոխադրելու իրավունք, ինչպես նաև զենքի և ռազմամթերքի շրջանառությունը իրականացնելու թույլտվություն, ապօրինի կերպով կրելով և փոխադրելով հրազեն հանդիսացող՝ 2 հատ ինքնաձիգ, 1 հատ ատրճանակ, ռազմամթերք հանդիսացող 318 հատ փամփուշտ և 4 հատ նռնակ, 2021 թվականի օգոստոսի 16-ին անցել են Արաքս գետն ու ապօրինի հատել ՀՀ պահպանվող պետական սահմանը, միաժամանակ իրենց հետ մաքսանենգությամբ ՀՀ են տեղափոխել հիշյալ հրազեններն ու ռազմամթերքը:

Սյունիքի մարզի ընդհանուր իրավասության դատարանը՝ դատավոր Բորիս Բախշիյանի նախագահությամբ, մեղավոր էր ճանաչել նրանց՝ դատապարտելով ազատազրկման՝ յոթ տարի ժամկետով և գույքի բռնագարավմամբ։

Ի դեպ, դատաքննության ընթացքում քուրդ ազատամարտիկներն իրենց մեղավոր չեն ճանաչել, ցուցմունք են տվել այն մասին, որ հանդիսանում են քրդական բանվորական կուսակցության անդամներ։ Իրենք թուրքերի դեմ զինված և գաղափարական պայքար են մղում։ Զենքերը և զինամթերքը իրենց են պատկանում, քանի որ Թուրքիայի դեմ պայքար են մղում, հետևաբար դրանք իրենց անբաժան մասն են կազմում և պարտավոր են միշտ կրել։ Իրենք բռնվելու օրվա դրությամբ չեն ցանկացել ՀՀ պետական սահմանը հատել, միայն ուսումնասիրում էին տեղանքը։ Իրենց պատկերացմամբ ՀՀ պետական սահմանը չեն հատել, քանի որ չեն գիտակցել, որ սահմանն անցնում է գետի մեջտեղով։ Իրենց կարծիքով ՀՀ սահմանը սկսում է փշալարերից, որից այն կողմ իրենք չեն անցել։

Դատական ակտի դեմ վերաքննիչ բողոք է ներկայացվել, որով պաշտպանության կողմը պահանջելզ էր պատիժը պայմանականորեն չկիրառել՝ սահմանելով փորձաշրջան։ Վերաքննիչ քրեական դատարանը՝ դատավոր Տիգրան Սահակյանի նախագահությամբ, կազմով դատավորներ՝ Արմեն Բեկթաշյանի, Սևակ Համբարձումյանի, բավարարել էր բողոքը՝ մասնակի բեկանելով առաջին ատյանի դատարանի վճիռը՝ Աթիլլա Չիչեքիի և Հուսեյին Յըլդրըմիի նկատմամբ որպես պատիժ նշանակելով ազատազրկումը՝ 5 տարի ժամկետով, որը պայմանականորեն չի կիրառել՝ սահմանելով փորձաշրջան՝ 3 տարի ժամկետով, քուրդ ազատամարտիկներն ազատ են արձակվել հենց դատական նիստերի դահլիճից։ Վճռաբեկ բողոքները վարույթ չեն ընդունվել և, ըստ այդմ, վերաքննիչ դատարանի որոշումը մտել է օրինական ուժի մեջ։

Փաստաբան Դավիթ Գասպարյանը «Փաստինֆո»-ի հետ զրույցում արձանագրեց, որ վերջնական որոշումը, ինչից ինքը տեղյակ է, այն է, որ իրենց նկատմամբ պատիժը պայմանականորեն չէր կիրառվել, իրենք գտնվել են ազատության մեջ, իսկ թե հետագայում ինչ է եղել՝ գուցե ինչ-ինչ պայմաններում սահման են անցել, չգիտի։ Փաստաբանը նշեց, որ տվյալներ չունի նրանց արտահանձնման մասին, իր համար խորթ է, որ կարող են արտահանձնել, քանի որ դատարանը նրանց նկատմամբ պատիժը պայմանականորեն չէր կիրառել, ազատության մեջ են եղել։ Մեր զրուցակիցը չի բացառում, որ նրանք, հնարավոր է, ՀՀ սահմանը փորձել են անցնել, ինչից հետո ձերբակալվել են։

Հեղինակ՝ Իզաբել Սահակյան

Աղբյուր` Փաստինֆո