Փաստ ինֆո

Իրանում, մասնավորապես Թավրիզում, որը համարվում է իրանական Ադրբեջանի մայրաքաղաք, մոլեգնող հակակառավարական ցույցերը կարող են հանգեցնել բախումների եւ որպես հետեւանք փակվի հայ-իրանական սահմանը։ «Փաստինֆո»-ի եթերում նման կարծիք է հայտնել միջազգայնագետ Գրիգոր Բալասանյանը։

Նկատենք, որ արդեն մի քանի օր է, ինչ իրանում սկսվել են բողոքի ակցիաներ, որոնց ընթացքում տեղի ունենում նաեւ բախումներ, զանգվածային անկարգություններ։

«Իրանը վերջին հայ-ադրբեջանական սահմանային լարվածության ֆոնին հստակ դիրքորոշում հայտնեց՝ դատապարտելով Ադրբեջանի գործողությունները, նաեւ նշելով, որ Իրանի հարեւանների սահմանները չեն կարող փոփոխության ենթարկվել եւ ամեն ինչ անելու է՝ դա թույլ չտալու համար։ Այս դիրքորոշումը եւս մեկ անգամ վերահաստատեց ԻԻՀ նախագահ Ռայիսին Նյու Յորքում ՄԱԿ-ի գլխավոր ասամբլեայի 77-րդ նստաշրջանի շրջանակներում, նաեւ Փաշինյանի հետ հանդիպման ժամանակ»,- նշել է փորձագետը՝ ավելացնելով, որ Իրանի այս կոշտ դիրքորոշմանը զուգահեռ Իրանում հրահրվեց ներքաղաքական լարվածություն։

«Իսկ ի՞նչ խնդիրներ են լուծում Արեւմուտքն ու ԻԻՀ թշնամիները՝ Իրանում հակակառավարական ցույցեր ձեռնարկելու եւ նախաձեռնելու համար։ Մեզ համար եւս պարզ է, քանզի Թավրիզը՝ իրանական Ադրբեջանի մայրաքաղաքը, հայ-իրանական սահմանին ամենամոտ գտնվող ամենամեծ քաղաքներից մեկն է։ Եվ եթե իրանական Ադրբեջանում սկսում են հակակառավարական ցույցեր, որոնք կարող են հանգեցնել բախումների, նշանակում է, որ սահմանը փակվում է»- ասել է Գ. Բալասանյանը՝ ընդգծելով, որ հայ-իրանական փակ սահմանի պարագայում, պարզ է, որ Հայաստանի դեմ հերթական ագրեսիայի դեպքում, Հայաստանը մնալու է շրջափակման մեջ, որովհետեւ Իրանը անգամ ամենամեծ ցանկության դեպքում չի կարողանալու օգնել Հայաստանին։

«Իրանում հակակառավարական ցույցերից բացի, սկսվեցին նաեւ պրոիշխանական ցույցեր, որի ընթացքում արվում էին հետեւյալ ուշագրավ վանկարկումները՝ «Մահ Ամերիկային», «Մահ Միացյալ Նահանգներին»։ Սրանով ցուցարարները փորձում են ցույց տալ, որ հակակառավարական ցույցերի կազմակերպիչը եւ հրահրողը հենց Արեւմուտքն է՝ Թուրքիայի եւ Ադրբեջանի հատուկ ծառայությունների միջոցով։ Դրա մասին վկայում են ադրբեջանական լրատվամիջոցների լուսաբանումը՝ Թավրիզում կատարվող իրադարձություննեի մասին,որտեղ նշում են,որ իրենց հայրենակիցները պայքար են մղում իրենց իրավունքների պաշտպանության համար, եւ որ նրանց դիրքորոշումները իրենց համար շատ կարեւոր են։ Սրանով արդբեջանական լրատվամիջոցները եւս մեկ անգամ ապացուցում են, որ Իրանում հակակառավարական ցույցերը կազմակերպվել եւ ուղղուրդվում են Արեւմուտքի կողմից՝ Թուրքիայի եւ Ադրբեջանի միջոցով»,- արձանագրել է փորձագետը։

Այս խորապատկերի վրա, Հայաստանում օր-օրի թափ առնող հակառուսական տրամադրությունները եւ պրոարեւմտյան դիրքորոշումները, ըստ նրա, միայն Ռուսաստանի դեմ չեն։ «Պետք է հստակ գիտակցել, որ Հայաստանում պրոարեւմտյան դիրքորոշման ավելացումը եւ արտաքին քաղաքական կուրսի փոփոխությունը, որի մասին թմբկահարում են որոշ քաղաքական ուժեր թե՛ Հայաստանից դուրս եւ թե՛ Հայաստանի ներսում, անխուսափելիորեն բերելու է նաեւ Իրանի հետ հարաբերությունների վատթարացմանը, հայ-իրանական սահմանի հնարավոր փակմանը, ինչի մասին դեռեւս 2018թ. Հայաստան կատարած այցի ժամանակ նշել էր ԱՄՆ նախագահի անվտանգության հարցերով խորհրդական Բոլթոնը՝ առաջ քաշելով այս հարցը նաեւ Հայաստանի իշխանությունների առջեւ։

Այդ ժամանակ ՀՀ ղեկավարությունը հայտարարեց, որ եթե Իրանի դեմ պատերազմ սկսվի, ապա տեսականորեն հայ-իրանական սահմանը կարող է փակվել։ Սա լուրջ դժգոհություն առաջացրեց Իրանում, որին Հայաստանի իշխանությունները այդպես էլ չկարողացան պատասխանել։

Հենց սրանով էր պայմանավորված Իրանի լուռ կեցվածքը 44-օրյա պատերազմի ժամանակ, որով Իրանը ցույց տվեց, որ, ըստ էության, ինքը դժգոհ է մնացել Հայաստանի դիրքորոշումից»,- հայտարարել է փորձագետը։

Մանրամասները՝ տեսանյութում

Աղբյուր` Փաստինֆո