Փաստ ինֆո

44-օրյա պատերազմի ժամանակ և հիմա տարբեր իրադրությունների հետ գործ ունենք և ճնշման տարբեր միջոցներ են օգտագործվում՝ ելնելով իրադրությունից։ Այս մասին «Փաստինֆո»-ի հետ զրույցում ասաց հոգեբան Կարինե Նալչաջյանը՝ անդրադառնալով լայն տարածում ստացող «հոգեբանական տեռորին»։

Հիշեցնենք, որ օրեր առաջ ԱԺ նախագահ Ալեն Սիմոնյանը հայտարարել էր, որ կան ՀՀ ներթափանցած ադրբեջանական դիվերսոն 1-2 խմբեր, որոնց գտնվելու հնարավոր վայրի, տարբերակման նշանների վերաբերյալ ոչինչ չի ասվել հանրությանը, Փաշինյանն անգամ ՄԱԿ-ի ամբիոնից հայտարարեց, թե Ադրբեջանը պատրաստվում է օկուպացնել ՀՀ այլ տարածքներ, իսկ ԱԺ փոխնախագահ Հակոբ Արշակյանն էլ նշել էր, թե «վստահելի ապացույցներ կան, որ Ադրբեջանը պատրաստվում է նոր հարձակման՝ ընդլայնելով աշխարհագրությունը, այդ թվում՝ Նախիջևանի կողմից»։

Երեկ՝ սեպտեմբերի 23-ին, Հայաստանում ԱՄՆ եւ Ֆրանսիայի դեսպանատների կողմից նախազգուշացում հրապարակվեց, որով հորդորել էին իրենց քաղաքացիներին խուսափել ՀՀ որոշ մարզեր այցելությունից, ինչից հետո ֆեյսբուքյան որոշ արեւմտամետ օգտատերեր գրառումներ արեցին, թե գիշերը ռազմական գործողություններ պետք է լինեն, իբրև Նոյեմբերյանում տարհանում են բնակիչներին։ Թեեւ վերջին այս տեղեկությունն ակնհայտ սուտ էր, այդուհանդերձ, տարբեր պաշտոնյաների՝ հնարավոր հարձակումների մասին հայտարարությունների համատեխստում հանրության շրջանում բավականին մեծ խուճապ էր տարածվել։ Մինչդեռ նախկինում, հիշեցնենք, ընդհակառակը, ստեղծվել էր ինֆորմացիոն բլոկադան, անգամ տարածվում էր կեղծ տեղեկություն՝ ռազմական գործողությունների արդյունքների մասին, իբր, հաղթում ենք, ինչը հետագայում պատճառաբանվեց խուճապ չտարածելու նպատակներով։

Հոգեբան Կարինե Նալչաջյանը «Փաստինֆո»-ի հետ զրույցում ուշադրություն հրավիրեց, որ 44-օրյա պատերազմի ժամանակ և հիմա բոլորովին այլ իրադրություն է։
«44-օրյա պատերազմի ժամանակ իրենց ձեռնտու էր, որ թիկունքը՝ Երևանը, Հայաստանը հանգիստ նստի, չխանգարեն, որ իրենք իրենց դավադիր ծրագրերը իրականություն դարձնեն, իսկ հիմա իրադրությունը այլ է։ Հիմա նախապատրաստվում է ինչ-որ մի բան, որն արդեն իսկ տեսանելի է և իրենց պետք է վախի մթնոլորտը։ Ինչու՞ է պետք՝ թեկուզ հենց ելնելով վերջին իրադարձություններից, որ Ալիևին ասում է՝ քարտեզը գծիր, թե ինչ ես ուզում։ Սրա տրամաբանական հետևանքը, արդեն ելնելով վերջին տարիների տրամաբանությունից, ինչ է լինելու՝ Ալիևը կգծի կտա, կասի՝ սա եմ ուզում և այլն, ինքն էլ՝ կդիմի ժողովրդին՝ մտնելով «խեղճ Նիկոլի» դերի մեջ, թե իրեն ծանր վիճակի մեջ են դրել նախկինները, ինքն ինչ անի, կասի ժողովրդին՝ եկեք սա էլ տանք, որ խաղաղ ապրենք և շատ հնարավոր է, այդ ամբողջ արյան, հայրենիքի կորստի, ցնցումների տակ կռացած, մելանխոլիայի մեջ գտնվեն մարդիկ, որ ասեն ՝ լավ, թող խաղաղություն լինի»,- նշեց հոգեբանը՝ հիշեցնելով, որ Նիկոլ Փաշինյանը երկրորդ անգամ վերընտրվել է, քանի որ մարդիկ խաբվել էին խաղաղությամբ. «հոխորտում էին խաղաղության դարաշրջանի մասին, ոչ ավել, ոչ պակաս՝ տարածաշրջանում խաղաղության դարաշրջան էին ստեղծում Նիկոլն ու իր հանցախումբը»։

Հոգեբանի խոսքով՝ հիմա պետք է, որ վախի մթնոլորտը գեներացնելով, անցնեն թուրքերի հետ ձեռք ձեռքի տված համագործակցության հաջորդ էտապին՝ առանց ինչ-որ ցնցումների, առանց իրենց վայելքներին նեղություն տալու։
«Տարբեր են իրադրությունները։ Մենք չենք կարող համեմատել։ Ամեն իրադրություն իր ներազդման միջոցներն է պահանջում և իրենց այդ անդրօվկիանոսյան կոորդինատորներն այդ ամենը շատ լավ հասկանում են, շատ լավ վերլուծում են, տալիս են ցուցումներ՝ իրենք էլ անում են»,- նշեց Նալչաջյանը՝ հավելելով, որ 36 կազմակերպությունները, որոնք տարիներ շարունակ պղծություններ են քարոզել, մարդու իրավունքների արժեքներ են փոխել, որոնց ֆունկցիան շատ ծանոթ է, իբրև շատ ազդված են ոստիկանության, ոստիկանապետի խայտառակ գործունեությունից և հրաժարական են պահանջում, իրականում նպատակ են հետապնդում մարդկանց գլխում քաոս առաջացնելու. «Մարդկանց գլխում քաոս է առաջանում՝ ով՝ ով է, ինչ է, իսկ եթե մարդու գլխում քաոս է, քաոսային վիճակը կազմալուծում է մարդու գործունեությունը, միտքը և մարդիկ դառնում են կառավարելի։ Իրենք նույն ինկուբատորի ճուտն են, իրենք համագործակցել են, հիմա նույնպես համագործակցում են։ Հիմա ամեն ինչ արվում է՝ մարդկանց գլխում քաոսը խորացնելու և վախի մթնոլորտ ստեղծելու համար։ Այս պահին իրենց այդ չարաբաստիկ, չարագուշակ, պետությունը վերացնելու ծրագիրն իրագործելու համար շատ ճիշտ մոտեցում է»։

Հոգեբանն արձանագրեց՝ հոգեբանական տեռորը, կառավարելի քաոսը սկսվել է 2018թ, մինչ այսօր դրա մեջ ենք։ Նրա խոսքով՝ այսօրվա հիբրիդային պատերազմներում ամենսարսափելին ոչ թե զինված բախումն է, այլ՝ անտեսանելի թշնամին, որովհետև տեսանելիի դեմ կարողանում ես պայքարելու համար ելքեր գտնել, իսկ անտեսանելի թշնամին մեծագույն ծուղակ է։

«Թշնամին քնած չէ, իրենք այդ տեսանելի և անտեսանելի զենքերով շարունակում են մեր դեմ պայքարը»,-ընդգծեց Կարինե Նալչաջյանը։

Աղբյուր` Փաստինֆո