Փաստ ինֆո

Արեւմուտքի սանկցիաների արդյունքում խորանում է Ռուսաստանի եւ Չինաստանի ռազմատեխնիկական համագործակցությունը։ «Փաստինֆո»-ի եթերում ասել է միջազգայնագետ Գրիգոր Բալասանյանը։

«Իհարկե, Արեւմուտքը երբեք չէր կարող պատկերացնել, որ իր վարած սանկցիոն քաղաքականությունը կարող էր նպաստել Ռուսաստանի եւ Չինաստանի ռազմատեխնիկական համագործակցության խորացմանը»,- նշել է փորձագետն ու ավելացրել. «արդեն հայտարարություն տարածվեց, որ մի քանի օր է ՌԴ ազգային անվտանգության խորհրդի քարտուղար Պատրուշեւը Չինաստանում է, որտեղ իր գործըկերոջ հետ քննարկել են Շանհայի համագործակցության կազմակերպության շրջանակներում խաղաղապահ ուժերի ստեղծման մասին համաձայնագիր ստորագրելու հարցը»։

Նրա փոխանցմամբ՝ սա նշանակում է,որ Ռուսաստանն ու Չինաստանը համապատասխանեցնում են իրենց դիրքորոշումը՝ Ասիա-խաղաղօվկիանոսյան տարածաշրջանում անվտանգության ապահովման, Միացյալ Նահանգների հեգեմոնիայի դեմ պայքարելու հարցում, նաեւ համապատախանեցնում են իրենց դիրքորոշումները Շանհայի համագործակցության կազմակերպության մեջ մտնող երկրների հետ կապված տարաձայնությունների պարագայում ինքնուրույն լուծել իրենց խնդիրները՝ օգտագործելով նաեւ խաղաղապահ ուժերը, որոնք պետք է ստեղծվեն Ռուսաստանի եւ Չինաստանի կողմից։

«Այս խաղաղապահ ուժերը, չի բացառվում, որ կարող են կիրառվել նաեւ Աֆղանստանում։ Սա նշանակում է, որ ԱՄՆ ընդմիշտ կզրկվի Աֆղանստանի ներքին գործերին միջամտելու հնարավորությունից եւ, նաեւ Արեւմուտքը երբեք չեն կարողանալու ռազմական ներկայություն ունենալ Աֆղանստանում»,- նշել է նա։

Մանրամասները՝ տեսանյութում

Աղբյուր` Փաստինֆո