Փաստ ինֆո

Երևանի ընդհանուր իրավասության դատարանի դատավոր Մնացական Մարտիրոսյանը պահանջում է կարճել՝ իրեն կարգապահական պատասխանատվության ենթարկելու վերաբերյալ գործը։

Ինչպես արդեն տեղեկացրել ենք՝ Երևանի ընդհանուր իրավասության դատարանի դատավոր Մնացական Մարտիրոսյանի նկատմամբ հարուցվել է կարգապահական վարույթ՝ ԲԴԽ նախկին նախագահ, ՀՀ նախկին զինդատախազ Գագիկ Ջհանգիրյանի եղբոր՝ Վարդան Ջհանգիրյանի գործով 13 տարի առաջ կայացված որոշման համար։ Նշենք, որ Վարդան Ջհանգիրյանը 2009թ. մարտի 31-ի դատավճռով մեղավոր է ճանաչվել ՀՀ քրեական օրենսգրքի 316-րդ հոդվածի 1-ին մասով: Դատարանը հաստատված է համարել, որ 2008թ. փետրվարի 23-ին` ժամը 23-ի սահմաններում, ՀՀ ոստիկանության աշխատակիցների կողմից Էջմիածին-Երևան մայրուղու Արգավանդ գյուղի խաչմերուկում, «BMW X-5» մակնիշի ավտոմեքենայում գտնվող զինված անձանց զինաթափելու և բերման ենթարկելու ժամանակ նա չի ենթարկվել` չշարժվելու մասին իր ծառայողական պարտականությունները կատարող ոստիկանի օրինական պահանջին, ավտոմեքենան վարել է նրանց ուղղությամբ և բախվել ոստիկանության ավտոմեքենային, չի ենթարկվել իր մոտ պահվող հրազենը ներկայացնելու պահանջներին, վնասել է ոստիկանի համազգեստը, բռունցքով հարվածել վերջինիս դեմքին` պատճառելով առողջության թեթև վնասի հատկանիշներ չպարունակող մարմնական վնասվածքներ:

Դատավճռով Վ.Ջհանգիրյանը դատապարտվել է երեք տարի ժամկետով ազատազրկման, նշանակված պատիժը պայամանականորեն չի կիրառվել՝ սահմանվելով երեք տարի ժամկետով փորձաշրջան։ Վերաքննիչ դատարանն անփոփոխ է թողել դատավճիռը, Վճռաբեկ դատարանը՝ վարույթ չի ընդունել բողոքը: Վարդան Ջհանգիրյանը հետագայում ազատվել է պատժից՝ համաներմամբ: 2021թ մայիսի 18-ին ՄԻԵԴ-ը վճիռ է կայացրել՝ արձանագրելով Վարդան Ջհանգիրյանի իրավունքների խախտումը, ինչն էլ հիմ է հանդիսացել գործը շուրջ 13 տարի առաջ քննող դատավորի նկատմամբ վարույթ հարուցելու։

«Փաստինֆո»-ի հաղորդմամբ՝ ԲԴԽ-ում ընթացող նիստի ընթացքում ՀՀ արդարադատության նախարարության ներկայացուցիչ Հայկ Սանոյանը ներկայացրեց միջնորդության հիմքերը, համաձայն որի՝ Մնացական Մարտիրոսյանը, հաշվի չառնելով Վարդան Ջհանգիրյանի առողջական վիճակը, որոշում է կայացրել Վարդան Ջհանգիրյանի մասնակցությունը դատական նիստին ապահովելու համար բերման ենթարկելու մասին։ Ըստ ՄԻԵԴ-ի՝ Վարդան Ջհանգիրյանի իրավունքները խախտվել են, վերջինս ենթարկվել է արժանապատվությունը նվաստացնող վերաբերմունքի։ ՀՀ արդարադատության նախարարությունը գտնում է, որ դատավոր Մնացական Մարտիրոսյանի կողմից կոպիտ անփությություն է ցուցաբերվել։

Հարցուպատասխանի ընթացքում դատավորի ներկայացուցիչը նախ փորձեց պարզել, ի վերջո, ինչն է առիթ հանդիսացել՝ կարգապահական վարույթ հարուցելու համար, ապա ուշադրություն հրավիրեց իրավական անորոշության վրա՝ կապված վարույթների հարուցման ժամկետների հետ։ Փաստաբանի խոսքով՝ դատավորը չի կարող անորոշության մեջ մնալ, նախարարը երբ ուզի՝ հարուցի կարգապահական վարույթ։

Թեև արդարադատության նախարարության ներկայացուցիչները պնդեցին, թե տվյալ պարագայում ժամկետների խախտում առկա չէ, դատավորի ներկայացուցիչն արձանագրեց, որ արդարադատության նախարարության նախաձեռնությամբ օրենսդրական փոփոխություններ են իրականացվել՝ ՄԻԵԴ վճիռների հիման վրա վարույթների հարուցման համար հետադարձ ուժ սահմանելով, մինչդեռ, ըստ փաստաբանի, Մնացական Մարտիրոսյանի նկատմամբ վարույթ հարուցելու պահին նշված կարգավորումն, ըստ էության, չի եղել, սահմանված չեն եղել ժամկետներ՝ ուսումնասիրություններ իրականացնելու և վարույթ հարուցելու համար, ըստ այդմ, փասաբանը բարձրացրեց գործի վարույթը կարճելու անհրաժեշտության մասին։ Նրա դիտարկմամբ՝ ստացվում է մի իրավիճակ, որ կառավարության ներկայացուցիչն իրականացրել է մի գործընթաց, որն օրենքով սահմանված չէ, այսինքն՝ ապօրինություն է։ Փաստաբանը գտնում է, որ միջազգային դատական ատյանի՝ ակտը հրապարակելու պահից ՀՀ ԱՆ-ն պետք է ուսումնասիրություն իրականացնի, որը պետք է տևի 30 օր։

Դատավորի ներկայացուցիչը միջնորդություն ներկայացրեց՝ պահանջելով մերժել դատավորի նկատմամբ կարգապահական վարույթ հարուցելու մասին միջնորդությունը կամ մերժել այն։

Լսելով կողմերի դիրքորոշումը՝ ԲԴԽ-ն հեռացել է խորհրդակցական սենյակ՝ կարճման միջնորդության վերաբերյալ որոշում կայացնելու։

Հեղինակ՝ Իզաբել Սահակյան

Աղբյուր` Փաստինֆո