Փաստ ինֆո

ԲԴԽ-ում այսօր տեղի է ունեցել Երևանի ընդհանուր իրավասության դատարանի դատավոր Ժորա Չիչոյանի երդմնակալության արարողությունը։ Այս մասին տեղեկանում ենք ԲԴԽ տարածած պաշտոնական հաղորդագրությունից, որում նշված է, որ 2022 թվականի սեպտեմբերի 15-ին ԲԴԽ նախագահի պաշտոնակատարը հրապարակել է հայտարարության առ այն, որ Ժորա Արմենի Չիչոյանն իրավունքի ուժով ստանձնել է Երևան քաղաքի առաջին ատյանի ընդհանուր իրավասության դատարանի դատավորի պաշտոնը:

Նշենք, որ «ՀՀ դատական օրենսգիրք» սահմանադրական օրենքի 117-րդ հոդվածի համաձայն՝ ԲԴԽ-ն դատավորի թեկնածուի թեկնածությունն առաջարկում է Հանրապետության նախագահին՝ ներկայացնելով նրա անձնական գործը:

Առաջարկությունը ստանալու պահից եռօրյա ժամկետում ՀՀ նախագահն ընդունում է ներկայացված թեկնածուին նշանակելու վերաբերյալ հրամանագիր կամ առաջարկությունն առարկություններով վերադարձնում է ԲԴԽ: Այս դեպքում ԲԴԽ-ն պարտավոր է նիստ հրավիրել: Եթե ԲԴԽ-ն չի ընդունում նախագահի առարկությունը, ապա ՀՀ նախագահը եռօրյա ժամկետում ընդունում է ներկայացված թեկնածուին նշանակելու վերաբերյալ հրամանագիր կամ դիմում է Սահմանադրական դատարան, իսկ եթե չի դիմում ՍԴ, ապա թեկնածուին դատավոր նշանակելու վերաբերյալ ՀՀ նախագահի հրամանագիրն ուժի մեջ է մտնում իրավունքի ուժով:

Այս պարագայում ՀՀ նախագահն իր լիազորությունների շրջանակում ոչ հրամանագիր է ստորագրել Ժորա Չիչոյանին դատավոր նշանակելու վերաբերյալ, ոչ էլ՝ դիմել ՍԴ, և Ժորա Չիչոյանը նախագահականում նախագահի ներկայությամբ երդվելու փոխարեն՝ երդվել ու դատավոր է դարձել ԲԴԽ-ում:

Հատկանշական է, որ Ժորա Չիչոյանը ԲԴԽ նախագահի պաշտոնակատար Սերգեյ Չիչոյանի եղբորորդին է։

Աղբյուր` Փաստինֆո