Փաստ ինֆո

Անկախությունը, ազատությունը, ինքնիշխանությունն այն հիմնարար արժեքներից են, որ դարերն ի վեր մեր ժողովուրդը ձգտել է և մեր նորօրյա պատմության ընթացքում այս վերջին 30 տարիներին մենք Անկախության տոնը այլ կերպ ենք տոնել, հպարտությամբ այցելել ենք «Եռաբլուր», շնորհավորել մեր մարտական ընկերներին այնպես, ինչպես՝ այսօր։ Կարծում եմ, որ այս նվիրյալ անձանց ծառայության, հերոսությունների, քաջագործությունների շնորհիվ է, որ ունեցել ենք անկախություն։ Այս մասին լրագրողների հետ զրուցյում ասաց ՊՆ նախկին նախարար, «Հայաստան» խմբակցության պատգամավոր Սեյրան Օհանյանը։

Նրա խոսքով՝ այս օրերին՝ վերջին սադրանքներից, 44-օրյա պատերազմից հետո մենք այլ կերպ ենք տոնում անկախությունը, որովհետև ակնհայտ է, ժողովուրդը տեսնում է, որ օրըստօրե մենք մեր ինքնիշխանության, անկախության ինչ-որ տարրեր կորցնում ենք, ինչի հիմնական պատճառը պարտությունն է։ Օհանյանը նշեց պարտություն իրականացնողներից երկուսի անունը, առաջինը՝ հանցագոր Ադրբեջանն է, թուրք-ադրբեջանական տանդեմն է, որ հանցագործություն է կատարել Արցախի և հայ ժողովրդի հանդեպ, այսօր էլ շարունակում են իրենց ճնշումը՝ արտահայտված սադրանքներով և մարտական գործողություններով՝ իրենց հեռահար նպատակն իրականացնելու համար, երկրորդ շահառուն, ըստ Օհանյանի, այսօրվա իշխանություններն են։

«Ցավով եմ նշում, որ հայ ժողովուրդն արժանի չէ այսպիսի իշխանությունների, որոնք ներքաշեցին մեր երկիրրը պատերազմի մեջ։ Պատերազմի ընթացքում ոչինչ չեն արել և այսօր էլ ոչինչ չեն անում մեր ինքնիշխանությունը պաշտպանելու համար։ Պետք է ժողովրդին տանենք ոչ թե կեղծ խաղաղության, այլ՝ ռեալ երաշխիքներ ստեղծենք՝ խաղաղությունը պաշտպանելու համար»,-նշեց Սեյրան Օհանյանը՝ ընդգծելով, որ առաջինն ազգային երաշխիքներն են՝ բանակը, մեր միասնականությունը, տնտեսությունը, համախմբվածությունը և ռազմավարական կամքը՝ երկիրը պաշտպանելու համար։ Երկրորդ երաշխիքները, ըստ Օհանյանի, միջազգային երաշխիքներն են՝ լայն ընդգրկվածություն ունեցող համարձակ արտաքին քաղաքականության շրջանակներում բանակցային խելացի գործունեության իրականացումն է։

Նրա խոսքով՝ այսօրվա իշխանությունները պարտվողական կերպարի մեջ են և չեն կարողանում բանակցել, մեր խնդիրը պետք է լինի ազատվել պարտված իշխանություններից և փոխել բանակցողին, միայն այդ կերպ կարող ենք հասնել հաջողությունների։

Օհանյանն ընդգծեց՝ բանակցողին փոխելով մենք կփոխենք ամեն ինչ, մեզ պետք է ամուր բռունցք, յուրաքանչյուր փուլում էլ հնարավոր է ծնկի եկած վիճակից մեջքն ուղղել և արտաքին քաղաքականության մեջ համարձակ տեսակետից արտահայտվել՝ դուրս գալով պարտվողի կերպարից։

Օհանյանի դիտարկմամբ՝ այնպիսի տարածաշրջանում ենք, որտեղ անվտանգության միջավայրը փխրուն է և սպառնալիքները միշտ ահագնացող են լինելու՝ մինչև մեր մեջքը չուղղենք, պետք է միշտ պատրաստ լինենք։

Աղբյուր` Փաստինֆո