Փաստ ինֆո

Անկախությունը Ֆեյսբուքում ստատուս գրել չէ, հայտարարություն անել կամ լայվ մտնել չէ։ Այն ծանր բեռ է, որը պետք է կարողանանք արժանապատվորեն տանել՝ ամեն մեկս մեր բաժին զենքը վերցնելով ու կռիվ տալով։ Սարսափելի է, երբ տեսնում ես, թե ինչպես են քո պահած,  ընկերներիդ արյունով պահված հողը հանգիստ հանձնում թշնամուն։ Իսկ այն, ինչ այսօր կատարվեց Եռաբլուրում, սրբապղծության վերջին աստիճանն էր։ Աստված դրա համար բոլորիս պատժելու է։ Պատժվելու ենք, որովհետև արժանի չենք տղաների թափած արյանը։ Չգիտեմ՝ որտեղ ենք մեղավոր, բայց պիտի մի բան արած լինեինք, որ նման բան թույլ չտայինք։ «Փաստինֆո»-ի հետ զրույցում ասում է Քառօրյա և 44-օրյա պատերազմների մասնակից Մանուել Մանուկյանը։

«Ոստիկաններն այսօր անցան բոլոր կարմիր գծերը։ Ի՞նչ տարբերություն հայ զինվորին խոշտանգող թուրքի և Եռաբլուրում նրանց  ծնողներին քաշքշող ոստիկանի միջև։ Ես այդ ոստիկանների հետ կվարվեի այնպես՝ ինչպես թուրքի հետ։ Այս ամենը մեր դուռն է գալիս այն պատճառով, որ մեր բարեկամների, հարևանների որդիներին տարել, դավադրաբար սպանել են, բայց էլի Նիկոլ Փաշինյանին քվե տվող է եղել։ Քանի դեռ պաշտոնի,  փողի համար շարունակում են պաշտպանել մեկին, ով ծառայում է թուրքին, ով վախենում է համալրել բանակը, իսկ մենք  շարունակում ենք համակերպվել դրա հետ, Փաշինյանի ու նրա խմբակի պահվածքը Եռաբլուրում չպետք է որ զարմացնի։ Նրանք ինձ համար թուրքից ոչ մի բանով չեն տարբերվում»,-ասում է Մանուելը։

Երկու պատերազմների մասնակից Մանուել Մանուկյանը պնդում է՝ Եռաբլուրում այսօր կատարվածն արձանագրած բոլոր տեսանյութերը պետք է պահվեն, որպեսզի զոհվածների ծնողների հանդեպ անհարգալից վերաբերմունք ցուցաբերած յուրաքանչյուր ոք իր պատիժը ստանա․

«Թեկուզ անցնի մեկ, երկու, հինգ տարի, նրանք հատիկ-հատիկ պատասխան պիտի տան՝ հրաման տվողից մինչև հրաման կատարող։ Ամենախիստ ձևով պիտի պատժվեն, որպեսզի դա դաս լինի մյուսների համար, որպեսզի էլ երբեք  նման բան չկրկնվի։ Եթե նրանք դրա համար պատասխան չտվեցին, ապա մենք շատ ավելի սարսափելի վիճակում ենք հայտնվելու։ Ո՞նց կարելի է գնալ այդ մարդկանց երեխաների  շիրիմին, իբր, հարգելու նրանց հիշատակը, բայց նրանց իսկ ծնողներին քաշքշելով  հեռացնել  Եռաբլուրից։ Պատկերացրեք՝ ինչ են  զգում այն  տղաները, որոնք հիմա երկնքից տեսնում են, թե ինչպես են վարվում իրենց ծնողների հետ»։

Մանուելի համոզմամբ՝ այս իրավիճակի պատճառը մեր հանցավոր անտարբերությունն է, իսկ դա փոխելու համար պետք է սկսել Երևանից՝ կառավարության շենքից, որտեղ նստած է խնդրի բուն պատճառը։

«Մարտի դաշտում սարսափելի բան է, երբ թշնամին թիկունք է անցնում։ Հիմա նման իրավիճակ է. թշնամին մեր պետության թիկունքում է և այս պարագայում մեզ կօգնի միայն շրջանաձև պաշտպանությունն  ու զենքը։ Նրանք ինքնասիրություն չունեն։ Հորդորնելով, ֆեյսբուքյան գրառումներով նրանց ճիշտ ուղու բերել հնարավոր չէ։ Որ այդ կերպ եկան Եռաբլուր, այնտեղ կանգնեցին, նկարվեցին և ամբողջ ազգը հիմա թքում է նրանց երեսին, այդպես հարգանքի տուրք մատուցեցի՞ն։ Եռաբլուրում նոր փոսեր են փորվում, ամեն օր մենք արնաքամ ենք լինում, անհրաժեշտ է կանխել այս աղետը, ազատվել այդ մարդուց»,-ասում է երկու պատերազմների մասնակից Մանուել Մանուկյանը։

Մեր զրուցակցի խոսքով՝ զինվորն այսօր մենակ է, իսկ համախմբվելու կոչերը, որ հնչում են բազմաթիվ մարդկանց կողմից, անարդյունք են մնում, քանի որ չկա պետություն, չկա առաջնորդ։ Համեմատելով Քառօրյա և 44-օրյա պատերազմները՝ Մանուլը շեշտում է՝ առաջինի ժամանակ բանակը ինչպես պետք է՝ համալրվել է, զուգահեռ ուժեղ դիվանագիտություն է բանեցվել։

«Բանակը հիմա չի համալրվում, միայն ցանկացողներին կամավորագրվելու կոչեր են հնչեցնում, քանի որ քիչ չեն այն մարդիկ, որոնք վախենում են առաջնագիծ գնալուց, և Փաշինյանը շատ լավ գիտի, որ եթե մոբիլիզացիա հայտարարի, ապա վախկոտ տեսակը դուրս կգա իր դեմ ու կհեռացնի իշխանությունից։ Իր աթոռը պահելու համար զինվորին մենակ է թողել։ Իսկ զինվորը, կռվողը հաղթում է, երբ թիկունքն ամուր է լինում։ Այդ թիկունքը պետք է շատ արագ ամրացնենք, իսկ դա, ինչպես ասացի, հնարավոր կլդառնա միայն այն պարագայում, երբ հեռացվի Փաշինյանը։ 44-օրյան էլ մեզ համար դաս չեղավ»,- ասում է Մանուել Մանուկյանն ու ավելացնում՝ ինչո՞ւ են կարմիր բերետավորները Երևանի կենտրոնում և ոչ թե առաջնագծում, եթե թշնամին մխրճվել է ՀՀ սուվերեն տարածքից ներս ու փորձում է ամրանալ։

Աղբյուր` Փաստինֆո