Փաստ ինֆո

Ես ուզում եմ հասկանալ՝ Հայաստանն այսօր անկախություն ունի՞, ովքե՞ր են անկախություն տոնողները, Հայաստանը թշնամուն հանձնած ու զիջած մարդի՞կ, սա աբսուրդ է: «Փաստինֆո»-ի հետ զրույցում նման հայտարարություն է արել «Սեւ հովազ» ջոկատի հրամանատար Ռուստամ Գասպարյանի եղբայրը՝ Սերոբ Գասպարյանը, որը զրույցի պահին էլ դիրքերում էր:

Ինչ վերաբերում է Եռաբլուրում այսօր տեղի ունեցող ամոթալի միջադեպին, երբ կարմիր ու սեւ բերետավորները բռնի ուժի գործադրմամբ բերման են ենթարկել զոհված զինվորների ծնողներին, ընդ որում՝ նախ հայրերին, ապա նաեւ մայրերին, Սերոբ Գասպարյանը նշում է.

«Երեկ մեզ տեղեկություն հասավ, որ թշնամական Ադրբեջանում Ալիևի հրահանգով այնտեղի զոհված զինծառայողների ծնողներին քաշքշել են, բերման են ենթարկել, այսինքն՝ ինչ անում է թշնամի երկրի ղեկավարը, նույնը մեր երկրում կրկնում է Փաշինյանը, ի՞նչ են սրանով ուզում ասել: Թե՛ սահմանին կանգնած կամավորը, թե՛ զինվորը տեսնում են, որ իրենց զոհված եղբայրների ծնողներին նվաստացնում են, հիմա ի՞նչ են մտածելու զինվորները, որ վաղն իրենք էլ երբ կյանքը կտան հայրենիքի համար, նույն վերաբերմունքին արժանանալու են նաև իրե՞նց ծնողները, սրանց նպատակը դա է՝ հիասթափեցնել, մարդկանց նվաստացնել, հողին հավասարեցնել»,-ասաց Գասպարյանը:

Նշենք, որ վերջին օրերին իշխանության ներկայացուցիչները գրեթե ամեն օր հայտարարում են, որ թշնամին նոր, լայնամասշտաբ պատերազմի է նախապատրաստվում՝ այս անգամ նաեւ Նախիջևանի ուղղությամբ:

Հարցին՝ արդյո՞ք առաջիկայում նոր ավելի լայնամասշտաբ պատերազմ կլինի՝ Սերոբ Գասպարյանն ասաց, թշնամին այս պահին էլ մեր հողի վրա և այն հատվածներում, որտեղ իր վերջին ագրեսիայից հետո առաջ է եկել, լայնամասշտաբ ինժեներական աշխատանքներ է տանում ու նախապատրաստվում.

« 8-10 կմ մտել են մեր հողի մեջ ու տեխնիկան, մեխանիկան բերել են ու ինժեներական աշխատանքներ են տանում, այսինքն՝ պատրաստվում են մեր հրետանու հակահարվածից պաշտպանվելուն, տնավորվեցին մեր տան մեջ ու նորից հարձակման են պատրաստվում»,-ասաց նա:

Իսկ թե ի՞նչպես է վերաբերվում, որ իշխանության ներկայացուցիչները մի կողմից ասում են, որ թշնամին նոր պատերազմի է պատրաստվում, մյուս կողմից էլ խաղաղության կոչեր են անում, ասում են, որ ամեն գնով պետք է խաղաղության գնանք նրան հետ, Սերոբ Գասպարյանն ասաց.

«Ես միշտ ասել եմ, սրանց նպատակը մարդկանց ուղեղները լվանալն է, ու՞մ հետ խաղաղության գնանք, որ անգամ մեր զինվորների դիակներն են խոշտանգում, ո՛ւր է ՄԻՊ ասվածը ու մյուսները, որ հիմա պետք է ամբողջ աշխարհի ատյաններով ձայները գլուխները գցեին ու բողոքեին, բայց գառան պես լուռ նստած են, ոչինչ չեն անում: Այս մարդիկ մեզ խաբում են, տանում են մորթվելու, մեր ժողովուրդը չգիտեմ՝ ինչ է մտածում, սրանք հայամետ ոչինչ չեն արել, ի՞նչ է նշանակում՝ ով ուզում է թող գնա ու կամավոր գրվի, մեր տեսակը, որ հայրենիքի համար պատրաստ են իրենց կյանքը դնելու, իրենց կոչնչացնեն ու Հայաստանի բանալիները կհանձնեն թուրքին»,-եզրափակեց Սերոբ Գասպարյանը:

Աղբյուր` Փաստինֆո