Փաստ ինֆո

Մինչեւ այսօր Ադրբեջանի կողմից վերջին երկօրյա պատերազմական գործողությունների հետեւանքով զոհված զինծառայողների անվանական ցուցակները չհրապարակելը երկու նպատակ է հետապնդում՝ կոծկել զոհերի իրական է թիվը եւ պատանդ պահել զոհվածների ծնողներին։

«Փաստինֆո»-ի հետ զրույցում նման կարծիք է հայտնել 44 -օրյա պատերազմում զոհված Հայկ Մելիքյանի մայրը՝ Նաիրա Մելիքյանը։

«Սա նույն ձեռագիրն է, ինչ 44-օրյա պատերազմից հետո տեսանք։ Մինչեւ օրս մենք չունենք 44-օրյա պատերազմում բոլոր զոհվածների, անհետ կորածների եւ գերիների ամբողջական անվանական ցուցակները։ Հիմա նույն բանն են անում եւ դա զարմանալի չէ։ Պատճառներից մեկը թվերի կոծկումն է՝ դոզավորված, քիչ-քիչ ինչ-որ թվեր հայտնելը, որպեսզի մարդիկ կորցնեն հետագիծը։ Երկրորդ՝ այդ գործելակերպով իրենք ծնողներին պատանդ են պահում» ,- ասում է որդեկորույս մայրը, շարունակելով․ «Պատկերացրեք, ծնողը մի քանի րոպե չի կարողանոււմ իր երեխայի հետ կապ հաստատել, էլ չեմ ասում շատ ավելի երկար ժամանակահատված՝ ժամեր, օրեր․․․Մարդն ուղղակի ոչնչանում է եւ այդ անզորությունից, ցավից այլեւս որեւէ բանի ընդունակ չի լինում, լուռ, մեկուսացած, կիսամեռած նստում են ու ընդամենը սպասում լուրերի, էլ չեմ ասում՝ անհետ կորածների պարագայում, եթե Աստված մի արասցե, կրկնվի մեր ճակատագիրը՝ 14 ամիս փնտրես զավակիդ, հետո մի ոսկոր տան, այն էլ՝ վստահ չլինես քո՞ երեխան է, թե՞ ոչ »։

Որդեկորույս մայրը վստահ է՝ այս գործելաոճը պատահական չէ ու տեխնիկական պատճառով չէ, որ զոհվածների անվանական ցուցակները չեն հրապարակվում։ «Սա կոչվում է հիբրիդային պատերազմ, տեռոր հասարակության դեմ, որեւէ բան պատահական չէ, տարբեր միջոցներով իրենք թիրախավորում են ժողովրդի տարբեր հատվածներին եւ իրենց այլանդակ նպատակներն առաջ են տանում», -համոզված է Նաիրա Մելիքյանը։

44-օրյա պատերազմում զոհված Հայկ Մելիքյանի մայրը կասկածներ ունի՝ այսկերպ իշխանությունը փորձում է մեր կորուստների իրական պատկերը թաքցնել հասարակությունից։ Նա հիշեցնում է, որ Նիկոլ Փաշինյանն առաջին անգամ խոսեց 49 զոհի մասին, հետո հայտնեց 135 զոհվածի մասին, որից հետո հայտնի դարձավ, որ ադրբեջանական կողմը մարմիններ է փոխանցել։ «Այսօր նորից ադրբեջանական կողմը մարմիներ է տվել, նախորդ անգամ տվել է եւ երբ հարց ես տալիս՝ նախորդ անգամ փոխանցված թվերը ներառվա՞ծ են ձեր հայտարարծ 207 զոհի ընդհանուր թվի մեջ, իրենք անորոշ են պատասխանում։ Մենք բազմաթիվ անգամներ ասել ենք, որ երեխաներին զորակոչում են զինկոմիսարիատներից, բացի այդ , յուրաքանչյուր զորամասում զինծառայողները անհատական գործեր ունեն, վայրկյանական կարող են պարզել՝ երեխաներից ով կա այնտեղ եւ այդ թիվը զեկուցել, այսինքն, սա միանշանակ արվում է ժողովրդին կրկին անտեղյակության մեջ պահելու համար, թվերը կոծկելու համար եւ, ինչպես ասացի, ծնողական համայնքին պատանդի կարգավիճակում պահելու համար, որ մարդիկ որեւէ քայլի չդիմեն։ Մինչեւ օրս գերիների ծնողները վախենում են որեւէ բան անել, որովհետեւ իրենց համոզել են, թե որ րոպեին ծպտուն հանեք, ձեր երեխաներին Ադրբեջանում կմորթեն։ Շանտաժի են ենթարկում ամբողջ հասարակությանը եւ հատկապես ծնողական համայնքին»,-փաստում է Նաիրա Մելիքյանը։

Նշենք, որ ՀՀ կառավարության սեպտեմբերի 16-ի նիստում վարչապետ Նիկոլ Փաշինյանը հայտարարել է 135 հաստատված զոհի մասին։ Սեպտեմբերի 17-ին ՊՆ-ն պաշտոնապես հաստատեց, որ Ադրբեջանը հայկական կողմին է հանձնել 32 հայ զինվորի մարմին։ Սեպտեմբերի 19-ին ՀՀ անվտանգության խորհուրդը հայտարարեց, որ ագրեսիայի հետեւանքով զոհվածների եւ անհետ կորածների թիվը հասնում է 207-ի, իսկ այսօր՝ սեպտեմբերի 20-ին ՊՆ-ն պաշտոնապես հաստատեց, որ Ադրբեջանը եւս 95 հայորդու մարմին հանձնել է Հայաստանին։

«Փաստինֆո»-ն ՊՆ-ից փորձեց պարզել, թե, ի վերջո, այսօրվա դրությամբ որքան հաստատված զոհ ունենք՝ սեպտեմբերի 13-14-ին Ադրբեջանի կողմից Հայաստանի դեմ սանձազերծած պատերազմի հետեւանքով։ ՊՆ-ից պնդում են՝ վերադարձված մարմինները ներառված են ԱԽ-ի հայտարարած 207 զոհված և անհետ կորածների թվի մեջ։ Սակայն շարունակում է հարց մնալ՝ Փաշինյանի հայտարարած 135 զոհի մասին տվյալը եւս ներառո՞ւմ էր դրա հաջորդ օրերին ադրբեջանցիների կողմից փոխանցված հայորդիների մարմինները, թե՞՝ ոչ։

Նաիրա Մելիքյանը կարծում է՝ հայ հասարակությունը մեկ միջոց ունի ստեղծված աղետալի իրավիճակից դուրս գալու, դա համախմբումն է։ Ցավոք , այդ համախմբումը որեւէ կերպ տեղի չի ունենում։ Ես հասկանում եմ, որ նոր առաջացած ծնողական համայնքը հիմա ի վիճակի չէ, շոկի մեջ է , բայց արդեն 44-օրյա պատերազմում զոհվածների ծնողները, որ անցել են այդ ամբողջ դժոխքի միջով , որոշակիորեն սթափվել են, մենք 5 հազար զոհ ունենք, քանի-քանի անհետ կորած ու գերի, այդտեղ կարլի էր մեծ համայնք ձեւավորել եւ միասնական ճակատով հանդես գալ։ Ցավոք սրտի դա չի իրականանում, հասարակությունը շարունակում է մնալ պառակտված, անտարբեր եւ արդյունքում, ունենում ենք նոր զոհեր ու նոր կորուստներ։ Միակ տարբերակը համախմբումն է»,-եզրափակել է որդեկորույս մայրը։

Աղբյուր` Փաստինֆո