Փաստ ինֆո

Այս իշխանությունները ադրբեջանական վերջին ագրեսիայի հետևանքով հայկական կողմի զոհերի, անհետ կորածների և գերիների հստակ թվերին չեն տիրապետում, քանի որ Ադրբեջանը հրաժարվում է տվյալներ տրամադրել մեր իշխանություններին: Իրենք այլևս քաշ ու կշիռ չունեն, որ Ադրբեջանի հետ երկկողմ բանակցությունների արդյունքում կարողանան իմանալ՝ ինչքան գերի ունենք կամ ինչքան զոհ ունենք, թվերը կարողանում են ճշտել Կարմիր խաչը կամ ռուս խաղաղապահները ու փոխանցում իրենց, դրա համար էլ հակասական թվեր են ասում, ամեն մեկը մի տվյալ է ասում ու խառնաշփոթ ստեղծում: «Փաստինֆո»-ի հետ զրույցում նման դիտարկում է արել ԱԺ նախկին պատգամավոր Նաիրա Զոհրաբյանը.

Հիշեցնենք՝ ՀՀ կառավարության սեպտեմբերի 16-ի նիստում վարչապետ Նիկոլ Փաշինյանը հայտարարել է 135 հաստատված զոհի մասին՝ նշելով, որ թիվը վերջնական չէ։ Սեպտեմբերի 17-ին ՊՆ-ն պաշտոնապես հաստատեց, որ Ադրբեջանը հայկական կողմին է հանձնել 32 հայ զինվորի մարմին։

Սեպտեմբերի 19-ին ՀՀ անվտանգության խորհուրդը հայտարարեց, որ ագրեսիայի հետեւանքով զոհվածների եւ անհետ կորածների թիվը հասնում է 207-ի, իսկ այսօր՝ սեպտեմբերի 20-ին, Ադրբեջանը եւս 95 հայորդու մարմին հանձնել է Հայաստանին։

«Փաստինֆո»-ն ՊՆ-ից փորձեց պարզել, թե, ի վերջո, այսօրվա դրությամբ որքան հաստատված զոհ ունենք, ինչին ի պատասխան ՊՆ-ից պնդեցին, որ վերադարձված մարմինները ներառված են ԱԽ-ի հայտարարած 207 զոհված և անհետ կորածների թվի մեջ։

Սակայն շարունակում է հարց մնալ՝ սեպտեմբերի 16-ին Փաշինյանը հայտարարելով 135 զոհի մասին՝ նկատի էր ունեցել նաեւ այն, որ հետագա օրերին Ադրբեջանը 127 հայորոդու մարմի՞ն է հանձնելու՞։ Այսինքն՝ մեզ մոտ ունեցել ենք միայն 8 մարմի՞ն ։

Նաիրա Զոհրաբյանի դիտարկմամբ՝ տարբեր տեղերից են տվյալներ ստանում, միասնական համակարգ չկա։ «Իրենք միասանական աշխատել չգիտեն, չգիտեն, որ տարբեր թվեր հրապարակել չի կարելի, չեն հասկանում, որ էթիկայի և բարոյականության հարց է սա, չգիտեն, որ ծնողները հիմա Կապանում կամ Ջերմուկում ընկած իրենց երեխաների դիերն են փորձում գտնել, քանի որ հայի կյանքն առ ոչինչ է»,-ասաց նա:

Բացի սա, վերջին շրջանում նկատելի խառնաշփոթ է նաև հասարակության շրջանում, տարբեր անհատներ ու ֆեյսբուքյան օգտատերեր հորդորում են պատրաստել ապաստարանները, իջնել նկուղներ, խոսակցություններ են տարածում թշնամական դիվերսիոն խմբերի քաղաքներ ներթափանցելու մասին՝այսպիսով խուճապային տրամադրություններ առաջացնելով հանրության մոտ։

Թե ի՞նչ նպատակով է հասարակության մոտ խուճապային տրամադրություններ տարածվում, արդյո՞ք սա միտումնավոր է արվում և արդյո՞ք այն ավելի չի խանգարի նման իրավիճակում՝ Զոհրաբյանն ասաց, որ երկու պատճառ է այստեղ տեսնում:Առաջին՝ խուճապ միտումնավոր է տարածվում, որ մարդիկ չկազմակերպվեն, չմոբիլիզացվեն, մտածեն՝ ոնց փախչեն, որպեսզի պայքարող մասսա չլինի երկրում, տարբերակ երկրորդ՝ իշխանությունը չի կարողանում ճիշտ կազմակերպել, մարդկանց ճիշտ բացատրել, որ խուճապ չառաջանա, դրա համար էլ տարբեր գործիչներ այս գործառույթն իրենց ձեռքն են վերցնել և խառնաշփոթային վիճակ է առաջացել.

«Այն, որ նորմալ, ցիվիլ հասարակություններում, ոչ միայն պատերազմական իրավիճակներում, ոչ միայն վտանգի ժամանակ ապաստարանները պետք է կարգի բերվեն, հաշվարկվեն, քաղաքացիներին պետք է բացատրեն՝ հնարավոր օդային տագնապ դեպքում անհրաժեշտ քայլերը, ինչպես դա արվում է եվրոպական բոլոր երկրներում՝ անկախ նրանից պատերազմ կա, թե չկա, միանշանակ է:Տրամաբանական է, որ հիմա ԱԻՆ-ը սկսել է հաշվառել նկուղները,մաքրել դրանք, բայց այն, որ հասարակությունն իմանում է դա այլ աղբյուրներից, բլոգերներից անհատներից, սա նորմալ չէ, ամեն մեկն իր տարբերակով ու իր մեկնաբանությամբ իր կարծիքն է ներկայացնում: Ես այստեղ տեսնում եմ դիտավորություն, թե ինչո՞ւ իշխանությունն այս խնդիրը պաշտոնապես չի վերցնում իր ձեռքը, չի ասում, որ այս պահին որևէ վտանգ չկա, բայց այդուհանդերձ, նկուղները պետք է կարգի բերվեն, որովհետև պատերազմական վիճակ է, որևէ մեկը չի խանգարելու Ալիևին՝ որ նորից սկսի կրակել, ո՛չ Արևմուտքն է խանգարելու, ո՛չ Ռուսաստանը, մենք ունենք թշնամի, որը դեռևս խնդիր ունի լուծելու՝ արդեն ՀՀ ինքնիշխան տարածքում, ուստի ոչինչ չի բացառվում»,-ասաց նա:

Աղբյուր` Փաստինֆո