Փաստ ինֆո

Ակնհայտ է՝ եթե ազարբայջան սարքովի պետության սանձազերծած պատերազմում հերոսաբար զոհված հայ արիների անունները մեկ առ մեկ չի շեշտվում, նրանց հերոսությունների մասին չի պատմվում, նրանց ծնողները պետական մակարդակով չեն իրազեկվում, ուրեմն, ինչ-որ բան այն չէ: Ուրեմն, իշխանություն ասվածը ազնիվ չէ իր քաղաքացիների հետ: Ազնիվ չէ , ինչպես 44-օրյայում, երբ պոպուլիզմի՝ «հաղթում ենք, հաղթում» ամենօրյա բարձրության ալիքները մեկեն հանկարծ դադարեցին և․․․հաղթանակը դարձավ պարտություն։

Նույն կերպ՝ հերթական անգամ ազնիվ չեղավ հայրենիքի սահմանը պահող զինվորի հետ, երբ հայրենիքի պաշտպանին զորակոչում էր՝ բացարձակ չկահավորած, անդուռ, անլուսամուտ, նաև՝ վրանային հայաստանյան զորամասեր, որոնց վերականգնմանն ու շինարարությանը պիտի ձեռնմուխ լիներ 2020-ի նոյեմբերի 10-ից սկսյալ։ Քանզի՝ 2016-ին՝ քառօրյա պատերազմում նման նախադեպ ունեցել էինք Արցախում և պատկան կառույցները քաջ գիտեին՝ ինչպես, ինչ արագությամբ, համազգային պատրաստակամությամբ և ինչ սիրով պիտի զորամասերը նախագծվեին, կառուցվեին, վերակառուցվեին, կահավորվեին․․․Ուղղակի ոչինչ չեն արել, չեն ցանկացել անել։ Միտումնավոր։ Հատուկ։

Եվ որքան էլ կառավարության նիստերի ժամանակ պոպուլիզմը օդում թևածեր, թե՝ գաղտնի ինֆորմացիա է, թե՝ պաշտպանական կառույցները, վերականգնվում են, խրամատները՝ փորվում, մեր անզեն աչքը տեսնում էր, որ բոլոր բարձունքները թշնամաբար նվիրվում էին թշնամուն, որ ոչինչ չէր արվում, որ բանակը կազմաքանդվում էր, իսկ իշխանության պահապան՝ զանազան գույնի՝ ոստիկանական բրիգադները գնալով ուռճանում․․․

Չիշխանության հանգույն այս իշխանության անազնիվ վարքը տարօրինակ է և շարունակական։ Թշնամական։ Զինվորների ծնողների հանդեպ, և բոլորիս, բոլորիս։ Անըմբռնելի։ Նորմալ մարդու ուղեղում չտեղավորվող բաներ են կատարվում։

Հայության հանդեպ թշնամական է այն ամենը, ինչ տեղի է ունենում «նիկոլի թվին»։

Դաժան դեժավյու է, արցախյան սահմռկեցուցիչ տեսարանները Հայաստանում են կրկնվում՝ արդեն՝ հարյուրավոր զոհեր, գերիներ, գերիների հանդեպ՝ ադրբեջանաթրքական ահաբեկիչների ցեղասպանական դրսևորումներով․․․ Մեր անգին զոհերի մարմինները նորից մարդակերների միջով անցնելով են վերադառնում տուն։

Սեպտեմբեր 21-ի նախօրյակ՝ դաժան դեժավյու․․․

Հեղինակ՝ Ա․Ե․

Աղբյուր` Փաստինֆո