Փաստ ինֆո

Հիմնադրվել է Իրավունքի և արդարության կենտրոն «Թաթոյան» հիմնադրամը, որն արդեն ունի հռչակած նպատակներ՝ Հայաստանում ժողովրդավարության և իրավունքի գերակայության ամրապնդումը, մարդու իրավունքների և սոցիալական արդարության, ազգային անվտանգության ապահովումը, գիտակրթական և հետազոտական գործունեությունը, հանրային իրազեկումների միջոցով հասարակությունում գիտելիքների մակարդակի բարձրացումը, հասարակությունում փոխադարձ հարգանքի, բազմակարծության և հանրային համերաշխության ապահովումը, Հայաստանի, Արցախի և Հայկական սփյուռքի միջև կապերի, համահայկական համերաշխության ապահովումը և ազգային արժեքների պաշտպանությունը։ Այս մասին լրագրողների հետ հանդիպմանն ասաց ՀՀ նախկին ՄԻՊ Արման Թաթոյանը՝ հայտարարելով ակտիվ հանրային գործունեություն սկսելու մասին։

Թաթոյանի դիտարկմամբ՝ այդ հիմնադրամը չունի կոնկրետ օլիգարխի և մեծահարուստի ֆինանսավորում, այն հիմնված է սփյուռքի մեր հայրենակիցների, անհատների ֆինանսավորման վրա։ Բացի այդ՝ հիմնադրամում աշխատում են ՄԻՊ աշխատակազմի նախկին աշխատակիցները։

Թաթոյանը նաև տեղեկացրեց, որ արդեն զեկույց է հրապարակվել, որտեղ հատուկ շեշտադրվում է, որ Ադրբեջանի իշխանությունները շարունակում են թշնամանքը, ատելությունը։

«Ադրբեջանական իշխանությունների թշնամանքի քաղաքականության երկու հիմքերը, որոնք եղել են, այդպես էլ՝ գնում է՝ կրոնական և էթնիկ, ինչը դրսևորվում է ամենադաժան հանցանքներով, հանցանքների խրախուսմամբ»,- նշեց Թաթոյանը։

Աղբյուր` Փաստինֆո