Փաստ ինֆո

Ադրբեջանական ագրեսիայի հետևանքով Ջերմուկի ուղղությամբ մղված մարտերում զոհվել է պարտադիր ժամկետային զինծառայող Կարեն Գասպարյանը։ 19-ամյա Կարենը Երևանից էր, բանակ էր զորակոչվել 2022թ հունվարին։ Ապագա երաժիշտը սովորում էր Ռոմանոս Մելիքյանի անվան պետական երաժշտական քոլեջում, թառահար էր, միաժամանակ սովորում էր Ջիվանու անվան աշուղական դպրոցի վոկալի բաժնում։

Ռոմանոս Մելիքյանի անվան պետական քոլեջից «Փաստինֆո»-ի հետ զրույցում պատմեցին, որ Կարենը կազմակերպված, պարկեշտ, հարգալից էր, լավ ուսանող, շատ լավ տիրապետում էր գործիքին։

Կարենը չորրորդ կուրսում էր սովորում, հնարավորություն ուներ տարկետում վերցնելու և ավարտելուց հետո միայն բանակ զորակոչվելու, սակայն նախընտրել է հայրենիքին պարտքը տալ, հետո՝ վերադառնալ և շարունակել ուսումը։

Կարենի մոտ ընկերը՝ Նարեկը, «Փաստինֆո»-ի հետ զրույցում ասաց, որ Կարենը շատ հումորով, ընկերասեր, բարի էր, Կարենի նման երկրորդը երևի չկա։ Տան կրտսեր զավակն էր, ուներ ավագ քույր։ Ընկերը պատմեց, որ Կարենը դիրքեր է բարձրացել՝ սեփական դիմումի համաձայն, իրեն դիրքեր չէին տանում, ինքն է դիմում գրել, որ բարձրանա։

Հիշեցնենք, որ սեպտեմբերի 12-ի լույս 13-ի գիշերը՝ ժամը 00:05-ից, Ադրբեջանի ԶՈՒ ստորաբաժանումները Գեղարքունիքի, Սյունիքի եւ Վայոց Ձորի մարզերի ուղղությամբ հրետանային միջոցներից, խոշոր տրամաչափի հրաձգային զինատեսակներից սկսել են ինտենսիվ կրակ վարել հայկական դիրքերի ուղղությամբ՝ կիրառելով նաև ԱԹՍ-ներ: ՀՀ վարչապետ Նիկոլ Փաշինյանը ԱԺ-ում հայտարարել է, որ Ադրբեջանը նախ ռազմական գործողություններ է սկսել 4, ապա նաեւ եւս 2-3 ուղղություններով։ ՀՀ ՊՆ ԳՇ պետը պաշտոնապես հաստատել է, որ Ադրբեջանը 6 ուղղությամբ դիրքային առաջխաղացում է ունեցել՝ գրավելով ՀՀ սուվերեն տարածքից 7,5 կմ։

Նիկոլ Փաշինյանը ՀՀ կառավարության սեպտեմբերի 16-ի նիստում հայտարարել էր, որ ունենք հաստատված 135 զոհ՝ նշելով, որ թիվը վերջնական չէ։ Սեպտեմբերի 17-ին Ադրբեջանը հայկական կողմին է փոխանցել 32 մարմին, սեպտեմբերի 20-ին՝ ևս 95 զինծառայողի մարմին։

Հեղինակ՝ Իզաբել Սահակյան

Աղբյուր` Փաստինֆո