Փաստ ինֆո

Նենսի Փելոսիի այցը Հայաստանին ոչինչ էլ չտվեց, հերթական անգամ մենք «բարոյական հաղթանակ» տարանք, բայց թե կոնկրետ ի՞նչ շահեց Հայաստանը Փելոսիի այցից, ապագան ցույց կտա, ամեն դեպքում որևէ տեղ չերևաց, որ կողմերը պայմանավորվածության են եկել Հայաստանին օգնելու հարցում, փոխարենը Փելոսին իր այցին զուգահեռ կարողացավ քայլ կատարել հայ-իրանական հարաբերությունները փչացնելու համար, որը անթույլատրել էր։ Պետք չէր Փելոսիին տանել ու կանգնեցնել «Վարդանանց» կտավի դիմաց, դա կարող է տարածաշրջանում մեծ սկանդալի հանգեցնել, սա իր ազդեցությունը կունենա հայ-իրանական հարաբերությունների վրա: «Փաստինֆո»-ի հետ զրույցում նման դիտարկում է արել միջազգայնագետ Գրիգոր Բալասանյանը:

Ըստ փորձագետի՝Փելոսիի այցը Հայաստան ուներ երկու հիմնական նպատակ՝ ընտրությունների շեմին արժանանալ հայ համայնքի ձայներին, իսկ երկրորդ թիրախը Իրանն էր: Գրիգոր Բալասանյանի կարծիքով՝ Փելոսին եկել էր նաև Իրանի հետ հնարավոր առճակատման ֆոնին հայ-իրանական սահմանի փակման հարց քննարկելու, բայց հայկական կողմը, հավանաբար, հասկացել է, որ լրջագույն աղետի սա կարող է հասցնել և չի համաձայնվել:

Նշենք, որ այս ամենին զուգահեռ, երեկ Երևանի տարբեր հատվածներում հակառուսական ակցիաներ են իրականացվել՝ ՀԱՊԿ-ից դուրս գալու պահանջով:
Գրիգոր Բալասանյանն ընդգծում է ՝ սա ևս լուրջ հետևանքներ է ունենալու, բայց ցավալի է, որ մի քանի հոգու կազմակերպած ցույցի պատճառով կարող է ողջ ազգը տուժել, ինչն անընդունելի է:

«Ինչ վերաբերում է ցուցարարներին, ապա հաճելի չէր տեսնել՝ Փելոսիի ուղղությամբ մեկ-երկու ռեվերանս անելու համար, ինչպես էին իրար ձեռքից բարձրախոս խլում «հայրենասերները», որոնք կանգնել էին Արամ Խաչատրյանի արձանի հետևում և փորձում էին Պապից ավելի կաթոլիկ երևալու տեխնոլոգիայով ցույց տալ, թե իրենցից ով է ավելի ամերիկամետ, իսկ երբ խոսում են Ռուսաստանի հետ հարաբերությունները փչացնելու կամ ՀԱԿՊ-ից դուրս գալու մասին, և կարծում են, թե մեզ գրկաբաց կընդունի ԱՄՆ-ն, ապա չարաչար սխալվում են: Այս մարդիկ ճիշտ կլինի ասեն՝ ի՞նչ հետևանքներ սա կունենա Հայաստանի և հայ ժոովրդի համար, միայն ֆիզիկական անվտանգության մասին չէ խոսքը, իրե՞նք են արդյոք վճարելու գազի համար, եթե վատթարացնենք հարաբերությունները Ռուսաստանի հետ, ատոմակայանի վառելիքը որտեղի՞ց ենք բերելու, դրա այլընտրանք չկա, այս դեպքում հոսանքի և էներգետիկ ճգնաժամի համար ովքե՞ր են պատասխան տալու, իրենք հասկանում են՝ ի՞նչի խնդիրների մեջ են մտցնում հայ ժողովրդին»,-ասաց Բալասանյանը:

Փորձագետը նշում է՝ ցանկացած ռազմաքաղաքական դաշինքում դժգոհություններ լինում են, բայց դիվանագիտությունը նրա համար է, որ նստեն ու հստակ խոսեն, շտկեն այն բոլոր սխալները, որոնք թույլ են տվել 30 տարվա ընթացքում և հասկանան պատճառը, որ Ռուսաստանի հետ հարաբերություններում հաճախ ունենում ենք ճգնաժամ.

«Դա նույնն է, որ հույները հայտարարեն, թե Թուրքիայի հետ սահմանային խնդիրների պատճառով դուրս են գալիս ՆԱՏՕ-ից, քանի որ իրենց չի պաշտպանում ՆԱՏՕ-ն: Մի ռազմաքաղաքական դաշինիքից դուրս գալ, այն էլ հույս չունենալով, որ մյուս ռազմաքաղաքական դաշինքում մեզ կընդունեն, սա քաղաքական ավանտյուրա է, որը կարող է լուրջ խնդիրներ առաջացնել հայ ժողովրդի ֆիզիկական անվտանգության առումով՝ ընդհուպ մինչև Հայաստանի կորուստ»,-ասաց նա:

Զրույցի վերջում փորձագետն ընդգծել է, որ այս տարածաշրջանում Ռուսաստանի և Իրանի այլընտրանքը Թուրքիան է, իսկ եթե ինչ-որ մեկին թվում է՝ թե Անգլիան, Ֆրանսիան կամ ԱՄՆ-ն կարող են գալ և այստեղ եղանակ ստեղծել, ապա չարաչար սխալվում են, դա նշանակում է, նրանք ընդհանրապես պատմություն չգիտեն և մեր տարածաշրջանը չեն պատկերացնում.

«Այս տարածաշրջանը միշտ էլ գտնվել է 3 գետերությունների՝ Ռուսական կայսրության, Պարսկաստանի կամ Օսմանյան կայսրության հետաքրքրությունների կիզակետում, որ պահին հայերը, տուրք տալով մոդային և արևմտյան գործընկերների հորդորներին, փորձում են շեղվել իրենց արտաքին քաղաքական օրակարգից, իրենց կողմնորոշումից և հույսը դնում են Արևմուտքի վրա, պատժվում են՝ և՛ կորցնելով տարածք և՛ կանգնելով պետություն չունենալու վտագի առաջ: Սա ուղիղ 100 տարի առաջ եղավ, երբ Հայաստանի առաջին հանրապետությունն այդպես էլ չհասկացավ, որ Սևրի պայմանագրի հետ պետք չէ հույս կապել և կանգնեց փաստի առաջ՝ ունենալով ընդամենը 12 հազար ք/կմ տարածքով պետություն, երկրորդ անգամ այս ճոխությունը չի կարող Հայաստանն իրեն թույլ տալ և նույն պատմական սխալը կրկնել»,-ասաց Բալասանյանը:

Աղբյուր` Փաստինֆո