Փաստ ինֆո

Նենսի Փելոսիի այցը մեսիջ էր առ այն, որ ԱՄՆ-ում ամեն ինչ շատ լավ հասկանում են, պատկերացնում են և գիտեն՝ ով է իրականում ագրեսորը և ինչ գործողություններ են իրականացվել Հայաստանի սուվերեն տարածքի դեմ, նրանք ի լուր աշխարհի բարձրաձայնեցին, որ ագրեսոր կողմն Ադրբեջանն է և մեզ հնարավորություն տվեցին այդ հայտարարությունները օգտագործել նաև տեղեկատվական դաշտում: Շատ կարևոր է, երբ թիվ 1 գերտերության 3-րդ դեմքն այցելում է Հայաստան և նման գնահատականներ է տալիս, սա կարող ենք մենք կիրառել նաև մեր արտաքին քաղաքականության օրակարգում: «Փաստինֆո»-ի հետ զրույցում ասել է միջքազգայնագետ Սուրեն Սարգսյանը՝ ամփոփելով ԱՄՆ Կոնգրեսի Ներկայացուցիչների պալատի խոսնակ Նենսի Փելոսիի այցը Հայաստան:

Ըստ Սուրեն Սարգսյանի՝ այցը ԱՄՆ-ի կողմից աջակցություն էր մեզ, եւ այս պահին լավ հնարավորություն է տրված հայկական կողմին՝ օգտագործել այցը՝ մեր շահերն առաջ տանելու տեսանկյունից.

«Փելոսիի այցում կար և՛ քաղաքական, և՛ ներքաղաքական կոմպոնենտ, ներքաղաքական կոմպոնենտում հայերի նկատմամբ նրա դրական վերաբերմունքն էր, նա հայերի նկատմամբ միշտ էլ լավ է տրամադրված եղել և միացել որոշ հայամետ նախաձեռնությունների։ Սա էլ այդ հայամետ նախաձեռնություններից մեկն էր, որն իրականացրեց »,-ասաց Սարգսյանը:

Հարցին՝ այցից հետո արդյո՞ք հայկական կողմը կարող է ռազմական կամ այլ օգնություն ակնկալել ԱՄՆ-ից, Սուրեն Սարգսյանն ասաց.

«Մի քիչ դժվար եմ պատկերացնում, որ նման աջակցություն այս պահին Հայաստանը ստանա, դրա համար շատ աշխատանք կա անելու, ինչպես Փելոսին նշեց՝մենք պետք է հասկանանք,թե ամերիկացիներից ինչ ենք ուզում, և այդ օրակարգով գնանք նրանց հետ խոսելու »:

Հայազգի կոնգրեսական Անն Էշոուն հայտարարեց, որ ԱՄՆ Կոնգրեսն արդեն իսկ մշակել է բանաձև, որը դատապարտում է Ադրբեջանի ագրեսիան։ Սուրեն Սարգսյանը չի բացառում , որ Կոնգրեսում կյանքի կոչեն նաև 907-րդ բանաձևը, ինչը կնշանակի հստակ պատժամիջոց Ադրբեջանի նկատմամբ

Փելոսին Երեւանի Գաֆէսճյան կենտրոնում իր ելույթի ժամանակ կանգնել էր Գրիգոր Խանջյանի «Վարդանանց» կտավի դիմաց և հիշեցնում հայ-պարսկական պատերազմի մասին:

Հարցին՝ արդյո՞ք սա կարող է միջազգային սկանդալի պատճառ դառնալ, Սարգսյանն ասաց, որ պետք չէ այդ դրվագի վրա կենտրոնանալ.

«Հիլարի Քլինթոնն էլ, երբ եկել էր Հայաստան, նույն այդ կտավի ֆոնի վրա ելույթ էր ունենում, բայց չեմ կարծում, դրա վրա պետք է կենտրոնանալ »,-ասաց Սարգսյանը:

Աղբյուր` Փաստինֆո