Փաստ ինֆո

ԱԺ նախագահ Ալեն Սիմոնյանի հայտարարությունը կամ վկայում է մեր կառավարման համակարգի ողբալի վիճակի մասին, կամ արհեստականորեն խուճապ է տարածում՝ Վարդենիսից Կապան։ «Փաստինֆո»-ի հետ զրույցում ասել է պահեստազորի գնդապետ Հայկ Նահապետյանը։
Հիշեցնենք, որ Ալեն Սիմոնյանը երեկ երեկոյան Հանրային հեռուստաընկերության եթերում հայտարարել էր․«Կան ներթափանցած 1-2 խումբ, որոնց որոնողական աշխատանքներ են տարվում այս պահի դրությամբ։ Դրանք դուրս կմղվեն կամ այդ հարցը ռազմական առումով կլուծվի, եւ ենթադրում եմ, որ շատ արագ»։

«Փաստինֆո»-ի հետ զրույցում, անդրադառնալով Ա. Սիմոնյանի այս սկանդալային հայտարարությանը, ռազմական փորձագետ, պահեստազորի գնդապետ Հայկ Նահապետյանը նկատել է, որ կա երկու տարբերակ։ Տարբերակ 1՝ Ալեն Սիմոնյանի հայտարարությունը հերթական անգամ ցույց է տալիս մեր երկրի կառավարման համակարգի ողբալի վիճակը, եթե դա ասում է Ալեն Սիմոնյանը եւ ասում է շատ անորոշ ձեւով՝ չնշելով, թե որտեղ է եւ ինչ խումբ է։ Տարբերակ 2՝ Ալեն Սիմոնյանը արհեստականորեն Վարդենիսից մինչեւ Կապան խուճապ է տարածում, որովհետեւ, այդ խմբերը, տեսականորեն, պետք է ներթափանցած լինեն ռազմական գործողությունների ընթացքում ադրբեջամցիների ձեռք բերած դիրքային առավելության տարածքներից։

«Դա նշանակում է, որ այդ տարածքների բնակչության շրջանում, նվազագույնը, խուճապային տրամադրություններ են առաջացնում, թե ինչ նպատակով՝ թող ընթերցողը դատի»,- նշել է փորձագետը։

Հայկ Նահապետյանի խոսքով՝ խուճապային տրամադրությունները, վախի , անվտանգության բացակայության զգացողությունը այս հայտարարությունից հետո օբյեկտիվորեն կարող է առաջանալ ՀՀ ցանկացած քաղաքացու մոտ։ Ինչ վերաբերում է Սիմոնյանի ձեւակերպմանը, թե այդ խմբերը որոնվում են, Նահապետյանը նկատեց՝ այդ ձեւակերպումն ինքնին խոսում է նրա՝ անվտանգային եւ ռազմագիտական գիտելիքների մասին։

«Արդեն այդ ձեւակերպումը խոսում է այդ հայտարարության բեսեդկային մակարդակի մասին, որովհետեւ նման տեղեկությունը ԱԺ նախագահը չէ, որ պետք է հայտնի։ Դրա համար կան համապատասխան մարմիններ, որոնք զգուշացնում են տվյալ տարածքի բնակիչներին՝ լինել զգոն, անվտանգությունն է ուժեղացվում, իսկ ընդհանրապես, այդ մասին չի էլ հայտարարվում, որովհետեւ համապատասխան մարմինները 1-2 խմբի թափանցման դեպքում հասարակության մոտ խուճապ չառաջացնելու նպատակով ուղղղակի աշխատում են, աշխատում են համապատասխան մարմինները՝ բանակի, հատուկ ծառայությունների, ԱԻՆ-ի, աշխարհազորի համապատասխան ստորաբաժանումները։ Այդ բոլոր օղակները ներգրավվում են այդ խմբերի չեզոքացման աշխատանքներում եւ դրա մասին չեն բարձրաձայնում։ Եթե պատկերացնենք, որ դա ԳՇ պետը ասեր, որը վերջին 3 օրերի վերաբերյալ տեղեկություններ հաղորդեց կամ ասեր ԱԱԾ տնօրենը, պետք է որոշակիացնեին, ոչ թե վերացական ասեին, ինչպես ասաց Ալեն Սիմոնյանը, իսկ քանի որ նրանք , ընդհանրապես, նման դեպքերում չեն խոսում այդ մասին, այլ համապատասխան գործողություններ են ձեռնարկում, նշանակում է՝ Ալեն Սիմոնյանը մեկ խնդիր է լուծել՝ չիմացությամբ, թե կանխամտածված, խուճապ է առաջացրել»,-ասաց Հայկ Նահապետյանը՝ ընդգծելով, որ սա, ինչպես Փաշինյանն է ասում՝ տեղեկատվական դիվերսիա է ՀՀ քաղաքացիների նկատմամբ։

«Ես համակարծիք եմ Փաշինյանի ՝ այդ ձեւակերպմանը, կոնկրետ այս պարագայում»,-նշեց Նահապետյանը։

Ինչ վերաբերում է այս հայտարարությամբ պայմանավորված, արտակարգ կամ ռազմական դրություն մտցնելու համար հող նախապատրաստելու հավանականությանը, Նահապետյանն ասաց՝ մեկ-երկու խմբի համար արտակարգ կամ ռազմական դրություն չեն մտցնում, բայց այդ տեղեկությունը, որը դառնում է ինֆորմացիոն դաշտում ամենաքննարկվող թեման, խոսում է այն մասին, որ դրա նպատակը գուցե եղել է քաղաքացիներին շեղելը , իրականությունը գնահատելու հնարավորությունից։

«ԳՇ պետը հակառակորդի ներխուժման մասին տեղեկությունը տվեց միայն խորությամբ եւ երկարությամբ, բայց , եթե այս գնահատականը բացենք կորցրած հենակետերի քանակով, ռազմավարական նշանակության բարձունքների, ՀՕՊ եւ ՌԷՊ կայանքների, տեխնիկայի զոհվածների, վիրավորների եւ գերեվարվածների փաստերով, կարծում եմ, որ տեղեկատվական օրակարգը բոլորովին այլ կլիներ եւ մեր երկրի քաղաքացիների վերաբերմունքը իշխանությունների նկատմաբ՝ դրանով պայմանավորված, էլ ավելի բացասական կլիներ։ Հակառակ պարագայում, անիմաստ է վերացական խուճապ առաջացնելը»,-ասաց Նահապետյանը։

Անդրադառնալով ԳՇ պետի հայտարարությանը, թե շրջափակված խումբ կա, որին կտրում են կենսագործունեության հնարավորությունից, Հայկ Նահապետյանը ասաց, որ օբյեկտիվ են հանրության կողմից հնչող հարցադրումները, թե այդ խումբն ինչու չի ոչնչացվում կամ գերեվարվում՝ հետագայում մեր գերիների հետ փոխանակվելու նպատակով։

«Եթե կա այդ խումբը, ինչու՞ չի արվում այդ երկու գործողություններից մեկը, եթե հավատանք ԳՇ պետին, ապա չեմ բացառում, որ ադրբեջանական զինուժի որոշ ստորաբաժանումներ ծանր վիճակում են, բայց հայկական կողմի համար եւս դժվար է ոչնչացման կամ գերեվարման օպերացիա իրականացնել, այսինքն, հնարավոր է, որ սա մի վիճակ է, որ հայկական կողմը այդ մասին ասաց, հավանաբար, ցույց տալու, որ մենք էլ որոշակի հաջողություններ ունենք։ Սա քարոզչական էլեմենտ է պարունակում, հակառակ դեպքում դրա մասին չպետք է բարձրաձայնեին, պետք է իրականացնեին օպերացիա՝ ոչնչացնել կամ գերեվարել ապա արդյունքների մասին մեր քաղաքացիներին տեղեկացնեին»,-նշեց Նահապետյանը՝ չբացառելով, որ ադրբեջանական որոշ ստորաբաժանումներ, ամենայն հավանականությամբ, խորացել են, բայց մեր ուժերը չեն կարողանում նրանց ոչնչացենլ, իսկ նրանք էլ վտանգավոր վիճակում են հայտնվել։

Հայկ Նահապետյանը նաեւ չի բացառում, որ հայկական կողմն այդ հայտարարությունն արել է՝ ադրբեջանական կողմին ցույց տալու իր վեհանձնությունը, որը սակայն, ադրբեջանական վայրագությունների ֆոնին, ինչի մասին հայտնեց ԳՇ պետը, ըստ փորձագետի ոչ միայն ընկալելի չէ, այլեւ այդ մասին մտածելն անգամ ՝ վիրավորական է։

Աղբյուր` Փաստինֆո