Փաստ ինֆո

Ադրբեջանն ամեն կերպ հրաժարվում է Հայաստանի հետ սահմանազատում և սահմանագծում իրականացնել ԽՍՀՄ քարտեզներով, քանի որ ինքն իրեն չի համարում Խորհրդային Ադրբեջանի իրավահաջորդ, այլ համարում է 1918-1920 թթ-ի Դեմոկրատական Ադրբեջանի իրավահաջորդ։ Բացի սա, ԽՍՀՄ քարտեզները իրենցից հստակ սահմաններ են ենթադրում և վկայում որոշակի տարածքների Ադրբեջանի կազմում չլինելու մասին, հենց սրանից է Ադրբեջանը խուսափում, գիտի՝ եթե համաձայնվի, ապա կարող են իրեն այնպիսի քարտեզ պարտադրել, որ ստիպված լինի հրաժարվել ոչ միայն Արցախի, այլ նաև անկլավների նկատմամբ նկրտումներից: «Փաստինֆո»-ի հետ զրույցում նման տեսակետ է հայտնել ադրբեջանագետ Գառնիկ Դավթյանը:

Զրուցակիցն ընդգծում է, որ ԽՍՀՄ քարտեզների դեպքում կարելի է վիճարկել Ադրբեջանի այլ տարածքներ մասով ևս, քանի որ Ադրբեջանին, տարբեր ժամանակներում, տարբեր պատրվակներով նույն Սյունիքից ու Գեղարքունիքից հատվածներից ինչ-որ տարածքներ են տրվել՝ կենդանիներիին արածացնելու կամ այլ նպատաներով:

Ըստ փորձագետի՝ հենց այս պատճառով էլ Ադրբեջանը, առհասարակ, խուսափում է քարտեզների մասին խոսել և նախընտրում է ընդհանրապես քարտեզների անուններ չլսել, այլ ռազմական հռետորաբանությամբ իր ուզածը պարտադրել.

«Սա առաջին հերթին խոսում է իր քաղաքական ամբիցիաների մասին, ինքը գիտի, որ եթե Հայաստանի հետ սահմաններն անցկացվեն քարտեզներով, ապա տարբեր ժամանակների քարտեզներ կան, որտեղ ընդհանրապես իր ասած անկլավները չեն ներառվում Ադրբեջանի կազմի մեջ, դրա համար փորձում է այս խնդրից խուսափել, ինչի համար էլ դիմում է բոլոր հնարավոր և անհնար մեթոդներին: Հայաստանը, ցավոք, չունի ողնաշարով քաղաքականություն, չի կարողանում ազդել այս գործընթացների վրա և ստիպել Ադրբեջանին, որ վերադառնա բանակցային սեղանի շուրջ»,-ասաց Գառնիկ Դավթյանը:

Զրուցակիցը չի հավատում, թե Ադրբեջանը երբևէ կհամաձայնվի իրավական հենք ունեցող քարտեզներով բանակցել Հայաստանի, բայց եթե անգամ համաձայնվի էլ, ապա դա կնշանաի, որ մեծ բան են խոստացել Ադրբեջանին:

Աղբյուր` Փաստինֆո