Փաստ ինֆո

Պետք է փոխարինել Նիկոլ Փաշինյանին: Նա արդեն ապացուցել է, որ աշխատում է ՀՀ շահերի դեմ և իր գործունեությամբ կամ անգործությամբ ՀՀ-ին նոր պատերազմի մեջ ներքաշեց՝ թողնելով նրան անպաշտպան: Եթե մեր բանակը հերոսաբար չդիմադրեր, անհամաչափ կորուստներ չհասցներ թշնամուն՝ մենք այսօր կարող էինք Սյունիքը կորցրած լինել: Այս մասին լրագրողների հետ զրույցում ասաց Ավետիք Չալաբյանը՝ հավելելով, որ այս իշխանությունն իր գործունեությամբ բերել է այն իրավիճակի, որ Հայաստանը մնացել էր մենակ և անպատրաստ:

Չալաբյանն ընդգծեց՝ չպետք է ունքը սարքելու փոխարեն աչքն էլ հանել և այս պայմաններում, եթե ուզում ես այս իշխանությունը փոխարինես այլ՝ ավելի գործունյա, ձեռահաս իշխանություն՝ պետք է այն ձևավորես փողոցում: Չալաբյանը հիշեցրեց «Ղարաբաղ կոմիտե»-ի ձևավորումը, երբ իշխանությունը ձևավորվել էր փողոցում, ինչը պետք է լինի այսօր և ոչ միայն հանրահավաքների միջոցով, այլև՝ կազմակերպված կառույցների ձևավորմամբ, ինչը հեշտ չէ, քանի որ ընդդիմության տարբեր թևեր իրար հետ բավարար չեն համագործակցում և բնակչությունը բավականին պառակտված է:

«Շան գլուխը թաղված է հենց այդտեղ՝ որն է լինելու այն արդյունավետությունը, որը կաշխատի, էլ ավելի չի վատթարացնի մեր վիճակը, որովհետև եթե գա նոր իշխանություն, որը ժողովրդի աջակցություն չունի, կամ գա նոր իշխանությւոն, որը ներսում գզվռտվում է, կամ գա իշխանություն, որին չեն ընդունի արտաքին աշխատում՝ չհամարելով լեգիտիմ, մեր վիճակն ավելի կվատթարացնի»,- ընդգծեց Չալաբյանը:

Աղբյուր` Փաստինֆո