Փաստ ինֆո

Իմպիչմենտի գործընթաց սկսելու՝ ընդդիմության սահմանադրական լիազորության վերաբերյալ մի շարք, այսպես կոչված, հանրային գործիչներ մանիպուլյատիվ մեկնաբանություններ են տալիս՝ տպավորություն ստեղծելով, թե, օրինակ, անգամ ընդդիմադիր մեկ պատգամավորի ստորագրությամբ՝ հնարավոր է, որ այդ գործընթացը սկսվի: Սա, հնարավոր է, քաղաքական դիվիդենտի առումով որոշակի նշանակություն ունենա, բայց իրավաբանական առումով՝ ունենք հստակ սահմանադրական մեխանիզմներ, որոնց առկայության պայմաններում՝ իմպիչմենտի գործընթացը կարող է հասնել վերջնարդյունքին: Այս մասին «Փաստինֆո»-ի հետ զրույցում ասաց իրավաբան Ռոբերտ Հայրապետյանը:

«Երեկ ընդդիմությունը երկար և հանգամանալից բացատրեց, որ առկա են սահմանադրական կոմպոնենտներ, որոնց առկայության պայմաններում կարող է սկսվել իմպիչմենտը: Հիմա ԱԺ «Պատիվ ունեմ» և «Հայաստան» խմբակցությունների հանրագումարը, համագումարը բավարար չէ իմպիչմենտի գործընթաց սկսելու համար, անհրաժեշտ է նաև իշխող խմբակցությունից 18 պատգամավոր, որի առկայության պարագայում գործընթացը կարող է առաջ գալ: Այսինքն՝ այս փուլում, հաշվի առնելով ընդդիմության փաստաթղթային պատրաստակամությունը, որ իրենք հայտնել են ստորագրություններով, դա առաջ տանելու համար անհրաժեշտ է մեկ միասնական վարչապետի թեկնածու և 18 համապատասխան ձայն, որոնց առկայության դեպքում կարող է գործընթացը սկսել: Քանի այդ պրոցեսը չկա, օրենքով սահմանված՝ 48 և 72 ժամյա ռեժիմները չեն գործում: Այսինքն՝ թյուրիմացությունը, որ հանրությանն է մատուցվում, որ հիմա պրոցեսը երեկ գիշերը տեղի է ունեցել և եթե մինչև 72 ժամյա տևողության ընթացքում գործընթացը չլինի, ապա տապալված է, դա էլ է մանիպուլյատիվ, քանի որ գործընթացի ժամանակահատվածի հաշվարկի իրավական առումով մեկնարկը սկսվում է ևս 18 պատգամավորների ստորագրության պարագայում »,- նշեց Ռոբերտ Հայրապետյանը՝ հավելելով, որ ընդդիմությունն իրենից հասանելիքը արել է, հանրությանը ցույց է տվել, որ իմպիչմենտի համար անհրաժեշտ ստորագրությունները տալիս են, հիմա՝ զբաղված են 18 պատգամավորի՝ գործընթացին միացնելու, համոզման գործընթացով և այդ 18 պատգամավորների ստորագրության պարագայում գործընթացը կսկսի:

«Այս փուլում խոսել գործընթացի տապալման մասին՝ այդքան էլ արժանահավատ չէ, որովհետև օրենքով սահմանված ժամկետների հոսքը դեռևս չի սկսվել: Մանիպուլյատիվ մի շարք հայտարարություններ են արվել, բայց ժամկետները չի կարող սպառվել, քանի դեռ ՔՊ-ական 18 պատգամավորի ստորագրություն և վարչապետի թեկնածու՝ չի ներկայացվել »,- նշեց Հայրապետյանը:

Հիշեցնենք, որ երեկ Նիկոլ Փաշինյանն ԱԺ-ում հայտարարել էր նոր փաստաթուղթ ստորագրելու մտադրության մասին, ինչից հետո Երևանում. Ստեփանակերտում, Գյումրիում ինքնաբուխ հավաքներ են իրականացվել; Երեկ ԱԺ շենքի մոտ հավաքվել են նաև ընդդիմադիր խմբակցությունների պատգամավորներ, որոնք ստորագրել են Նիկոլ Փաշինյանին անվստահություն հայտնելու համար փաստաթուղթ, սակայն հարցն օրակարգում ներառելու համար անհրաժեշտ է նաև ՔՊ-ական պատգամավորների ձայներ, ինչպես նաև՝ վարչապետի թեկնածու:

Հեղինակ՝ Իզաբել Սահակյան

Աղբյուր` Փաստինֆո