Փաստ ինֆո

«Հայաստան» խմբակցության պատգամավոր Գեղամ Մանուկյանն այսօր եկել էր խորհրդարան։ Նա հայտարարեց, որ եկել է, որպեսզի իշխանական պատգամավորներին փոխանցի երեկ ԱԺ-ի մոտ հավաքված հազարավոր մարդկանց պահանջը.

«Այդ մարդիկ ուղղորդված չէին, որևէ մեկը նրանց չէր ուղղորդել, պարզապես կար մեկ բան՝ հայրենիքի, Արցախի նկատմամբ անհանգստությունը: Միակ ուղղորդումը Նիկոլ Փաշինյանի՝ ԱԺ ամբիոնից արված վտանգավոր հայտարարություններ էր: Չասեք՝ մարդ չկար այնտեղ,տասնյակ հազարավոր մարդիկ կային, որը նաև պարտադրեց, որ հաշված ժամերի ընթացքում Նիկոլ Փաշինյանի կողմից ինչ-որ փաստաթուղթ ստորագրելու հայտարարությունը հերքվի, ուղիղ եթերներում, գրավոր հայտարարություններով իշխանության ներկայացուցիչների կողմից եղան պարզաբանումներ, հերքումներ, քանի որ հասկանում էին, որ մարդիկ վրդովված են բայց դրանք, այնուամենայնիվ, չհերքեցին Փաշինյանի վտանգավոր հայտարարությունները »,-ասաց նա:

Մանուկյանը հորդորեց ՔՊ-ականներին գիտակցել իրավիճակը և հասկանալ, որ վիճակը լուրջ է և վտանգավոր:

«Կա՛նգ առեք, Նիկոլ Փաշինյանի կողմից երեկ հնչել է մի արտահայտություն, որ եթե ինչ-որ թուղթ ստորագրվի, ապա մարդիկ կարող են իրեն ասել դավաճան, այդ պիտակը հետո ամեն մեկիդ կպնելու է»,-ասաց նա:

Մանուկյանի ելույթից հետո իրավիճակը լարվեց, ՔՊ-ականները սկսեցին բղավել և արձագանքել ելույթին: Հակոբ Արշակյանը ՔՊ պատգամավորներին խնդրեց հանգստություն պահպանել, Գեղամ Մանուկյանին էլ՝ այնպես չանել, որ էլ ավելի լարվի խոսակցությունը.

«Նիկոլին փրկելու ժամը չէ, հայրենիքը փրկելու ժամն է»,-ասաց Մանուկյանը:

Աղբյուր` Փաստինֆո