Փաստ ինֆո

«Այս պահին Ադրբեջանի հիմնական թիրախը, իմ կարծիքով, Վայոց Ձորն է՝ Ջերմուկը, մյուս երկու ուղղությունները շեղող են։ Եթե քարտեզով նայենք, դեպի Նախիջեւան ամենակարճ ճանապարհն է անցնում Վայոց Ձորով »,- «Փաստինֆո» լրատվականի հետ զրույցում ասաց էներգետիկ եւ անվտանգության հարցերով փորձագետ Արմեն Մանվելյանը՝ անդրադառնալով Հայաստանի դեմ սանձազերծած պատերազմում Ադրբեջանի հետապնդած ռազմակավարական հնարավոր նպատակներին։

Նրա կարծիքով, Ադրբեջանն այս փուլում փորձում է Հայաստանից որոշակի տարածքներ վերցնել՝ որքան շատ, այնքան լավ, որոնց շուրջ կսկսի առեւտուրը, այսպես կոչված, խաղաղության օրակարգի սցենարով։ «Եթե հավատանք այս վարչապետ կոչվածի ելույթին, Վարդենիսում մենք արդեն իսկ տարածքներ ենք կորցրել։ Ադրբեջանի նպատակն է հնարավորինս շատ տարածքներ գրավել, որպեսզի հետագայում զորքերը հետ քաշի եւս մեկ նոյեմբերի 9-ի խայտառակ կապիտուլյացիայի գնով, որտեղ Հայաստանը ամբողջությամբ կհրաժարվի Արցախից, միջանցքը կհանձնի Ադրբեջանին։ Ադրբեջանում շատ լավ հասկանում են, որ, ի դեմս ՀՀ այսօրվա ղեկավարության, գործ ունեն թույլ, վախկոտ, դավաճան քաղաքական իշխանության հետ ,-ասաց Մանվելյանը՝ հավելելով, որ Ադրբեջանն օգտվում է նաեւ գլոբալ աշխարհաքաղաքական իրավիճակից։

«Եթե ռեալ պոլիտիկի դիրքերից նայենք նրա քայլերին, ապա դրանք հասկանալի են, մարտավարական առումով Ադրբեջանը շատ բան է շահում, քանի որ հայկական կողմը վերջին 2 տարում ոչինչ չի արել բանակը վերազինելու, դիրքերն ամրացնելու համար»,-հավելեց փորձագետը։

Անդրադառնալով դիտարկմանը, թե Փաշինյանը ինչպես երեկ, այնպես էլ այսօր խորհրդարանում պնդեց, թե չի պատրաստվում որեւէ միջանցք տրամադրել Ադրբեջանին, Արմեն Մանվելյանն ասաց․«Եթե իր բոլոր քայլերը վերլուծենք՝ սկսած 44-օրյա պատերազմից եւ հենց այն հայտարարությունից, թե ինչ էլ լինի, մենք մեզ պարտված չենք ճանաչի, կհասկանանք, որ այդ հայտարարությունը եւս նույն տրամաբանությունն է։ Փաշինյանը այս գլխից պատրաստ է զիջման, նրան ինչ-որ առիթ է պետք , իսկ այդ առիթը պատերազմն ու ռազմական գործողություններն են՝ հերթական անգամ զիջման ճանապարհով կանգնեցնում է ռազմական գործողությունները՝ ասելով, թե ես փրկել եմ այսքան մարդու կյանք։ Դրա համար է նաեւ շեշտում, որ արդեն 105 զոհ ունենք։ Սա հերթական անգամ Հայաստանը կապիտուլյացիայի տանելու ճանապար է»։

Մանվելյանը հիշեց, թե 44-օրյա պատերազմի օրերին ինչ «անզիջում» կերպարի մեջ էր մտել Փաշինյանը, երբ նրանք մի քնաի անգամ առաջարկվել էր դադարեցնել պատերազմը եւ նա մերժել էր։ «Այդ «անզիջում» կերպարի հետեւում թաքնված է ավելի շատ զիջելու տրամաբանությունը» ,-շեշտեց մասնագետը։

Նկատենք, որ այսօր ԱԺ-ում իմքայլականների հարցերին պատասխանելիս Փաշինյանը հայտարարեց, որ Հայաստանը առաջարկությունների նոր փաթեթ է ներկայացրել Ադրբեջանին եւ , որ ինքն այն Բրյուսելում առձեռն փոխանցել է Ադրբեջանի նախագահին։Նա ասաց․«Որ պահին իրենք այդ առաջարկությունն ընդունեն, մենք պատրաստ ենք անմիջապես անցնել դրա իրագործմանը»։ Ըստ Փաշինյանի, փաթեթը մինչ այս իր արած հրապարակային հայտարարությունների մասին է ՝ հայկական կողմը պատրաստ է ճանապարհներ բացել, տալ և ստանալ։

Աղբյուր` Փաստինֆո