Փաստ ինֆո

Ադրբեջանի կողմից ռազմական գործողությունների սցենարը կանխատեսելի էր, իսկ նպատակը՝ հստակ:

«Եթե կարճ ասեմ՝ այս սցենարը կանխատեսելի էր եւ այդ մասին բազմիցս խոսել ենք: Աշխարհագրության հետ քիչ , թե շատ առնչություն ունեցող մարդուն պարզ էր, որ հարվածը պետք է լիներ Սյունիքի ուղղությամբ: Գեղարքունիքը, կարծում եմ, շեղող ուղղություն է: Այո, հարվածը կանխատեսելի էր, իսկ նպատակն այն է, ինչ փորձում են այսպես կոչված, խաղաղության պայմանագրով մեզնից կորզել, որը, տեղի տալով ռուս-իրանական դիմադրությանը, Փաշինյանը դեռ չի հանձնել»,-«Փաստինֆո»-ի հետ զրույցում անդրադառնալով Ադրբեջանի կողմից պատերազմական գործողությունների սանձազերծմանը, նման կարծիք հայտնեց ռազմական փորձագետ Դավիթ Ջամալյանը:

Նրա խոսքով, եթե Փաշինյանի ձեռքում լիներ, նա վաղուց կհանձներ Սյունիքը, ապա կգնար խորհրդարան եւ ինչպես այսօր ասաց, կասեր ՝ որ սարսափելի մեծ տնտեսական աճ ունենք: «Եթե, այսպես կոչված, Զանգեզուրի միջանցքը Փաշինյանը չի հանձնում փաստաթղթով, նշանակում է կա ռուս-իրանական դիմադրություն եւ թուրքը փորձում է այն ուժով վերցնել: Առաջիկա ժամերին պարզ կդառնա՝ սա հայտնի սցենարի խաղարկու՞մն է՝ թուրքը հարվածի, Նիկոլը ճնշվի եւ կապիտուլյացիա 2-ը ստորագրի, թե՞ այնուամենայնիվ, ռուսական կողմի կտրուկ հակազդեցությամբ պայմանավորված, կփորձեն դիմադրություն կազմակերպել: Սկզբունքորեն, չեմ բացառում նաեւ հրաժարականի տարբերակը, թեեւ այդ հարցում շատ լավատես չեմ »,- ասաց Ջամալյանը:

Մասնագետը արձանագրում է, որ Նիկոլ Փաշինյանի՝ խորհրդարանում ունեցած ելույթը միայն բավական է, որ հանրային ցասման մեծ ալիք բարձրանա:
Ինչ վերաբերում է ստեղծված իրավիճակում արտաքին խաղացողների արձագանքին ու մասնավորապես Իրանին, որն արդեն իսկ հայտարարել է, որ իր համար անընդունելի է Հայաստանի եւ Ադրբեջանի միջեւ սահմանի հնարավոր փոփոխությունը, Դավիթ Ջամալյանն ասաց. «Հավանական է, որ Իրանից կարող ենք տեսնել հակազդեցություն, ավելին ասեմ, չեմ բացառում ռուս-իրանական համատեղ հակազդեցությունը, որովետեւ հարվածի հիմնական ուղղությունը Իշխանասարն է, որի դեմ դիմացը կա ռուսական բազայի մի հենակետ եւ եթե իրանական կողմի հետ պայմանավորվածություններ ձեռք բերվեն, չեմ բացառում համատեղ գործելու հավանականությունը, որովհետեւ 2 կողմի համար Սյունիքի կորուստը գոյաբանական է»,-ասաց մասնագետը՝ հավելելով, որ չկասկածելով մեր բանակի պրոֆեսիոնալիզմի եւ խիզախության վրա, պետք է արձանագրել, որ իշխանությունը ոչինչ չի արել բանակը մարտունակության բերելու համար, հետեւաբար, մեզ արտաքին աջակցություն է հարկավոր:

Ջամալյանը չի կարծում, որ Հայաստանի կողմից հապճեպ ՀԱՊԿ-ին դիմելը Պուտինի հետ հեռախոսազրույցից անմիջապես հետո, պատահական է արվել: Ըստ Ջամալյանի, հնարավոր է այդ հորդորը հենց ռուսական կողմից է եղել՝ թույլ չտալու, որ իրագործվի 44-օրյա պատերազմի սցենարը:

Հարցին, գուցե հաշվի առնելով ուկրաինական պատերազմում վերջին օրերի զարգացումներով պայմանավորված, ՌԴ-ի վիճակը, ՀՀ իշխանությունները հակառա՞կ նպատակով են դիմել ՀԱՊԿ-ին՝ ցույց տալու, օրինակ, կառույցի անգործությունը, Ջամալյանը արձագանքեց. «Խնդիրը կայանում է նրանում, որ այդ ուժերը, որոնք պետք է անհրաժեշտության դեպքում հակազդեն, Հայաստանում զգալի են եւ դեռ մինչեւ ուկրաինական գործողությունները Հայաստանում նման իրավիճակներում արագ հակազդելու համար ուժերն ու միջոցներ կային ու եթե անգամ պետք լինի ինչ-որ բան ավելացնել, սկզբունքորեն, եթե դանակը հասնի ոսկորին, այդ քայլին կգնան: Բացի այդ, Դոնբասում ռուսական անհաջողության փուլը կանխվել է եւ անհրաժեշտ հակազդեցությունն այնտեղ ռուսական կողմն իրականացնում է»:

Ըստ փորձագետի, կա չարյաց փոքրագույնի տրամաբանությունը եւ մեր տարածաշրջանում հնարավոր երկրորդ ճակատի բացումը ՌԴ-ի համար անխուսափելի կարող է լինել՝ Անդրկովկասը կորցնելու փոխարեն, իսկ նա , ըստ Ջամալյանի, որեւէ պարագայում, չի կարող կորցնել Անդրկովկասը:
Հայաստանի ազգային պետական շահի տեսանկյունից, ըստ բանախոսի , լավագույն սցենարը կարող է լինել համազգային մոբիլիզացիան եւ Փաշինյանի հրաժարականը կամ այնպիսի պարտադրանքի գործադրումը, որ առնվազն համարժեք դիմադրություն կազմակերպվի:

Հիշեցնենք, որ ժամը 00:05-ից, Ադրբեջանի ԶՈՒ ստորաբաժանումները Գորիսի, Սոթքի և Ջերմուկի ուղղությամբ հրետանային միջոցներից, խոշոր տրամաչափի հրաձգային զինատեսակներից սկսել են ինտենսիվ կրակ վարել հայկական դիրքերի ուղղությամբ՝ կիրառելով նաև ԱԹՍ-ներ: ՀՀ վարչապետ Նիկոլ Փաշինյանը ԱԺ-ում ներկայացրեց իրադրությունը հայ-ադրբեջանական սահմանին։ Նա նշեց, որ նախնական տեղեկություններով ունենք 49 զոհ, սակայն այս թիվը վերջնական չէ, վերջնականը կհայտարարվի ՊՆ-ի կողմից հստակեցումից հետո։

Աղբյուր` Փաստինֆո