Փաստ ինֆո

Ռուբեն Հախվերդյանը խորհրդանիշն է անկեղծության, ազնվության և քաղաքական այն որակների, որոնք անհրաժեշտ են մեր երկրին: Մենք նաև լավ բարեկամներ ենք, Հախվերդյանը իմ լավ ընկերն է, այնպես որ, որևէ զարմանալի բան չկա իր թեկնածությունն առաջադրելու մեջ: «Փաստինֆո»-ի հետ զրույցում ասել է Տիգրան Խզմալյանը, որի գլխավորած «Եվրոպական» կուսակցությունը հայտարարել է Երևանի քաղաքապետի ընտրություններում երգիչ, երգահան Ռուբեն Հախվերդյանի թեկնածությունն առաջադրելու մասին։

«Քաղաքապետի պաշտոնը ոչ այնքան քաղաքական, այլ՝ տեխնիկական պաշտոն է, որը քաղաքաշինության, աղբահանության և տրանսպոտի հարցեր պետք է լուծի, բնականաբար, մենք պատրաստելու ենք մասնագետների թիմ, բայց ցանկացած թիմ համախմբվում է որևէ գաղափարի և այդ գաղափարը խորհրդանշող անձի շուրջ, մեզ թվում է, որ երեք-չորս տասնամյակ հանդիսանալով անձնուրաց, ազգային արժեքների և մշակութային բարձր քաղաքակրթության կրողը՝Ռուբենն ունի յուրահատուկ իր դերը, նա Երևանի խորհրդանիշն է ի վերջո, իսկ ո՞վ պետք է գլխավորի Երևանը, եթե ոչ իրական երևանցին, ահա թե ինչու մենք որոշեցինք առաջադրել Ռուբեն Հախվերդյանի թեկնածությունը»,-ասաց Խզմալյանը:

Վերջինիս խոսքով՝նրանք, ովքեր հավակնում են գլխավորել Երևանը, պետք է համապատասխանեն մեր ազգի մշակույթին և ժողովրդի սպասելիքներին, զրուցակիցը վստահեցնում է՝ Հայաստանը դառնալու է եվրոպական երկիր, իսկ Երևանը դառնալու է եվրոպական քաղաք;

Դիտարկմանը, որ մինչև այսօր նախկին քաղաքապետ Հայկ Մարությանի հասցեին քննադատություններ են հնչում, որ, լինելով դերասան, թողեց այն և մտավ քաղաքականություն, արդյո՞ք մտավախություն չկա, որ Հախվերդյանը նույնպես այս առումով քննադատությունների թիրախ կդառանա, զրուցակիցը պատասխանեց.

«Եթե պարոն Հախվերդյանը լիներ կաշառակեր, իր փառքը օգտագործեր ի վնաս ժողովրդի, ապա մենք նման մտավախություն կունենայինք: Ես ոչ թե համեմատություն կանեի Մարությանի օրինակով, այլ, օրինակ, միջին կարգի ուկրաինացի դերասան Զելենսկու օրինակով, որը համաշխարհաին քաղաքական առաջնորդներից է, կես տարի առաջ որևէ մեկը կպատկերացնե՞ր, որ КВН-ի թիմի որևէ մասնակից կարող է ծնկի բերել գերտերություն համարվող Ռուսաստանը, երևի պետք է լեռները չափել գագաթներով, այլ ոչ թե ստորոտներով»,-ասաց Խզմալյանը:

Մինչ օրս քաղաքապետի իրենց թեկնածուներին հայտարարել են Տիգրան Արզաքանցյանի «Ուժը հայրենյաց» կուսակցություն, որը քաղաքապետի պաշտոնում առաջադրել է վերջինիս կնոջը՝ Նատալյա Ռոտենբերգին և իշխող ՔՊ-ն, որի թեկնածուն Տիգրան Ավինյանն է, ավելին Տիգրան Ավինանը «Սուրմալու» առևտրի կենտրոնում տեղի ունեցած ողբերգական պայթյունի դեպքի վայրում արդեն սկսել էր իր քարոզարշավը՝ հայտարարելով, թե ինքն այդտեղ է որպեա ՔՊ-ի քաղաքապետի թեկնածու:

Թե ինչպես է վերաբերվում մյուս թեկնածուներին և արդյո՞ք նման պայմաններում ակնկալում է հավասար պայմաններով մրցակցություն, Տիգրան Խզմալյանը խուսափեց պատասխանել.

«Ես քաղաքական կուսակցության նախագահ եմ, քաղաքագետ չեմ և չեմ պատրաստվում այս կամ այն թեկնածուին քննարկել, դա քաղաքական էթիկայից դուրս է, մենք պարզապես պետք է աշխատենք ու աշխատանքով ապացուցենք՝ ով է ճիշտ, ով է սխալ»,-ասա նա:

Իսկ թե ինչպե՞ս է գնահատում իր կուսակցության և իրենց շանսերը քաղաքապետի ընտրություններում՝ Խզմալյանն ասաց.

«Քաղաքացիները մեկ տարի անց կգնահատեն, մենք պարտավոր են ներկայացնել ծրագիր, գաղափար, իսկ մնացածը ժողովուրդն է որոշում, եթե ժողովուրդը պատկերացնում է մեր մայրաքաղաքի ղեկավարի պաշտոնում արվեստագետի կամ մշակութային գործչի, ուրեմն մեր շանսերը փոքր են, իսկ եթե մենք ընտրում ենք գործարքների և պայմանավորվածությունների արդյունքում առաջ գնացող մարդկանց, ուրեմն կստանանք այն, ինչ ունեինք տասնամյակներ առաջ»:

Աղբյուր` Փաստինֆո