Փաստ ինֆո

Ազգային ժողովի նախագահ Ալեն Սիմոնյանը անլուրջ է որակում «Հայաստան» և «Պատիվ ունեմ» խմբակցությունների՝ Ազգային ժողովի նիստը բոյկոտելը և խորհրդարանից դուրս քննարկումներ նախաձեռնելը: Նման հայտարարություն նա արել է խորհրդարանում լրագրողների հետ զրույցում.

«Այս ԱԺ-ն ամենաբարձր լեգիտիմություն ունեցող ԱԺ-ն է, իսկ ընդդիմությունը, կարելի է ասել, ամենացածր լեգիտիմություն ունեցող ընդդիմությունն է մեր պատմության մեջ։ Մի հատ էլ թող այլընտրանքային պետություն հիմնեն»,- ասաց նա:

Ինչ վերաբերում է ընդդիմադիր պատգամավորներին մանդատից զրկելուն՝ Սիմոնյանը նշեց, որ տարվա վերջին,
երբ նստաշրջանը ավարտվի, հարցը կմտնի խորհուրդ, և որոշում կկայացվի.

«Այս հարցը բազմիցս քննարկվել է կուսակցությունում և խմբակցությունում, տարբեր կարծիքներ են եղել սրա հետ կապված, կարծիք է եղե անգամ ձեռք մեկնել նրանց և թույլ տալ, որ վերադառնան խորհրդարան: Մեջներից ավելի ճիշտ և արժանապատիվ իրեն պահեց Արթուր Վանեցյանը, որը քաղաքական պատասխանատվությունը վերցրեց իր վրա, ինչպես, օրինակ՝ մենք վարչության ընտրություններ նշանակեցինք Լոռու մարզում ընտրություններում պարտվելուց հետո: Ես տրամադրված եմ այնպես, որ որևէ քաղաքական գործիչ չպետք է աշխատավարձ ստանա, իր օգնականները չպետք է աշխատավարձ ստանան, եթե գործի չեն գալիս: Ինչո՞ւ են փակում քաղաքական դաշտն առողջ ուժերի համար: Ես դա չեմ հասկանում ու չեմ ընդունում»,-ասաց Սիմոնյանը:

Աղբյուր` Փաստինֆո