Փաստ ինֆո

«Այդ հայտարարությունը կարող է հետապնդել միայն մեկ նպատակ, որ թուրքերը գան՝ մեր հողերը առնեն»-«Փաստինֆո»-ի հետ զրույցում նման կարծիք հայտնեց Ագրարագյուղացիական միավորման նախագահ Հրաչ Բերբերյանը՝ անդրադառնալով էկոնոմիկայի նախարար Վահան Քերոբյանի հորդորին՝ ուղղված Արարատի մարզի գյուղացիներին։

Նշենք, որ «168 Ժամն» ահազանգել էր, որ Արարատի մարզում առաջիկա օրերին կմեկնարկի խաղողի մթերումը, սակայն գյուղացիները պայմանագիր չունեն մթերողների հետ, ինչն աննախադեպ է, իսկ մարզի Լուսառատ գյուղի գյուղացիներից մեկը լրատվամիջոցին ասել էր․«Էկոնոմիկայի նախարարը եկել էր այստեղ, բայց ընդհանրապես ոչ մի հուսալի բան չասաց, ոչինչ։ Ասաց՝ գնացեք Երևան, 300.000 դրամով աշխատատեղ կա, աշխատեք, հողերն էլ ծախեք էդ հարուստներին․․․Նախարարը, որ եկել էր, գիտե՞ք՝ ոնց որ ինչ լիներ։ Ոնց որ Շահ Աբաս արքան, որ դերվիշի շորերով գնում է ժողովրդի մեջ մտնում՝ կարծիք իմանալու․ հիմա մեր ղեկավարը չի եկել, իր վեզիրներին է ուղարկել, որ կարծիքն իմանա՝ ժողովուրդն ի՞նչ, ո՞նց»։

Բերբերյանը նշում է՝ «Քանի որ նախարարի ընտանիքին լավ եմ ճանաչում, շատ լավ գիտեմ, թե հայրն ինչ է աշխատել, ես իրեն խորհուրդ կտամ չմանրանալ եւ ժողովրդին նման խորհուրդներ չտալ»։

Հրաչ Բերբերյանը չի բացառում, որ, օրինակ, իշխանության հետ փոխկապակցված անձինք եւս ցանկություն ունենան գնել գյուղացիների հողերը։ «Էս դեղնակտուցները այնքան փող են դիզել պարգեւների եւ այլնի միջոցով, որ գուցե պատրաստվում են հողեր առնել, ուղղակի ձեւեր են ման գալիս։ Ախորժակները բացվել է, չէ՞»։

Ըստ նրա, Վահան Քերոբյանի այս կոչով պետք է ազգային անվտանության մարմիններն զբաղվեն, եթե նրանք կան․«Թող նախարարը մտածի՝ ինչ է խոսում։ Եվ վերջապես, մի բան հարցնեմ՝ էդ 300 հազար դրամանոց աշխատատեղերը որտե՞ղ են, ինքը գիտի՞։ Առաջինը թող այս հարցին պատասխանի։ Սա մի կոչ է, որ գյուղացին իր հողը չմշակի, վաճառի, գնա։ Այդ հայտարարությամբ պետք է զբաղվեն համապատասխան մարմինները՝ Ազգային անվտանգությունը»,-ասաց Հրաչ Բերբերյանը՝ հորդորելով գյուղացուն ոչ թե հողերը վաճառել, այլ մտածել, թե Հայաստանն ինչ ղեկավարություն ունի եւ արդյո՞ք հայ ժողովուրդն արժանի է այդ ղեկավարությանը։

Ինչ վերաբերում է հարցին, թե արդյոք հողեչը վաճառելու եւ մայրաքաղաքում աշխատանք գտնելու հորդորը կարող նպատակ հետապնդել, օրինակ, առաջիկայում հայ-թուրքական սահմանի բացման հնարավորության պայմաններում թուրքական գյուղատնտեսական ապրանքների ներհոսքի համար, այսպես ասած, նպաստավոր պայմաններ ստեղծելուն, Հրաչ Բերբերյանն ասաց․«Եթե տգետները ղեկավարեն երկիրը, բնականաբար, տնտեսությունը կքանդվի։ Ես էլ եմ գտնում, որ սահմանները պետք է բաց լինեն, բայց եթե մենք խելացի ղեկավարություն ունենանք։ Թուրքիայի նման երկիրը, լինելով ԱՀԿ անդամ, մշակել է այնպիսի հարկատեսակներ, որ կոնկրետ գյուղատնտեսական ապրանքներ որեւէ մեկը չի կարող Թուրքիա ներկրել։ Մենք կարո՞ղ ենք նման լծակներ օգտագործել, իհարկե կարող ենք, հետեւաբար, մեղադրել թուրքերին, թե վաղը մեր շուկան կգրավեն, այնպես , ինչպես Հայաստանի մի մասն են գրավել, չենք կարող։ Դա այսպես ասած, վրացական երազանքի արդյունքն է, հիմա, եթե մեզ մոտ էլ այդպես արեցին այդ պաշտոնյաները, որոնք, շատ կներեք, թուրքերի կողմից նշանակված եղան կամ կաշառակեր եղան, դա այլ խնդիր է, եթե ազնիվ մարդիկ լինեն, ես վտանգ չեմ տեսնում, որ մեր շուկան բոլորի համար ազատ լինի, եթե իհարկե, մենք առաջին հերթին խթանենք եւ պաշտպանենք մեր արտադրողին»։

Հրաչ Բերբերյանը չի կարծում, թե ոլորտում վարվող քաղաքականությունը անգրագիտությամ արդյունք է, որովհետեւ, նրա խոսքով, այսչափ անգրագիտություն չի լինում․«Ես ավելի վատ բաներ եմ տեսնում, դրա համար եմ ասում, որ Ազգային անվտանգությունը պետք է զբաղվի, եթե նման կառույց գործում է»,-եզրափակեց Բերբերյանը։

Հավելենք, որ գյուղատնտեսության ոլորտն, ըստ էության , անտեր է մնացել Հայաստանում։ Նիկոլ Փաշինյանն իշխանության գալուց հետո օպտիմալացրեց գյուղնախարարությունը՝ փակելով այն եւ ոլորտը հանձնելով էկոնոմիկայի նախարարության իրավասության ներքո, ոլորտային վարչությունների մակարդակով։

Աղբյուր` Փաստինֆո