Փաստ ինֆո

Նախ, տարօրինակ է, որ երկրի ղեկավարն առաջնորդվում է ինչ-որ զգացողություններով, այլ ոչ թե փաստերով, որոնց համար, որպես պետության ղեկավար, ունի ողջ գործիքակազմը՝ ԱԽ, դատախազություն, ՊՆ եւ այլն։ Եվ, այս ամենն ունենալով, առաջնորդվել ինչ-որ տպավորություններով, մեղմ ասած, անլուրջ մոտեցում է։ Երկրորդ, եթե հայտարարվում է, որ հրամաններն այլ տեղից են իջեցվել, դա նշանակում է, որ  երկրի ուղղակի ղեկավարը իրավիճակին չի տիրապետում ու  եթե իր ենթականերին  հրամաններ են տալիս այլ տեղերից, եթե անգամ տեսականորեն վերցնենք, որ այդ հայտարարությունը ճիշտ է, միանշանակ հարց է առաջանում, թե որտե՞ղ է երաշխիքը, որ ապագայում հնարավոր մարտական գործողությունների ժամանակ՝ լինեն լոկալ կամ առավել մեծամասշտաբ, եւս այլ տեղից հրամաններ չեն գալու»,- «Փաստինֆո»-ի հետ զրույցում նման հարցադրում է հնչեցնում «Հենակետ» վերլուծական կենտրոնի ղեկավար, ռազմական փորձագետ Վիտալի Մանգասարյանը՝ անդրադառնալով ՆԻկոլ Փաշինյանի վերջին սկանդալային հայտարարությանը:

Հիշեցնենք, որ Վլադիվոստոկում հայ համայնքի ներկայացուցիչների հետ հանդիպմանը ՀՀ վարչապետ Նիկոլ Փաշինյանը, անդրադառնալով բանակի ղեկավարության նկատմամբ հարուցվող քրեական գործեին հայտարարել է, թե իր զգացողությամբ, դրանց հետեւությունը լինելու է այն, որ այո, կարող էր այլ ելք լինել։ Նա նաեւ ասել է, թե տպավորություն է, որ ոչ թե իր հրամաններով են առաջնորդվել, այլ  «եսիմ որտեղից»:

Մասնագետը նշում է, որ  Փաշինյանի հայտարարծ տրամաբանությունից բխում է, որ հնարավոր զարգացումների դեպքում, հնարավոր հետեւանքները մեզ համար կրկին կործանարար կարող են լինել, քանի որ նա իրավիճակին չի տիրապետում։ Ինչ վերաբերում է դիտարկմանը, թե  44-օրյա պատերազմի օրերին, որպես գլխավոր հրամանատար, Փաշինյանը շարունակ ուղիղ եթեր էր մտնում եւ անգամ ռուսական ԶԼՄ-ների հետ հարցազրույցի ժամանակ կոնկրետ իրականացվող օպերացիայի վերաբերյալ մանրամասներ հնչեցնում, մասնագետը շեշտեց․«Եթե հիմա նայում ենք այն տեսանկյունից, որ ՊԲ նախկին հրամանատարները մեղավոր են, որոնց վերագրվող արարքը նկարագրվում է ՔԿ-ի տված նյութում, որտեղ նշվում է, որ նրանց կայացրած  որոշումները ծանր հետեւանքների են հանգեցրել, ապա հարց է առաջանում, Նիկոլ Փաշինյանի կայացրած  որոշումներն արդյո՞ք նույն ՔԿ-ն ուսումնասիրել է, արդյո՞ք իր  որոշումները ծանր հետեւանքներ  չեն առաջացրել։ Մասնավորապես, այն հայտարարությունը, թե տանը ով  զրահաբաճկոն ունի, թող վերցնի, գնա, իրենց միջից էլ ընտրեն հրամանատար, այս հայտարարությունը  արդյո՞ք առնվազն  հոգեբանական ազդեցություն չի ունեցել զինված ուժերի վրա, որից բխել են ծանր  հետեւանքները։ Այս ամենը, ըստ իս, եւս, հնարավոր է ծանր հետեւանք առաջացրած լինի։ Նույն, Ձեր նշած ՌԲԿ-ին տված հայտնի հարցազրույցում, երբ  իր իսկ խոսքերով, այդ պահին հենց տեղի են ունենում մարտական գործողությունները,արդյո՞ք  հակառակորդը չի լսել դա, չի իմացել, թե ինչ է պլանավորվում եւ դա չի առաջացրել ծանր հետեւանքներ։ Քննչական կոմիտեն հստակ ու  միանշանակ պետք է այս հարցերի պատասխանները եւս տա , եթե կարողանա հիմնավորել, որ համախպատասխան հետաքննությունից հետո պարզվել է, որ ծանր հետեւանքներ տեղի չեն ունեցել, այդ դեպքում նոր արդարացված կլինեն հրամանատարների հետ կապված գործընթացները»:

Հիշեցնենք, որ քրեական գործեր են հարուցվել Արցախի ՊԲ նախկին հրամանատարներ Միքայել Արզումանյանի եւ Ջալալ Հարությունյանի նկատմամբ։  Վերլուծական շրջանակաները արձանագրում են, որ այսկերպ քաղաքկաան իշխանությունն՝ ի դեմս Փաշինյանի, փորձում է պատերազմի ծանր պարտության պատասխանատվությունը բացառապես բանակի վրա թողնել։

Հարցին, թե այսուհանդերձ,  հրամանատարները ու՞մ հրամաններն էին կատարում, եթե ելնենք Փաշինյանի հայտարարությունից,  Վիտալի Մանգասարյանը նշեց՝ դժվար է  ասել, թե ում նկատի ունի Փաշինյանը, երրորդ երկրների հատուկ ծառայությունների՞ն, թե այսպես ասած, նախկին  իշխանություններին է ակնարկում։ «Կապ չունի, թե  ով է հրամանը տվել՝ նախկին  նախագա՞հը, թե խանութում աշխատող գանձապահը, իր ենթական ենթարկվում է բացառապես իրեն։ Կառավարման բուրգը հստակ սահմանված է , այստեղ երկրորդ կարծիք լինել չի կարող եւ որեւէ կապ չունի թե ով է այդ անձը։ Պատերազմի ժամանակ Նիկոլ Փաշինյանն էր գլխավոր հրամանատարը եւ պատասխանատվության բուրգի ամենավերեւում հենց ինքն էր կանգնած»,-եզրափակեց Վիտալի Մանգասարյանը:

Աղբյուր` Փաստինֆո