Փաստ ինֆո

Իլհամ Ալիևը շարունակում է իր հոր գաղափարական հակառակորդների գիծը՝ զրկելով իր գաղափարական հակառակորդներին իր դեմ պայքարելու հերթական գործիքից։ Ի․ Ալիևը իրեն դրսևորում է որպես թյուրքականության գաղափարախոսության կրող։ Այս մասին «Փաստինֆո»-ի եթերում ասել է իրանագետ, ԵՊՀ իրանագիտության ամբիոնի դոցենտ Արտյոմ Տոնոյանը՝ նշելով, որ հատկապես մեծ է Թյուրքիայի ազդեցությունը ադրբեջանական բանակի վրա, իսկ հասարակության 90 տոկոսը աչքի է ընկնում թուրքամետ տրամադրություններով։

Անդրադառնալով երկրի ներսում տիրող սոցիալ տնտեսական իրադրությանը՝ բանախոսն արձանագրել է, որ առկա է դժգոհություն հատկապես 44 օրյա պատերազմի մասնակիցների շրջանում, բազմաթիվ են դեպքերը, երբ պատերազմի մասնակիցներին անգամ չեն տալիս մասնակցության վկայական, իսկ մասնակցության վկայական ունեցողներին էլ զրկում եմ ամսական չնչին նպաստից։ Գրեթե ամենօրյա ռեժիմով ցույցեր են իրականացվում՝ պետության անտարբեր վերաբերմունքի դեմ։

Փաստացի, վարչախումբն իր առջև դրած խնդիրը լուծած է համարում և այլևս հետաքրքիր չէ, թե ինչ ճակատագիր է սպասվում պատերազմի մասնակիցներին։ Դեռևս մեկ ամիս առաջ Ադրբեջանում ծառայությունից վերադարձած զինծառայողների շրջանում ինքնասպանության փորձերը գերազանցում էին 50-ը, որոնցից մահով էր ավարտվել մոտավորապես 40-ը։ Հավանաբար այդ թիվը ավելի է մեծացել։ Սա պայմանավորված է հետպատերազմական տրավմաներով, մարդկանց սոցիալական խնդիրներով և այդ խնդիրները չեզոքացնելու՝ պետության վարած քաղաքականությամբ։

Խոսելով Արցախից օկուպացված տարածքներում վերաբնակեցման խնդիրների մասին՝ բանախոսը նշել է. «Ադրբեջանական իշխանությունները 2021թ. սոցհարցումներ իրականացրեցին՝ պարզելու համար, թե այդ տարածքերի նախկին բնակիչները, որոնց փախստականի կամ բռնի տեղահանվածի կարգավիճակ ունեն՝ ցանկանում են վերադառնալ թե ոչ։ Սակայն արդյունքները ամբողջությամբ չհրապարակվեցին, իսկ անուղղակի տվյալները և հրապարակումները հուշում էին, որ վերադառնալու հետ կապված դրական միտում չկա։ Անգամ հնարավոր է, որ բռնազավթված գյուղերում տարածքներ տրամադրվեն ահաբեկիչների ընտանիքներին՝ որպես պատերազմի մասնակցության վարձատրություն»։

Իսկ Շուշին բնակեցնելու մտադրություն արհեստածին Ադրբեջանի վարչախումբը չունի։ Փորձագետի փոխանցմամբ՝ այն մնալու է որպես Ալիևների ընտանիքի ամառանոց կամ հանգստավայր։ Այստեղից որևէ մեկին հողակտոր կամ տարածք չի հատկացվելու։

Մանրամասները՝ տեսանյութում։

Աղբյուր` Փաստինֆո