Փաստ ինֆո

Երևանի ընդհանուր իրավասության դատարանում՝ դատավոր Կարեն Ֆարխոյանի նախագահությամբ, մեկնարկել է ՀՅԴ անդամներ Գերասիմ Վարդանյանի, Բագրատ Եսայանի և Գառնիկ Մելքումյանի գործով դատական նիստը։

«Փաստինֆո»-ի թղթակցի հաղորդմամբ՝ դատական նիստի սկզբում Վարդանյանի պաշտպանը դատավորին ինքնաբացարկի միջնորդություն ներկայացրեց՝ արձանագրելով, որ Գերասիմ Վարդանյանը, Բագրատ Եսայանը, Գառնիկ Մելքումյանը հանդիսանում են ընդդիմադիր քաղաքական գործիչներ։

Պաշտպանն ուշադրություն հրավիրեց այն հանգամանքին, որ առկա են երկակի ստանդարտներ, կալանավորված է միայն Վարդանյանը, իսկ կալանավորումն անփոփոխ թողնելու որոշման դեմ բողոքը դեռևս չի քննվել, քանի որ դատարանը գործի նյութերն ուղարկել է բողոքը ներկայացնելուց երկու շաբաթ անց։ Գերասիմ Վարդանյանի խոսքով՝ դատարանն առնվազն ոչ բարիացկամ է տրամադրված իր պաշտպանյալի նկատմամբ, ամեն ինչ արվում է, որ Վարդանյանը հնարավորինս երկար մնա կալանքի տակ։ Ըստ պաշտպան Բենիկ Գալստյանի՝ դատավորը կարող է ունենալ կողմնակալ վերաբերմունք։ Գերասիմ Վարդանյանը հայտարարությամբ հանդես եկավ՝ նշելով, որ նոյեմբերի 9-ի գիշերը, երբ բոլորի համար անսպասելի ստորագրել են կապիտուլյացիոն պայմանագիրը, ինքը հանդիպել է Ազատություն Ռ/Կ–ի լրագրողներից մեկին, որն իր համակուրսեցին է՝ շենքի բակում, ասել լրագրողին՝ ինչու էին իրենց խաբում, թմբիրի մեջ պահում, ինքը որևէ մեկին չի հրել, չի խփել։

«Ինչ վերաբերում է Ձեր ինքնաբացարկին, ես գիտեմ, որ հայրերը պատասխանատու են որդիների համար, որդիները պատասխանատու են որդիների գործողությունների համար, բայց Ձեր դեպքն այլ է՝ եղբայրները պատասխանատու են եղբայրների գործողությունների համար։ Ձեր եղբայրն անցնում է կաշառակերության գործով և իմ ազատության գինը Ձեր եղբոր անազատությունը կարող է լինել, ես մարդկայնորեն, որպես տղամարդ հասկանում եմ Ձեզ, ընկալում՝ ինչ բարդ իրավիճակում եք»,- նշեց նա՝ հավելելով, որ դատախազին էլ է հասկանում՝ նա էլ է տուն պահում, բայց մենք բոլորս լուրջ, բարդ իրավիճակում ենք հայտնված, պետք է սթափվել, այսօր Արցախը մեր ինքնասիրությունն ու արժանապատվությունն է, որը մեզնից ամեն օր խլում են։

Դատարանը մերժեց ինքնաբացրկի միջնորդությունը։

Հիշեցնենք, որ քրեական գործը վերաբերում է 2020թ նոյեմբերի 9-ին կապիտուլյացիոն ակտի ստորագրմանը հաջորդած ակցիաներին, մասնավորապես՝ «Ազատություն» ՌԿ շենք մուտք գործելու դրվագին։ Գերասիմ Վարդանյանը, Բագրատ Եսայանը, Գառնիկ Մելքումյանը մեղադրվում են 2020 թվականի նոյեմբերի 10-ին Երևան քաղաքում տեղի ունեցած զանգվածային անկարգությունների ժամանակ խոչընդոտները վերացնելու եղանակով զանգվածային անկարգություններին օժանդակելու, ինչպես նաև խմբի կազմում լրագրողի մասնագիտական օրինական գործունեությանը խոչընդոտելու մեջ: Քրեական գործով կալանավորված է միայն Գերասիմ Վարդանյանը, ընդ որում, նրան կալանավորելու առաջին փորձը եղել է դեռևս 2020թ, սակայն դատարանները մերժել են կալանքի միջնորդությունները՝ հիմնավոր կասկածի բացակայության հիմքով։ Քրեական գործի մասին ԱԱԾ-ն երկու տարի անց է հիշել, քննիչը փոխել է Վարդանյանի մեղադրանքը և կրկին կալանավորելու միջնորդություն ներկայացրել դատարան, որն այս անգամ բավարարվել է՝ դատավոր Դավիթ Արղամանյանի կողմից՝ կալանավորման չորրորդ փորձից։

Հեղինակ՝ Իզաբել Սահակյան

Աղբյուր` Փաստինֆո