Փաստ ինֆո

Նիկոլ Փաշինյանը Վլադիվոստոկում հայ համայնքի հետ հանդիպման ժամանակ, սահմանազատման և սահմանագծման աշխատանքների մասին խոսելիս, չի հերքել, որ Ադրբեջանը տարածքային նկրտումներ ունի Հայաստանի հանդեպ:

«Սպառնալիք կա հետևյալի մեջ՝ երբ Ադրբեջանն օգտագործում է «Արևելյան Զանգեզուր» արտահայությունը, նկատի է առնվում, որ գոյություն ունի նաև «Արևմտյան Զանգեզուր», այս ամեն տակ թաքնված նկրտումներ կան, թեև միջազգային հանրության մոտ Ադրբեջանն ասում է, թե տարածքային պահանջներ չունի Հայաստանից»,-պարզաբանեց Փաշինյանը:

Նրա խոսքով՝ տարբեր կարծիքներ կան, թե սահմանագծում և սահմանազատում ո՞ր թվականի քարտեզների հիման վրա պետք է արվի, բայց այն պետք է տեղի ունենա իրավական ուժ ունեցող փաստաթղթերի հիման վրա.

«Քարտեզն ընդամենը նկար է, ցանկացած մեկը կարող է նկարել քարտեզ, բայց կարևոր է՝ թե այն ի՛նչ իրավական հենք ունի: Ադրբեջանական տիրույթում շատ են հայտնվում ձևակերպումներ, թե այս թվի քարտեզը ցույց է տալիս, որ «Զանգեզուրն» ապօրինի տրվել է Հայաստանին, սա դեստրուկտիվ մոտեցում է և բացահայտում է այն ներքին սպառնալիքները և նկրտումները, որն Ադրբեջանն ունի, բայց մենք պետք է առաջ գնանք և լուծենք դեմարկացիայի հարցը»,-ասաց Փաշինյանը:

Աղբյուր` Փաստինֆո