Փաստ ինֆո

Քաշաթաղից բռնի տեղահանված քաղաքացիների՝ երեկ կառավարության շենքի դիմաց կազմակերպած ցույցը սայլը տեղից շարժել է։ Քաշաթաղի համայնքների ղեկավարներն ու «Վերադարձ դեպի Քաշաթաղ» ՀԿ նախագահն այսօր հրավիրվել են ՀՀ աշխատանքի և սոցիալական հարցերի նախարարություն՝ իրենց խնդիրներն ու առաջարկները ներկայացնելու։ Այդ մասին «Փաստինֆո»-ի հետ զրույցում ասաց Քաշաթաղի շրջանի Ներքին Սուսի համայնքապետ Մխիթար Ներսիսյանը։

«Հիմա բանակցություններ են ընթանում նախարարությունում։ Թե ինչ արդյունք կլինի և կլինի՞ արդյոք, թե՞ ոչ, չեմ կարող ասել։ Մարդիկ վարձով են ապրում հիմնականում, աշխատանք դեռ չեն գտել։ Հուլիսից, իբր, մեկնարկած 40.0000-ականների ծրագրից, ըստ որի՝ 44-օրյա պատերազմի հետևանքով տեղահանված կամ բնակտարածք կորցրած անձանց բնակարանային կարիքի ժամանակավոր բավարարման նպատակով 40 հազարական դրամ աջակցություն պետք է տրամադրվեր, դեռ ոչ մեկը չի օգտվել։ Խնդիրները բազմաթիվ են»,-նշեց Ներքին Սուսի համայնքապետը։

Կոնկրետ Ներքին Սուսից տեղահանված ընտանիքների մեծ մասը, ինչպես նշում է համայնքապետը, վարձով են ապրում, մշտական աշխատանք էլ չունեն։ 44-օրյա պատերազմից հետո գյուղ վերադարձած, այնուհետև տեղահանված 12 ընտանիքների մեծ մասը հաստատվել են Սյունիքի մարզում՝ հիմնականում Գորիս քաղաքում, հարակից գյուղերում, Տեղում։

Արցախում բնություն է հաստատել առայժմ երկու ընտանիք։

Հիշեցնենք, որ երեկ կառավարության շենքի դիմաց բողոքի ակցիա անող քաշաթաղցիները պահանջում էին հանդիպում Նիկոլ Փաշինյանի և Արայիկ Հարությունյանի հետ։ Իրենց տներից զրկված ու առանց աշխատանքի մնացած քաշաթաղցիների հիմնական պահանջն իրենց տնով ապահովելն է։

Լուսանկարը՝ քաշաթաղցիների բողոքի ակցիայից

Աղբյուր` Փաստինֆո