Փաստ ինֆո

Վերջին ամիսներին ոստիկանության Վաղարշապատի բաժնում պարբերաբար ստացվում էին Արմավիրի մարզի Առատաշեն գյուղում ու կից համայնքներում կատարված բնակարանային գողությունների վերաբերյալ հաղորդումներ: Դրանց մի մասը միայն փորձ էր. լինում էին դեպքեր, երբ տանը մարդ էր լինում, կամ պարզապես արժեքավոր բան չէին հայտնաբերում: Իսկ դեպքերի վերլուծությունը հուշում էր, որ գողությունները նույն խմբի անդամների գործն է:

Վաղարշապատի ոստիկաններին օգնության ձեռք մեկնեցին Արմավիրի մարզային վարչության քրեական հետախուզության բաժանմունքի ծառայողները:

Օգոստոսի 18-ն էր, երեկոյան ժամը 21.40-ը, երբ 39-ամյա հայրն ու 17-ը չբոլորած որդին, դիմակներով ու ձեռնոցներով, մտան Առատաշեն գյուղի հերթական տունը: Նրանց սպասում էին դարանակալած ոստիկանները: Ձերբակալման պահին, կիսախավարում, հայրը մետաղյա ձողով հարվածեց քրեական հետախույզներից մեկին, ինչը, սակայն, չխանգարեց, որ հայր և որդի ձերբակալվեն ու տեղափոխվեն ոստիկանություն: Դրանից հետո միայն գլխի վնասվածքներ ստացած ոստիկանը տեղափոխվեց Վաղարշապատի հիվանդանոց:

Փաստի առթիվ Վաղարշապատի քննչական բաժնում նախաձեռնվեց քրեական վարույթ` գողության փորձի և պաշտոնատար անձի օրինական ծառայողական կամ քաղաքական գործունեությանը միջամտելու հատկանիշներով:

Աղբյուր` Փաստինֆո